Home တၢ်ကစီၣ် ပယီၤသုးဖီၣ်လၢၢ်မုၢ်လါကီၢ်ဆၣ်ပူၤၦၤမၤ(CDM)ဖိ ၂၀ အဂၤ

ပယီၤသုးဖီၣ်လၢၢ်မုၢ်လါကီၢ်ဆၣ်ပူၤၦၤမၤ(CDM)ဖိ ၂၀ အဂၤ

177
0

လါနိၣ်၀့ဘၢၣ် ၁၁ သီႇ ၂၀၂၁ နံၣ်ႇ ခ့ၣ်အဲးစံၣ်

ဘျံးဒ၀ဲၢ်ကီၢ်ရ့ၣ် လၢၢ်မုၢ်လါကီၢ်အဆၣ်အပူၤလၢပယီၤသုးနုာ်လီၤမၤ၀ဲသုးတၢ်ဟူးတၢ်ဂဲၤဟဲအါထီၣ်၀ဲအံၤ ဖဲမဟါလါနိၣ်၀့ဘၢၣ် ၁၀ သီ ဟါခီအဆၢကတီၢ် ပယီၤသုးဖီၣ်၀ဲၦၤမၤ(Civil Disobedience Movement-CDM)ဖိအဂၤ(၂၀)ဃၣ်ဃၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤတၢ်ကစီၣ်အအိၣ်န့ၣ်လီၤႉ

အ၀ဲစံး၀ဲလၢ“ကဘၣ်ဖဲဟါခီ ၆ နၣ်ရံၣ်အဆၢကတီၢ်န့ၣ် အ၀ဲသ့ၣ်မ့ၢ်အလဲၤအက့ၤဖဲန့ၣ်တသ့ၣ်ညါဘၣ်ႉ မ့ၢ်ဘၣ်လၢအစံၣ်ခီဧါတသ့ၣ်ညါဘၣ် တၢ်ဖီၣ်ချုး၀ဲလီၤႉ ယဆိမိၣ်ဒုဖဲမဟါမုၢ်နၤခီန့ၣ် ပယီၤသုးလဲၤထီၣ်က၀ီၤအ၀ဲသ့ၣ်ဘျီ အ၀ဲသ့ၣ်စံၣ်ဒီးတၢ်ဖီၣ်ချုး၀ဲလီၤႉ ဖဲန့ၣ်အကျါပနၢ်ဟူ လၢပၣ်ဃုာ်ဒီးဒီကထၢၣ်တဂၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်ဖဲတနံၤအံၤလါနိၣ်၀့ဘၢၣ် ၁၁ သီအနံၤန့ၣ်လီၤႉ

ၦၤလၢတၢ်ဖီၣ်အီၤသ့ၣ်တဖၣ်န့ၣ် ပယီၤသုးတီၢ်မၤဒၢၣ်မၤနးအ၀ဲသ့ၣ်လၢသ၀ီဖိတဖၣ်အမဲာ်ညါအဂ့ၢ်န့ၣ် လီၢ်က၀ီၤတၢ်ကစီၣ်စံးအါထီၣ်၀ဲန့ၣ်လီၤႉ
တကီၢ်ခါခဲအံၤ ပယီၤသုးတဖၣ်နုာ်လီၤမၤ၀ဲသုးတၢ်ဟူးတၢ်ဂဲၤလၢလၢၢ်မုၢ်လါကီၢ်ဆၣ် ရှါဒိၣ်ႇမးတီႇယ့ၤရှါႇကၠဲၣ်ကၤႇမံၣ်ခၠီသဲးႇခၠီလၣ်သ၀ီကရူၢ်ပူၤဟဲအါထီၣ်၀ဲအသိး ဖဲမဟါန့ၣ် ပယီၤသုးဂံၢ်ဘါဟဲထီၣ်၀ဲအဂၤ(၆၀)ဒီး တနံၤအံၤစ့ၢ်ကီးဟဲအါထီၣ်ကဒီးအဂၤ(၅၀)ဃၣ်ဃၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

ပယီၤသုးလၢအနုာ်လီၤဟူးဂဲၤတဖၣ်အံၤဒီးကညီဒီကလုာ်စၢဖှိၣ်ကရၢ-KNU သုးက့(၄)စုဒုၣ်တီၤအဖီလာ် ကညီဒီကလုာ်တၢ်ထူူၣ်ဖျဲးသုးမုၢ်ဒိၣ်-KNLA တဖၣ်အဘၢၣ်စၢၤတၢ်ဘၣ်သဂၢၢ်ခးလိာ်သးကဲထီၣ်အဃိ လီၢ်က၀ီၤသ၀ီဖိတဖၣ်စ့ၢ်ကီးဘၣ်ဃ့ၢ်ထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ် ၦၤဘၣ်မူဘၣ်ဒါဒီးလီၢ်က၀ီၤဖိတဖၣ်စံး၀ဲန့ၣ်လီၤႉ

ဘၣ်ထွဲဒီးတၢ်ဖီၣ်ၦၤမၤ(CDM)ဖိတၢ်ဂ့ၢ်အံၤ ဘျံးဒ၀ဲၢ်ကီၢ်ရ့ၣ်(သုးက့-၄)ၦၤကတိၤတၢ်ပၢ ပဒိၣ်စီၤဖျိးစိ၀့ စံး၀ဲလၢ“တၢ်ဖီၣ်(CDM)တၢ်ကစီၣ်ဒုတနၢ်ဟူဘၣ်ႉ အိၣ်တခါလၢပယီၤသုးဟဲနုာ်လီၤအဃိတၢ်ဒုးကဲထီၣ်ဒီး သ၀ီဖိလၢအစံၣ်ထီၣ်တဖၣ်န့ၣ်ပယီၤသုးထံၣ်၀ဲလၢသ၀ီချၢအဃိကိးဖှိၣ်၀ဲဒီးက့ၤကိး၀ဲ၀ံၤပျၢ်လီၤက့ၤ၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ဘၣ်ဆၣ်ၦၤမၤ(CDM)ဖိလၢတၢ်ဖီၣ်ဃာ်၀ဲလၢတကီၢ်ခါခဲအံၤသ့ၣ်တဖၣ် မ့ၢ်အပၣ်ဃုာ်ဒီးမတၤတဂၤလဲၣ်န့ၣ် ခ့ၣ်အဲးစံၣ်ပာ်ဂၢၢ်ပာ်ကျၢၤ၀ဲလီၤလီၤဆီဆီတန့ၢ်ဒံး၀ဲဘၣ်ဆၣ်သနါက့ ဟီၣ်က၀ီၤ(KNU)သုးခိၣ်တဂၤစံး၀ဲလၢ ပယီၤသုးဖီၣ်ၦၤမၤ(CDM)သၢဂၤဒီးတီၢ်မၤဒၢၣ်မၤလီၤ၀ဲအဃိ အသးသမူကမူအဂီၢ်တလီၤတံၢ်ဘၣ်အဂ့ၢ်န့ၣ် စံး၀ဲန့ၣ်လီၤႉ

အ၀ဲစံး၀ဲလၢ“ဖဲအပူၤကွံာ်ခံသီအခါန့ၣ်ပယီၤသုးဖီၣ်၀ဲ(၃)ဂၤႇဖီၣ်၀ဲလၢမးတီတကပၤလီၤႉ ယဆိကမိၣ်ဒုတၢ်ကမၤသံအ၀ဲသ့ၣ်လီၤႉ လၢအသးသမူကမူအဂီၢ်ဒုတၢ်မုၢ်လၢ်တအိၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ဖဲအပူၤကွံာ်လါနိၣ်၀့ဘၢၣ် ၇ သီအနံၤစ့ၢ်ကီး ပယီၤသုးခီၣ်ချ့သုးရ့ၣ်(ခလရ-၂၈၅)လၢအနုာ်လီၤဟူးဂဲၤလၢလၢၢ်မုၢ်လါကီၢ်ဆၣ်ႇမးတီသ၀ီအပူၤတဖၣ်အံၤ ဖီၣ်၀ဲလီၢ်က၀ီၤသ၀ီဖိအဂၤ(၂၀)ဒီးပာ်၀ဲလၢသီခါဖၠၣ်ကရၢၢ်ပူၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ

တကီၢ်ခါခဲအံၤပယီၤသုးတဖၣ်နုာ်လီၤဟူးဂဲၤလၢလီၢ်က၀ီၤ၀ဲန့ၣ်အပူၤဟဲအါထီၣ်၀ဲဒီး သုးတၢ်သဘံၣ်သဘုၣ်ဟဲအိၣ်ထီၣ်၀ဲဒီးဟီၣ်က၀ီၤ(KNU)သုးႇတၢ်ဒီသဒၢကမျၢၢ်(PDF)သုးတဖၣ်အိၣ်၀ဲဘၣ်ဆၣ် ပယီၤသုးအံၤဖီၣ်၀ဲကမျၢၢ်ဒီးဟံးန့ၢ်တၢ်ဒီသဒၢလၢလီၢ်က၀ီၤသ၀ီဖိတဖၣ်အအိၣ်အဃိ လၢကလဲၤခးအ၀ဲသ့ၣ်အဂီၢ်ကီခဲ၀ဲအဂ့ၢ်န့ၣ် လီၢ်က၀ီၤ(PDF)သုးတဖၣ်စံး၀ဲန့ၣ်လီၤႉ