လါအီးကထိဘၢၣ် ၅ သီႇ ၂၀၂၁ နံၣ်ႇ ခ့ၣ်အဲးစံၣ်
ဖဲတနံၤအံၤ(လါအီးကထိဘၢၣ် ၅)သီ မုၢ်ထူၣ်အဆၢကတီၢ် လၢကညီကီၢ်စဲၣ် ကၠးအ့စ့ၣ်ကၠံကီၢ်ဆၣ် ကျ့းသ၀ီအပူၤ တၢ်ခးသံ၀ဲသုးခိးကီၢ်ဆၢ(BGF)သုးဖိခံဂၤလၢအလဲၤၦ့ၤအီဘံၣ်ယၣ်(Beer)အဂ့ၢ်န့ၣ် သ့ၣ်ညါဘၣ်န့ၣ်လီၤႉ
သုးဖိခံဂၤအံၤမ့ၢ်၀ဲ(BGF)သုးဖိလၢအအိၣ်ဆီလီၤသးဖဲကျ့းသ၀ီဃၢၤဒီး ဖဲတနံၤအံၤမုၢ်ထူၣ် ၁၂ နၣ်ရံၣ်အဆၢကတီၢ် ဖဲအ၀ဲသ့ၣ်လဲၤၦ့ၤအီဘံၣ်ယၣ်လၢသ၀ီပူၤအခါ ၦၤစိာ်စုက၀ဲၤဖိခံဂၤခးသံအ၀ဲသ့ၣ်ဘူးဘူးဖိဒီးကျိဖုၣ်ဖိအဂ့ၢ်န့ၣ် လီၢ်က၀ီၤသ၀ီဖိလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ
“သ၀ီဖိတဖၣ်တဲ၀ဲလၢဖဲ ၁၂ နၣ်ရံၣ်ဃၣ်ဃၣ်န့ၣ် အ၀ဲသ့ၣ်ခံဂၤန့ၣ်ဟဲၦ့ၤအီဘံၣ်ယၣ်ႇတကူသိး၀ဲသုးကူသုး ကၤဘၣ်ႉ ခး၀ဲဒီးကျိဖုၣ်ဘူးဘူးဖိလီၤႉ ခး၀ဲတဂၤန့ၣ်လွံၢ်ထံၣ်စုာ်စုာ်ဒီးသံ၀ဲတဘျီဃီန့ၣ်လီၤႉ ၦၤလၢအဟဲခး တၢ်န့ၣ်တဖၣ်စ့ၢ်ကီးဟဲကူသိး၀ဲဒီးကမျၢၢ်ကူကၤလီၤႉ ခး၀ဲ၀ံၤစံၣ်ထီၣ်၀ဲလၢသ၀ီချၢလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
ဟီၣ်က၀ီၤၦၤဘၣ်မူဘၣ်ဒါတဖၣ်စံး၀ဲလၢ BGF သုးဖိခံဂၤလၢဘၣ်တၢ်ခးသံ၀ဲအံၤ မ့ၢ်၀ဲနီၣ်ဂံၢ်(၁၀၂၃)သုးရ့ၣ်လၢအအိၣ်ဆီလီၤသးဖဲကၠဲးဒိ၀့ၢ်လီၤႉ တၢ်ကဲထီၣ်သး၀ံၤစှၤမံးနံးအတီၢ်ပူၤ ပယီၤသုးဒီး(BGF)သုးတဖၣ်နုာ်လီၤ၀ဲဒၣ်လၢတၢ်ကဲထီၣ်သးအလီၢ်ခးသီၣ်ထီၣ်ကျိဒီး က့ၤစိာ်၀ဲဒၣ်သုးဖိလၢအသံခံဂၤအစိၣ်အဂ့ၢ်န့ၣ် ၦၤလၢအထံၣ်၀ဲဒီးအမဲာ်တဖၣ်စံး၀ဲန့ၣ်လီၤႉ
ဖဲကျ့းသ၀ီဃၢၤန့ၣ် ပယီၤသုးပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ–၁၃)စုဒုၣ်တီၤအဖီလာ် ခီၣ်ချ့သုးရ့ၣ်(ခမရ–၅၅၇)ဒီးသုးခိးကီၢ်ဆၢ -BGF သုးရ့ၣ်(၁၀၁၄)လၢအအိၣ်ဆီလီၤသးလၢကၠဲးဒိတဖၣ် အိၣ်ဆီလီၤသးန့ၣ်လီၤႉ
