Home တၢ်ကစီၣ် သၤမညၣ်သ၀ီကရူၢ်သးၦၢ်၀ဲၤဒၢး ၦၤမၤတၢ်ဖိ(၃)ဂၤလီၢ်မၢ်

သၤမညၣ်သ၀ီကရူၢ်သးၦၢ်၀ဲၤဒၢး ၦၤမၤတၢ်ဖိ(၃)ဂၤလီၢ်မၢ်

353
0
Photo: CJ (သာမည မြင်ကွင်းတစ်နေရာ)

လါနိၣ်၀့ဘၢၣ် ၁၀ သီႇ ၂၀၂၁ နံၣ်ႇ ခ့ၣ်အဲးစံၣ်

ကညီကီၢ်စဲၣ် ဖၣ်အၣ်ကီၢ်ဆၣ် သၤမညၣ်သ၀ီကရူၢ်ပူၤ ၦၤကွဲးလံာ်ဖိလၢသ၀ီသးၦၢ်၀ဲၤဒၢး(၃)ဂၤ ဖဲအပူၤကွံာ်လါနိၣ်၀့ဘၢၣ်(၈)သီဟါခီအဆၢကတီၢ်လီၤမၢ်၀ဲဒၣ်ဒီး တုၤလၢခဲအံၤတၢ်ဆဲးကျိးတန့ၢ်ဒံး၀ဲဘၣ်အဂ့ၢ်န့ၣ် သ့ၣ်ညါဘၣ်လၢသးၦၢ်၀ဲၤဒၢးလၢအဘၣ်ထွဲအအိၣ်န့ၣ်လီၤႉ

ၦၤ(၃)ဂၤလၢအလီၤမၢ်၀ဲအံၤ ဖဲလါနိၣ်၀့ဘၢၣ်(၈)သီ ၈ နၣ်ရံၣ်ဃၣ်ဃၣ်အဆၢကတီၢ် ဖဲအ၀ဲသ့ၣ်အိၣ်လၢ၀ဲၤဒၢးအခါၦၤတဒူၣ်ဟဲဒိး၀ဲသိလ့ၣ်(Honda Fit)ဒီးက့ၤကိးအ၀ဲသ့ၣ်အဂ့ၢ်န့ၣ် သၤမညၣ်သ၀ီကရူၢ် သးၦၢ်စီၤသ့တ့ၤ စံးဘၣ်ခ့ၣ်အဲးစံၣ်န့ၣ်လီမႉ“ယက့ၤနၢ်ဟူက့ၤလၢ တၢ်လဲၤကိးအ၀ဲသ့ၣ်လၢကမၤလံာ်တၢ်ဖျီသးအဂီၢ်လီၤႉ

အ၀ဲသ့ၣ်မ့ၢ်ၦၤလၢအမၤတၢ်လၢ၀ဲၤဒၢးအဃိ မ့ၢ်ၦၤသ့ၣ်တဖၣ်လၢအထုးထီၣ်န့ၢ်၀ဲလံာ်လဲၢ်တဖၣ်မီၤနီၤႉ လၢကမၤလံာ်တၢ်ဖျီသးအဂီၢ် ဖိသၣ်တဖၣ်လဲၤအိၣ်ခိး၀ဲလၢမုၢ်နၤခီ ၈ နၣ်ရံၣ် ၉ နၣ်ရံၣ်ဘၢၣ်စၢၤဒီး အိၣ်တစိၢ်ဘျီန့ၣ်သိလ့ၣ်ဟဲနုာ်လီၤတခိၣ်ႇ၀ံၤဘျီကးပံး၀ဲမ့ၣ်အူခဲလၢာ်ဒီးလဲၤပိာ်၀ဲသိလ့ၣ်တခိၣ်န့ၣ်အခံလီၤႉ သိလ့ၣ်အလီၢ်ခံန့ၣ်ဆဲးကဲးခံခိၣ်ပိာ်ထီၣ်အခံလီၤန့ၣ်ၦၤလၢထံၣ်ဒီးအမဲာ်တဖၣ်တဲ၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ၦၤလၢအလီၤမၢ်သ့ၣ်တဖၣ်မ့ၢ်၀ဲအူအီၣ်ကၠီၣ်သူၣ်(၄၀)နံၣ်ႇအူကၠံၤခၠိၤ(၂၆)နံၣ်ဒီးအူသီၤသီၤသွ့ၤ(၃၀)နံၣ်သ့ၣ်တဖၣ်ဒီး ၦၤသ့ၣ်တဖၣ်အံၤမ့ၢ်ၦၤလၢအဖံးမၤတၢ်လၢသးၦၢ်၀ဲၤဒၢးအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဘၣ်ထွဲဒီး၀ဲၤဒၢးၦၤကွဲးလံာ်ဖိလီၤမၢ်တၢ်ဂ့ၢ်အံၤ သးၦၢ်၀ဲၤဒၢးလၢအဘၣ်ထွဲအံၤလဲၤတီၣ်ထီၣ်ဃာ်တၢ်ဂ့ၢ်လၢအ့ၣ်ဒူၣ်ဟီၣ်က၀ီၤပၢၤကီၢ်၀ဲၤလီၢ်အဂ့ၢ်န့ၣ် သ၀ီသးၦၢ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ

ၦၤကွဲးလံာ်ဖိသၢဂၤလၢအလီၤမၢ်၀ဲအံၤ မ့ၢ်ၦၤသ့ၣ်တဖၣ်လၢအလဲၤပာ်ဖှိၣ်ထီၣ်သးဖဲအပူၤကွံာ်(လါအီးကထိဘၢၣ် ၃၀)သီအနံၤတၢ်မၤ၀ဲတၢ်ဆီၣ်ထွဲဟ့ၣ်ဂံၢ်ဟ့ၣ်ဘါပယီၤသုးမုၢ်ဒိၣ်တဖၣ်အဂ့ၢ်န့ၣ် သၤမညၣ်လီၢ်က၀ီၤဖိတဖၣ်စံး၀ဲန့ၣ်လီၤႉ

သၤမညၣ်သ၀ီကရူၢ်အံၤ ဘၣ်ထွဲဒီးသးၦၢ်၀ဲၤဒၢးအၦၤမၤတၢ်ဖိလီၤမၢ်ဒ်အံၤတၢ်ဂ့ၢ်အံၤ လီၢ်က၀ီၤဖိတဖၣ်ဘၣ်ယိၣ်၀ဲလၢတၢ်ကဟးလူၤဖီၣ်တၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ