ခီဖျိပယီၤသုးနုာ်လီၤဖီၣ်တၢ်အဃိ လၢၢ်ဒိၣ်စိကီၢ်ဆၣ်ပူၤသ၀ီ(၄)ဖျၢၣ်ဘၣ်ဃ့ၢ်ထီၣ်

လါနိၣ်၀့ဘၢၣ် ၅ သီႇ ၂၀၂၁ နံၣ်ႇ ခ့ၣ်အဲးစံၣ်

လၢဘျံးဒ၀ဲၢ်ကီၢ်ရ့ၣ် လၢၢ်ဒိၣ်စိကီၢ်ဆၣ်အပူၤ စးထီၣ်ဖဲတၢ်ထုးပယီၤသုးဒီးမ့ၣ်ပိၢ်ကဲထီၣ်သး၀ံၤအလီၢ်ခံ ခီဖျိပယီၤသုးနုာ်လီၤဖီၣ်တၢ်တဖၣ်အဃိ စးထီၣ်ဖဲလါနိၣ်၀့ဘၢၣ် ၃ သီတုၤလၢခဲအံၤတစု သ၀ီ(၄)ဖျၢၣ်လၢာ်သ၀ီဖိခဲလၢာ်ဘၣ်ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ

ဖဲလါနိၣ်၀့ဘၢၣ် ၃ သီအနံၤ လၢလၢၢ်ဒိၣ်စိကီၢ်ဆၣ် သ့ကဒိဒီးဟၣ်မ့ကၠံသ၀ီအဘၢၣ်စၢၤန့ၣ် ခီဖျိတၢ်ထုးပယီၤသုးတဖၣ်ဒီးမ့ၣ်ပိၢ်အဃိ ပယီၤသုးတဖၣ်ဟဲနုာ်လီၤလၢသ၀ီပူၤဒီးဖီၣ်၀ဲၦၤတနီၤအဃိ ထံနၢအုၣ်ႇသ့ကဒိႇဟၣ်မ့ကၠံဒီးမၠ့းခၣ်ဒံၣ်သ၀ီ(၄)ဖျၢၣ် ဟံၣ်ခိၣ်(၃၀၀)ဃၣ်ဃၣ် လီၢ်က၀ီၤဖိ(၅၀၀)ဘျဲၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် ၦၤလၢအမၤစၢၤလီၢ်က၀ီၤဖိဖဲန့ၣ်သ့ၣ်တဖၣ်စံး၀ဲန့ၣ်လီၤႉ

“ပယီၤသုးတဖၣ်နုာ်လီၤလၢသ၀ီပူၤဒီးဖီၣ်တၢ်အဃိ တၢ်ဖီၣ်ချုးန့ၢ်၀ဲတနီၤလီၤႉ ကမျၢၢ်တဖၣ်နါက့အိၣ်လၢသ၀ီပူၤတဘူၣ်လၢၤဘၣ်ႇဟးစံၣ်အိၣ်ခူသူၣ်၀ဲသ၀ီဒီတဖျၢၣ်လီၤႉ ၦၤအိၣ်တ့ၢ်လၢသ၀ီပူၤတဖၣ်မ့ၢ်ဒၣ်ၦၤလၢအပာ်ဖှိၣ်မၤသကိးတၢ်ဒီးပယီၤသုးတဖၣ်လီၤႉ ကမျၢၢ်တဖၣ်ခဲအံၤလဲၤစံၣ်အိၣ်၀ဲဒၣ်လၢသ၀ီအဂၤတဖၣ်လီၤ”အဂ့ၢ်န့ၣ် ၦၤလၢအမၤစၢၤၦၤဃ့ၢ်မှံဟးဖျိးဖိတဖၣ်စံးဘၣ်ခ့ၣ်အဲးစံၣ်န့ၣ်လီၤႉ

လီၢ်က၀ီၤကမျၢၢ်လၢအဃ့ၢ်မှံဟးဖျိးဖဲန့ၣ်သ့ၣ်တဖၣ်မ့ၢ်၀ဲ ကညီကလုာ်ဒူၣ်ဒီးဒ၀ဲၢ်ကလုာ်ဒူၣ်တဖၣ်ဒီး တကီၢ်ခါခဲအံၤကမျၢၢ်လၢအဃ့ၢ်မှံဟးဖျိးတဖၣ်အဂီၢ် လိၣ်ဘၣ်၀ဲဒၣ်ဂ့ၢ်ဂီၢ်အူကသံၣ်ကသီဒီးတၢ်အီၣ်တၢ်အီတဖၣ်အဂ့ၢ်န့ၣ် ၦၤလၢအမၤစၢၤၦၤဃ့ၢ်မှံဟးဖျိးဖိတဖၣ်စံးအါထီၣ်၀ဲန့ၣ်လီၤႉ

လၢန့ၣ်အမဲာ်ညါတကီၢ်ခါခဲအံၤပယီၤသုးခီၣ်ချ့သုးရ့ၣ်(ခမရ-၄၀၆)ႇ(ခမရ-၄၀၇)သုးဂံၢ်ဘါ(၁၀၀)ဘျဲၣ် ဆီလီၤအသးလၢသ့ကဒိသ၀ီပူၤဒီး ဟးလူၤဖီၣ်၀ဲဒၣ်တၢ်လၢသ၀ီလၢအဘူးဖဲန့ၣ်သ့ၣ်အဃိ လီၢ်က၀ီၤဖိလၢအစံၣ်အိၣ်ခူသူၣ်သ့ၣ်တဖၣ်က့ၤဆူအဒူသ၀ီတညီဒံး၀ဲဘၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

ဖဲလါနိၣ်၀့ဘၢၣ် ၃ သီအနံၤ တၢ်ခိးထုးပယီၤသုးဒီးမ့ၣ်ပိၢ်ဖဲသ့ကဒိသ၀ီဒီးဟၣ်မ့ကၠံသ၀ီအပူၤအခါ ပယီၤသုးတကပၤသံ(၅)ဂၤဒီးဘၣ်ဒိဘၣ်ထံးအိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ