Home တၢ်ကစီၣ် သုးက့(၁)ဟီၣ်က၀ီၤအပူၤ လၢတသီအတီၢ်ပူၤတၢ်ဒုးကဲထီၣ်(၅)ဘျီႇပယီၤသုးသံ(၁၄)ဂၤႇဘၣ်ဒိ(၉)

သုးက့(၁)ဟီၣ်က၀ီၤအပူၤ လၢတသီအတီၢ်ပူၤတၢ်ဒုးကဲထီၣ်(၅)ဘျီႇပယီၤသုးသံ(၁၄)ဂၤႇဘၣ်ဒိ(၉)

653
0
Photo: KNU

လါအီးကထိဘၢၣ် ၂၅ သီႇ ၂၀၂၁ နံၣ်ႇ ခ့ၣ်အဲးစံၣ်

ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ် သထူၣ်ကီၢ်ဆၣ်အပူၤ ဖဲမဟါ(လါအီးကထိဘၢၣ် ၂၄)သီ ထဲတသီအတီၢ်ပူၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးအဘၢၣ်စၢၤ တၢ်ခးလိာ်သးကဲထီၣ်၀ဲ(၅)ဘျီ ဖဲန့ၣ်ပယီၤသုးတကပၤသံ၀ဲ(၁၄)ဂၤႇဘၣ်ဒိ(၉)ဂၤအဂ့ၢ်န့ၣ် KNU ဒူသထူၣ်ကီၢ်ရ့ၣ်ထုးထီၣ်ပာ်ဖျါ၀ဲဖဲတနံၤညါအံၤန့ၣ်လီၤႉ

ပယီၤသုးပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ-၈)စုဒုၣ်တီၤအဖီလာ်(ခမရ-၄၀၆)သုးကျိၤဒီး BGF (၁၀၁၄) သုးဒ့(၂)သုးပာ်ဖှိၣ်လၢအဆီလီၤအသုးကလၢၤဖဲဘံလ့ကီၢ်ဆၣ် တးပီသ၀ီအပူၤတဖၣ် ဖဲအ၀ဲသ့ၣ်ဆီတလဲ အသုးဟဲက့ၤလၢကျဲအဆၢကတီၢ် တၢ်ခးလိာ်သးကဲထီၣ်ဒီး(KNLA)သုးက့(၁)စုဒုၣ်တီၤအဖီလာ် ဖဲထံညၣ်လူၢ်သ၀ီဒီးနိၣ်ထိၣ်ဒ့ၣ်သ၀ီအဘၢၣ်စၢၤႇတလးအီကျါသ၀ီဒီးနိၣ်ထိၣ်ဒ့ၣ်သ၀ီအဘၢၣ်စၢၤႇဆီဘံၣ်နါသ၀ီကပၤ ကီးကၠးသၢသ၀ီဒီး၀ံရီသ၀ီအဘၢၣ်စၢၤဒီး နိၣ်ဖးလဲၢ်သ၀ီဒီးကီးကၠးသၢသ၀ီအဘၢၣ်စၢၤတဖၣ်အဂ့ၢ်န့ၣ် KNU ပာ်ဖျါ၀ဲန့ၣ်လီၤႉ

KNLA သုးက့(၁)သုးခိၣ်တဂၤစံး၀ဲ“ဖဲတၢ်တနံၤန့ၣ်အ၀ဲသ့ၣ်ဟဲက့ၤကအိၣ်၀ဲအဂၤ(၁၀၀)ဘျဲၣ်မီၤနီၤႉ စးထီၣ်ဖဲ(၄)နၣ်ရံၣ်တုၤလၢအနၣ်ရံၣ်(၁၀း၃၀)ဘျဲၣ်န့ၣ် ပၦၤလဲၤခိးခးအ၀ဲသ့ၣ်(၅)တီၤမီၤနီၤႉ အ၀ဲသ့ၣ်ဟဲက့ၤလၢခီၣ်အဃိဘၣ်ဒိဘၣ်ထံး၀ဲအါလီၤႉ မ့မ့ၢ်ပ၀ဲတကပၤဒုတၢ်ဘၣ်ဒိဘၣ်ထံးတအိၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်ဖဲတနံၤအံၤန့ၣ်လီၤႉ

ဖဲတၢ်တနံၤန့ၣ်ဂီၤခီအဆၢကတီၢ်တၢ်ခးလိာ်သးကဲထီၣ်(၅)ဘျီ၀ံၤအလီၢ်ခံ ဖဲမုၢ်ဟါလီၤအဆၢကတီၢ် ပယီၤသုးသုးဒ့ခိၣ်ကၠီၤစ့ၤလၣ်လၢအဆီလီၤသးဖဲကီးကၠးသၢသ၀ီသီခါဖၠၣ်အံၤတီခိၣ်ရိၣ်မဲ၀ဲသုးတြိၤ (၂၂)ႇ(ခမရ-၂၀၁)သုးရ့ၣ်အံၤဒီးခးလီၤကျိဖးဒိၣ်(၆၀ မမ) လၢ နိၣ်ဖးလဲၢ်သ၀ီခၢၣ်သးလီၤတဲာ်၀ဲလၢနီၢ်ဆၢၣ်ဘုအဟံၣ်ကပၤဒီးတၢ်ဟးဂူာ်ဟးဂီၤအိၣ်၀ဲအဂ့ၢ်န့ၣ် KNU တကပၤစံး၀ဲန့ၣ်လီၤႉ

ခ့ၣ်အဲၣ်ယူၣ်-ဒူသထူၣ်ကီၢ်ရ့ၣ် သုးက့(၁)ဟီၣ်က၀ီၤအပူၤ ခီဖျိပယီၤသုးမၤ၀ဲသုးတၢ်ဟူးတၢ်ဂဲၤဒီးမၤကမၣ်၀ဲၦၤဟီၣ်ခိၣ်ဖိခွဲးယာ်တဖၣ်အဃိ လၢအသီ(၂၀)အတီၢ်ပူၤတၢ်ခးလိာ်သးဟဲကဲထီၣ်၀ဲဒီးဟီၣ်က၀ီၤ(KNLA)သုးက့(၁)စုဒုၣ်တီၤအဖီလာ်တဖၣ်အိၣ်၀ဲအဘျီ(၃၀)ဘျဲၣ်အဂ့ၢ်န့ၣ် KNU ထုးထီၣ်ပာ်ဖျါ၀ဲန့ၣ်လီၤႉ

Photo: KNU