Home တၢ်ကစီၣ် ခီဖျိပယီၤသုးမၤအါထီၣ်သုးဂံၢ်ဘါလၢဘံလ့ကီၢ်ဆၣ်ပူၤအဃိ လီၢ်က၀ီၤဖိတနီၤတုၤလၢခဲအံၤဘၣ်ဃ့ၢ်ထီၣ်ဒံး၀ဲ

ခီဖျိပယီၤသုးမၤအါထီၣ်သုးဂံၢ်ဘါလၢဘံလ့ကီၢ်ဆၣ်ပူၤအဃိ လီၢ်က၀ီၤဖိတနီၤတုၤလၢခဲအံၤဘၣ်ဃ့ၢ်ထီၣ်ဒံး၀ဲ

398
0

လါဒံၣ်စ့ဘၢၣ် ၃၀ သီႇ ၂၀၂၁နံၣ်ႇ ခ့ၣ်အဲးစံၣ်

ခီဖျိပယီၤသုးဒီးသုးခိးကီၢ်ဆၢ(BGF)သုးပာ်ဖှိၣ်တဖၣ်မၤအါထီၣ်သုးဂံၢ်ဘါဟူးဂဲၤအါထီၣ်လၢဒူသထူၣ်ကီၢ်ရ့ၣ် ဘံလ့ကီၢ်ဆၣ်(သုးက့ ၁)ဟီၣ်က၀ီၤပူၤအဃိ ကတီၢ်အံၤလီၢ်က၀ီၤသ၀ီဖိလၢအိၣ်ဖဲန့ၣ်သ့ၣ်တဖၣ် ဘၣ်အိၣ်၀ဲဒၣ်လၢတၢ်ပျံၤတၢ်ဖုးအပူၤဒီးတနီၤန့ၣ်ဘၣ်ဟးဃ့ၢ်ပလဲာ်သးအိၣ်ဒံး၀ဲအဂ့ၢ်န့ၣ် လီၢ်က၀ီၤဖိိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ

ဖဲအပူၤကွံာ်လါဒံၣ်စ့ဘၢၣ် ၁၇ သီအနံၤ သုးက့(၁)အၦၤလဲၤထီၣ်မၤန့ၢ်ယိၤကျါ(BGF)သုးလၢၤ၀ံၤအလီၢ်ခံန့ၣ် လီၢ်က၀ီၤသ၀ီလၢအအိၣ်ဘူးဖဲယိၤကျါသ၀ီခိၣ်ဃၢၤသ့ၣ်တဖၣ်ဘၣ်ယိၣ်၀ဲလၢတၢ်ဒုးကကဲထီၣ်ဒီး တုၤလၢခဲအံၤတစုတနီၤန့ၣ်ဘၣ်ဟးစံၣ်ပလဲာ်သးအိၣ်ဒံး၀ဲအဂ့ၢ်န့ၣ် လီၢ်က၀ီၤဖိတဖၣ်စံးဘၣ်ခ့ၣ်အဲးစံၣ်ဖဲတနံၤအံၤလါဒံၣ်စ့ဘၢၣ် ၃၀ သီအနံၤန့ၣ်လီၤႉ

လီၢ်က၀ီၤဖိတဂၤစံး၀ဲလၢ“မ့ၢ်လီၤၦၤစံၣ်ကိးမုၢ်ဒဲးလီၤႇစံၣ်တကတၢၢ်နီတဘျီလၢၤဘၣ်ႉ ဒ်သိးယိၤကျါန့ၣ်ခဲအံၤၦၤအိၣ်တ့ၢ်က့ၤစှၤဟံၣ်လီၤႉ ခဲအံၤၦၤဖိဒံဖိသၣ်နါက့ၦၤမၢအိၣ်ဃာ်လၢတၢ်ပူၤမီၤနီၤႉ သ၀ီဖိတဖၣ်ပျံၤ၀ဲဒၣ်လၢပယီၤသုးဒီးကညီသုးကခးလိာ်သးကတိလိာ်သးဘၣ်ဖုးမီၤနီၤ”အဂ့ၢ်န့ၣ်စံး၀ဲဒၣ်န့ၣ်လီၤႉ

လၢန့ၣ်အမဲာ်ညါစးထီၣ်လၢတၢ်လဲၤထီၣ်မၤန့ၢ်ယိၤကျါ(BGF)သုးကလၢၤ၀ံၤအလီၢ်ခံန့ၣ် လီၢ်က၀ီၤသ၀ီဖိလၢအအိၣ်ဘူးဖဲန့ၣ်သ့ၣ်တဖၣ်တုၤလၢခဲအံၤဘၣ်အိၣ်လၢတၢ်ပျံၤတၢ်ဖုးအပူၤဒီးစံၣ်ပြံစံၣ်ပြါကိးမုၢ်နံၤဒဲးန့ၣ်လီၤႉ သ၀ီလၢအစံၣ်တဖၣ်န့ၣ်မ့ၢ်၀ဲထံဖးဒိၣ်ထၣ်သ၀ီႇယိၤကျါႇထံဖးဒိၣ်ခံႇထီးကျီးထၣ်ႇ လ့ၣ်ခီၣ်ထံးဒီးကီးဖိခိၣ်သ၀ီဖိတဖၣ်လီၤအဂ့ၢ်န့ၣ် လီၢ်က၀ီၤဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

ဘၣ်ထွဲဒီးတၢ်ဂ့ၢ်ကဲထီၣ်သးအံၤဘံလ့ကီၢ်ဆၣ်တၢ်ကစီၣ်၀ဲၤဒ့နဲၣ်ရွဲၣ်စီၤအဲၣ်သဘျ့ထူစံး ၀ဲလၢ“ခီဖျိလၢပယီၤသုးဒီး(BGF)သုးပာ်ဖှိၣ်တဖၣ်မၤအါထီၣ်သုးဂံၢ်ဘါအဃိ လီၢ်က၀ီၤဖိတဖၣ် ပျံၤတၢ်ဒီးစံၣ်ထီၣ်၀ဲဒၣ်မီၤနီၤႉ ထံရူၢ်ကီၢ်သဲးမ့လဲၤသးဒ်အံၤဒုအ၀ဲသ့ၣ်ဟဲက့ၤအိၣ်ကဘူၣ်ယီၢ်ယီၢ်တ ဘူၣ်ဘၣ်ယီၢ်ယီၢ်လီၤႉ”အဂ့ၢ်န့ၣ်စံး၀ဲဒၣ်န့ၣ်လီၤႉ

ဖဲအပူၤကွံာ်လါဒံၣ်စ့ဘၢၣ် ၁၇ သီအနံၤ သုးက့(၁)အၦၤလဲၤထီၣ်မၤန့ၢ်ယိၤကျါ(BGF)သုးလၢၤ၀ံၤအလီၢ်ခံ စှၤသီန့ၣ်ပယီၤသုးတဖၣ်ဟဲက့ၤနုာ်လီၤကဒါက့ၤလၢသ၀ီပူၤအိၣ်ဆီလီၤအသးဖဲသီခါဖၠၣ်တုၤလၢခဲအံၤတစုန့ၣ်လီၤႉ

လၢန့ၣ်အမဲာ်ညါအပူၤကွံာ်လါဒံၣ်စ့ဘၢၣ် ၂၁ သီအနံၤစ့ၢ်ကီး ပယီၤသုးတဒူၣ်ဃီ၀ဲန့ၣ် ခးသံကွံာ်၀ဲထီးကျိးခံသ၀ီဖိ နီၢ်ဃံအံၤလၢကျီးပူၤလၢတၢ်ဂ့ၢ်တအိၣ်နီတမံၤဘၣ်ကဲထီၣ်သးဒံးန့ၣ်လီၤႉ

စးထီၣ်လၢလါဖ့ၤဘြူၤအါရံၤ ၁ သီ သုးဟံးန့ၢ်ဆူၣ်ကွံာ်တၢ်စိတၢ်ကမီၤ၀ံၤအလီၢ်ခံ လီၤဆီဒၣ်တၢ်လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤတဖၣ်အပူၤန့ၣ် တၢ်ဒုးကဲထီၣ်၀ဲဒီးပယီၤသုးမီၤစိရိၤအသုးကိးမုၢ်ဒဲးဃၣ်ဃၣ်ညါအသိး လီၢ်က၀ီၤကမျၢၢ်ထံဖိကီၢ်ဖိအါအါဂီၢ်ဂီၢ်ဘၣ်ဟးဃ့ၢ်မှံဟးဖျိး၀ဲတုၤလၢခဲအံၤတစုန့ၣ်လီၤႉ