Home တၢ်ကစီၣ် ခီဖျိပယီၤသုးမီၤစိရိၤဆှၢအါထီၣ်သုးဂံၢ်ဘါအဃိ မုၢ်သဲးလီၢ်က၀ီၤဖိတဖၣ်ဘၣ်ဃ့ၢ်မှံ

ခီဖျိပယီၤသုးမီၤစိရိၤဆှၢအါထီၣ်သုးဂံၢ်ဘါအဃိ မုၢ်သဲးလီၢ်က၀ီၤဖိတဖၣ်ဘၣ်ဃ့ၢ်မှံ

413
0
Photo: KNU

လါဒံၣ်စ့ဘၢၣ် ၂၉ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲအပူၤကွံာ်လါဒံၣ်စ့ဘၢၣ် ၂၃ သီအနံၤ ခီဖျိပယီၤသုးဆှၢအါထီၣ်သုးဂံၢ်ဘါအါအါဂီၢ်ဂီၢ်လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃) လၢၢ်ဒိၣ်ကီၢ်ဆၣ် မုၢ်သဲးဟီၣ်က၀ီၤပူၤအဃိ လီၢ်က၀ီၤဖိတဖၣ်ဘၣ်ဃ့ၢ်မှံဟးဖျိးအဂ့ၢ်န့ၣ် ခ့ၣ်အဲၣ်ယူၣ်တၢ်ကစီၣ်ဒီးတၢ်ဘိးဘၣ်ရၤလီၤ၀ဲၤကျိၤထုးထီၣ်ပာ်ဖျါ၀ဲန့ၣ်လီၤႉ

ပယီၤသုးခီၣ်သုးရ့ၣ်(ခလရ-၃၅၁ႇခလရ-၁၂၄ႇခလရ-၅၈၉ႇခလရ-၅၉၈ႇခလရ-၄၄၀)ဒီးခီၣ်ချ့သုးရ့ၣ်(ခမရ-၇၉)တဖၣ်ပာ်ဖှိၣ်ထီၣ်သးႇသုးသိလ့ၣ်အခိၣ်(၃၀)သုးဂံၢ်ဘါကအိၣ်(၄၈၀)ဃၣ်ဃၣ်ဒီး ကသ့ၣ်လၢအတီၣ်တၢ်အီၣ်တၢ်အီအဒု(၁၀၀)ဃၣ်ဃၣ်အံၤ ဟဲနုာ်လီၤဟူးဂဲၤ၀ဲဒၣ်လၢခ့ၣ်အဲၣ်ယူၣ်မုၢ်တြီၢ်ကီၢ်ရ့ၣ်ဟီၣ်က၀ီၤပူၤအဃိ လီၢ်က၀ီၤဖိလၢအအိၣ်ဖဲမုၢ်သဲးကျဲဖီခိၣ်အကပိၤကပၤတဖၣ်ပျံၤတၢ်ဖုးတၢ်ဘၣ်ဟးဃ့ၢ်အိၣ်ခူသူၣ်လၢတၢ်လီၢ်အဂၤအဂ့ၢ်န့ၣ် KNU ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ

ခီဖျိသုးမီၤစိရိၤအသုးတဖၣ်ဟူးဂဲၤ၀ဲဒုးယာ်ဂ့ၢ်၀ီအဃိ သ့ၣ်နွဲၤထၣ်သ၀ီ(ကိး)မုၢ်သဲးသ၀ီဖိတဖၣ်ဘၣ်ဃ့ၢ်မှံဟးဖျိးအမဲာ်ညါ ပီၤဖီခံသ၀ီႇစ့ဘီလူၢ်ႇထံပနၢ်အ့ၣ်ခံႇဃဲၢ်ကၢ်ခိၣ်သ၀ီ ဟံၣ်ခိၣ်(၈၆)ဖျၢၣ် ၦၤနီၣ်ဂံၢ်(၅၅၀)ဘျဲၣ် အိၣ်လၢသ၀ီပူၤတဘူၣ်လၢၤဘၣ်ဒီးဃ့ၢ်အိၣ်ဆူတၢ်လီၢ်အဂၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါတဂၤစံး၀ဲန့ၣ်လီၤႉ

အ၀ဲစံး၀ဲလၢ“ၦၤစံၣ်ခဲအံၤသ့ၣ်တဖၣ်န့ၣ်အပူၤကွံာ်နါက့ဘၣ်စံၣ်ဒီးတုၤလၢခဲအံၤက့ၤလၢအဟံၣ်တဘူၣ်ဒံးဘၣ်ႉ စံၣ်အိၣ်၀ဲဒၣ်လၢၦၢ်ပူၤလီၤႉ ၦၤစံၣ်ခဲအံၤတဖၣ်အါလၢမုၢ်သဲးသ၀ီဖိလီၤႉ ခဲအံၤခီဖျိပယီၤသုးဆီလီၤအသုးဖဲသ၀ီပူၤအဃိ လီၢ်က၀ီၤဖိတဖၣ်ဘၣ်ဟးပလဲာ်အသးမီၤနီၤႇတုၤလၢခဲအံၤက့ၤလၢဟံၣ်တဘူၣ်ဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

လီၢ်က၀ီၤဖိလၢအဃ့ၢ်ထီၣ်သ့ၣ်တဖၣ်အံၤခီဖျိဘၣ်ဟးအိၣ်ကဒုသးလၢၦၢ်လၢ်ကျါအဃိ အ၀ဲသ့ၣ်အံၤလိၣ်ဘၣ်၀ဲဒၣ်တၢ်အီၣ်တၢ်အီႇတၢ်အိၣ်တၢ်ဆိးလီၢ်ကျဲဒီးကသံၣ်ကသီတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

လၢန့ၣ်အမဲာ်ညါဖဲအပူၤကွံာ်လါဒံၣ်စ့ဘၢၣ် ၇ သီ ဟါခီအဆၢကတီၢ်စ့ၢ်ကီး ခီဖျိပယီၤသုးမီၤစိရိၤအသုးခးလီၤကျိဖးဒိၣ်လၢသ့ၣ်နွဲၤထၣ်(ကိး)မုၢ်သဲးသ၀ီပူၤအဃိ လီၢ်က၀ီၤသ၀ီဖိ(၃)ဂၤဘၣ်ဒိဘၣ်ထံးခီဖျိဘၣ်၀ဲဒီးကျိဖးဒိၣ်အက့အဃိလီၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ

ခီဖျိပယီၤသုးအံၤတိာ်ဃာ်၀ဲလၢကဆှၢထီၣ်တၢ်အီၣ်တၢ်အီလၢအသုးကလၢၤလၢအအိၣ်ဆီလီၤသးဖဲ KNU သုးက့(၅)ဟီၣ်က၀ီၤပူၤအံၤအဃိ အ၀ဲသ့ၣ်ဟ့ၣ်ထီၣ်တၢ်ဂ့ၢ်လၢလီၢ်က၀ီၤတၢ်လဲၤထီၣ်လဲၤထီအဂီၢ်ဒီးတ့ထီၣ်၀ဲကျဲလၢအတအိၣ်ဒီးခ့ၣ်အဲၣ်ယူၣ်အတၢ်ပျဲဘၣ်အဃိ တၢ်ခးလိာ်သးဟဲကဲထီၣ်၀ဲဒီးဟီၣ်က၀ီၤ(KNLA)အၦၤတဖၣ်ခဲအံၤခဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ