Home တၢ်ကစီၣ် ပယီၤသုးသူအါထီၣ်ကျိဖးဒိၣ်လၢ KNU သုးက့(၅)ဟီၣ်က၀ီၤအပူၤ

ပယီၤသုးသူအါထီၣ်ကျိဖးဒိၣ်လၢ KNU သုးက့(၅)ဟီၣ်က၀ီၤအပူၤ

246
0

လါအီးကထိဘၢၣ် ၁၂ သီႇ ၂၀၂၁ နံၣ်ႇ ခ့ၣ်အဲးစံၣ်

ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ မုၢ်တြီၢ်ကီၢ်ရ့ၣ် သုးက့(၅)ဟီၣ်က၀ီၤအပူၤ ပယီၤသုးရ့ၣ်(၂)ရ့ၣ်လၢအဟူးဂဲၤ၀ဲလၢလီၢ်ခံသ့ၣ်တဖၣ်အံၤ ခးလီၤကျိဖးဒိၣ်ဆူဒူသ၀ီတၢ်မၤအီၣ်လီၢ်ကျဲတဖၣ်အပူၤ ဟဲအါထီၣ်၀ဲအဂ့ၢ်န့ၣ် မုၢ်တြီၢ်ကီၢ်ရ့ၣ် ၦၤဘၣ်မူဘၣ်ဒါစံး၀ဲန့ၣ်လီၤႉ

တကီၢ်ခါခဲအံၤ ပယီၤသုးလၢအဟဲနုာ်လီၤဆူဖၣ်ပူၣ်-ကမၤမိၣ်ဟီၣ်က၀ီၤပူၤတဖၣ်မ့ၢ်၀ဲ ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ-၈)စုဒုၣ်တီၤအဖီလာ် ခီၣ်ချ့သုးရ့ၣ်(ခမရ-၄၀၄)ဒီး (ခမရ-၄၀၆)သုးရ့ၣ်တဖၣ်ဒီး အ၀ဲသ့ၣ်ပာ်ဖှိၣ်မၤသကိးတၢ်ဒီးဟီၣ်က၀ီၤ(BGF) သုးရ့ၣ်(၁၀၁၄)တဖၣ်စ့ၢ်ကီးအသိး ပယီၤသုးတဖၣ်ဟူးဂဲၤဟးထီၣ်က့ၤလီၤ လီၤလီၤဆီဆီစ့ၢ်ကီးအိၣ်၀ဲအဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ် ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဘၣ်ခ့ၣ်အဲးစံၣ်န့ၣ်လီၤႉ

အ၀ဲစံး၀ဲလၢ“(စကခ-၈)ႇ(ခမရ-၄၀၄)ဒီး(၄၀၆)သုးရ့ၣ်လၢအဟဲထီၣ်ခဲအံၤသ့ၣ်တဖၣ် အတၢ်ဟူးတၢ်ဂဲၤန့ၣ် လီၤဆီန့ၢ်၀ဲဒၣ်အပူၤကွံာ်သုးရ့ၣ်သ့ၣ်တဖၣ်မီၤနီၤႉ မ့ၢ်၀ံၤဘျီဖီၣ်၀ဲပီၣ်တၣ်ဒီးမၢၦၤ၀ံန့ၢ်အတၢ်ဖိတၢ်လံၤလီၤႉ ပကွၢ်န့ၣ် သုးရ့ၣ်လၢအဟဲထီၣ်ခဲအံၤသ့ၣ်တဖၣ် ခီဖျိတသ့ၣ်ညါဟီၣ်က၀ီၤတၢ်အိၣ်သးဘၣ်အဃိ လၢတၢ်ဒီသဒၢလီၤက့ၤအကစၢ်သးအဂီၢ်န့ၣ် ဟးခးလီၤနါစိၤကျိဖးဒိၣ်လီၤမီၤနီၤႉ ခဲအံၤအ၀ဲသ့ၣ်အတၢ်ဟူးတၢ်ဂဲၤတဖၣ်ဟဲအါထီၣ်ရုၢ်ရုၢ်လီၤႉ တၢ်ဘၣ်သဂၢၢ်ခးလိာ်သးစ့ၢ်ကီးဟဲအါထီၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ဖဲလါအီးကထိဘၢၣ် ၂ သီအနံၤန့ၣ် ပယီၤသုးဒီး(BGF)သုးပာ်ဖှိၣ်တဖၣ် ခးလီၤ၀ဲကျိဖိကျိဖးဒိၣ်(၅)ဖျၢၣ်ဆူ ဖီထံခုၣ်သ၀ီဒီးလၢၢ်ဒ့သ၀ီ လီၢ်က၀ီၤဖိတၢ်မၤအီၣ်လီၢ်ကျဲတဖၣ်အပူၤန့ၣ်လီၤႉ လၢန့ၣ်အမဲာ်ညါဖဲလါအီးကထိဘၢၣ် ၄ သီအနံၤ ပယီၤသုးလၢအဟူးဂဲၤဖဲဖၣ်ပူၣ်ဟီၣ်က၀ီၤအပူၤတဖၣ် ခီဖျိခးလီၤ၀ဲကျိဖးဒိၣ်တဖၣ်ဆူ၀့ၤမိၤသ၀ီပူၤအဃိ ဘၣ်၀ဲဒၣ်သီခါဖၠၣ်ဒီးဟံၣ်(၁၂)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

လၢန့ၣ်အမဲာ်ညါဖဲ(လါအီးကထိဘၢၣ် ၇)သီအနံၤစ့ၢ်ကီး မဲးပြံးသ၀ီဖိအချံလၢကလဲၤဆှၢ၀ဲၦၤမိၢ်ဒၢလၢကလဲၤအိၣ်ဖျဲၣ်ဖိအံၤစ့ၢ်ကီးန့ၣ် BGF သုးရ့ၣ်(၁၀၁၄)အံၤတဟ့ၣ်လဲၤ၀ဲချံအံၤဘၣ်ဒီး ခးပျံၤ၀ဲဒီးကျိအထံၣ်အါမးအဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲန့ၣ်လီၤႉ

ဒ်န့ၣ်အသိးဖဲလါအီးကထိဘၢၣ် ၈ သီအနံၤ (ခမရ-၄၀၄)ဒီး(ခမရ-၄၀၆)အံၤ ခးလီၤနါစိၤ၀ဲကျိဖးဒိၣ်တဖၣ်ဆူဒူးပၠဲးကၠိသ၀ီတကပၤဒီး ဖဲလါအီးကထိဘၢၣ် ၁၀ သီ ဟါခီအဆၢကတီၢ်စ့ၢ်ကီး ခီဖျိပယီၤသုးခးနါစိၤကျိဖးဒိၣ်တဖၣ်ဆူဖၣ်ပူၣ်၀့ၢ်က၀ီၤဒ့ပူၤအဃိ လီၢ်က၀ီၤဖိတဖၣ်ပျံၤတၢ်ဖုးတၢ်န့ၣ်လီၤႉ

ဖဲလါအီးကထိဘၢၣ် ၉ သီတသီအတီၢ်ပူၤအံၤ လၢသုးက့(၅)ဟီၣ်က၀ီၤပူၤ ပယီၤသုးဒီးဟီၣ်က၀ီၤ(KNLA) အဘၢၣ်စၢၤတၢ်ခးလိာ်သးကဲထီၣ်၀ဲ(၆)ဘျီဒီး ဖဲန့ၣ်ပယီၤသုးတကပၤသံ(၁)ဂၤႇဘၣ်ဒိ(၇)ဂၤန့ၣ်လီၤႉ ဖဲလါအီးကထိဘၢၣ် ၇ သီအနံၤစ့ၢ်ကီး လၢဒွဲၣ်လိကီၢ်ဆၣ်အပူၤတၢ်ဒုးကဲထီၣ်၀ဲ(၂)ဘျီ ဖဲန့ၣ်(BGF)တကပၤသံ(၇)ဂၤႇဘၣ်ဒိ(၂၇)ဂၤအဂ့ၢ်န့ၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲလါအီးကထိဘၢၣ် ၁၁ သီအနံၤန့ၣ်လီၤႉ

ဘၣ်ထွဲဒီးပယီၤသုးမၤအါထီၣ်သုးဂံၢ်ဘါတၢ်ဂ့ၢ်အံၤ ပယီၤသုး ၦၤကတိၤတၢ်ပၢ သုးခိၣ်ကျၢၢ်ဂီၢ်ဂ့ၢ် စီၣ်မ့ထိ စံး၀ဲလၢ လၢခ့ၣ်အဲၣ်ယူၣ် သုးက့(၅)ဟီၣ်က၀ီၤအပူၤ ခီဖျိတၢ်ဟ့ၣ်၀ဲဒီကလုာ်ဃူဖိး(NUG)စုဒုၣ်တီၤအဖီလာ် တၢ်ဒီသဒၢကမျၢၢ်(PDF)သုးတၢ်သိၣ်လိႇဆီၣ်ထွဲမၤစၢၤ၀ဲစုက၀ဲၤႇဟ့ၣ်အိၣ်ကဒု၀ဲအဃိ လၢတၢ်ဘံၣ်တၢ်ဘၢအဂီၢ်ဒ်တၢ်လိၣ်တခါအသိး ဘၣ်မၤအါထီၣ်သုးဂံၢ်ဘါလီၤအဂ့ၢ်န့ၣ် စံးဘၣ်(RFA)တၢ်ကစီၣ်သန့ဖဲလါအီးကထိဘၢၣ် ၁၁ သီအနံၤန့ၣ်လီၤႉ