Home တၢ်ကစီၣ် တၢ်ဟးဆါလံာ်ဟးထီၣ်က့ၤလီၤလဲးမးလၢလူၢ်ပျဲၢ်ဒဲပၠၣ်သ၀ီပူၤ

တၢ်ဟးဆါလံာ်ဟးထီၣ်က့ၤလီၤလဲးမးလၢလူၢ်ပျဲၢ်ဒဲပၠၣ်သ၀ီပူၤ

378
0

လါဒံၣ်စ့ဘၢၣ် ၂ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲမဟါလါဒံၣ်စ့ဘၢၣ် ၁ သီ ဟါခီ ၆ နၣ်ရံၣ်အဆၢကတီၢ် လၢကညီကီၢ်စဲၣ်လူၢ်ပျဲၢ်ကီၢ်ဆၣ်ႇဒဲပၠၣ်ဒိဂ့ၤသ၀ီအပူၤ တၢ်ဟးဆါသ၀ီသးၦၢ်လံာ်ဟးထီၣ်က့ၤလီၤလဲးမးလၢသ၀ီဖိအအိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

လံာ်ဟးထီၣ်က့ၤလီၤလဲးမးအံၤသ၀ီသးၦၢ်တဖၣ်ဟးဆါ၀ဲလၢသ၀ီဖိအဟံၣ်ဒီး လဲးမးတဘ့ၣ်န့ၣ်ဆါ၀ဲလၢစ့ပယီၤ(၁၀၀၀)ကၠးအဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ

အ၀ဲစံး၀ဲလၢ“သ၀ီသးၦၢ်ခံဂၤဟဲဆါ၀ဲလဲးမးတဘ့ၣ်န့ၣ်(၁၀၀၀)ကၠးႇမ့ၦ့ၤဃာ်တဟံၣ်တဘ့ၣ်န့ၣ် က့ၤကူကဒါလၢအသီ၀ံၤသူကဒါန့ၢ်လီၤႉ ယသံကွၢ်အ၀ဲသ့ၣ်မ့ဟးထီၣ်လၢတၢ်ချၢလဲးမးမ့တပၣ်ဘၣ်န့ၣ် ကဘၣ်မနုၤလဲၣ်န့ၣ် တက့ၤစံးဆၢတၢ်နီတမံၤဘၣ်ႉ အပူၤကွံာ်လၢညါခိ၀ံၣ်အခါကလဲၤလၢဖၣ်အၣ်အဂီၢ်လဲၤကွဲးလဲးမးန့ၣ်တဘၣ်ဟ့ၣ်စ့ဘၣ်”အဂ့ၢ်န့ၣ် စံး၀ဲန့ၣ်လီၤႉ

ခီဖျိသ၀ီသးၦၢ်လၢကီၢ်ဆၣ်သုးကီၣ်ကးသးၦၢ်၀ဲၤဒၢးတီၣ်ထီၣ်၀ဲအံၤနဲၣ်လီၤ၀ဲအဃိ ဘၣ်တၢ်ဟးဆါ၀ဲလံာ်ဟးထီၣ်က့ၤလီၤလဲးမးသ့ၣ်တဖၣ်အံၤအသိး လူၢ်ပျဲၢ်၀့ၢ်(လ၀က)စ့ၢ်ကီး နဲၣ်လီၤ၀ဲလၢတၢ်ကဘၣ်မၤလဲးမးအံၤအဂ့ၢ်န့ၣ် ၦၤလၢအဘူးဒီးသ၀ီသးၦၢ်တဖၣ်စံး၀ဲန့ၣ်လီၤႉ

လၢန့ၣ်အမဲာ်ညါဒဲပၠၣ်ဒိဂ့ၤသ၀ီဒီးလူၢ်ပျဲၢ်၀့ၢ်အံၤအဘၢၣ်စၢၤအိၣ်ထဲ(၁)မံးလာ်ဘျဲၣ်လီၤဒီး တၢ်မ့လဲၤလၢလူၢ်ပျဲၢ်၀့ၢ်တဘျီလၢ်လၢ်န့ၣ်ကဘၣ်စိာ်ဃုာ်၀ဲဒီးလံာ်ဟးထီၣ်က့ၤလီၤလဲးမးအံၤန့ၣ် သ၀ီသးၦၢ်နဲၣ်လီၤဃာ်၀ဲန့ၣ်လီၤႉ တၢ်ဟးဆါသ၀ီသးၦၢ်လံာ်ဟးထီၣ်က့ၤလီၤလဲးမးဒ်အံၤမ့ၢ်၀ဲထဲလူၢ်ပျဲၢ်ကီၢ်ဆၣ်ပူၤ ဒဲပၠၣ်ဒိဂ့ၤသ၀ီတတီၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

အပူၤကွံာ်လၢညါတၢ်သမံသမိးအလီၢ်လၢအအိၣ်ဖဲလူၢ်ပျဲၢ်၀့ၢ်ဒီးဒဲပၠၣ်သ၀ီအဘၢၣ်စၢၤအံၤစ့ၢ်ကီး တကီၢ်ခါခဲအံၤပယီၤသုးတဖၣ်ပာ်လီၤ၀ဲတၢ်သမံသမိးအလီၢ်ဒီးသမံသမိးတၢ်ဟဲအါထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ