Home တၢ်ကစီၣ် အ့ရှါကျဲမုၢ်ဖီခိၣ် ဒုၣ်ဒါစူးကါ၀ဲကမျၢၢ်သိလ့ၣ်လၢအသုးဂ့ၢ်၀ီတၢ်မၤအဃိ KNU နဲၣ်လီၤဒုးသ့ၣ်ညါကမျၢၢ်လၢကလူၤပိာ်မၤထွဲတၢ်သိၣ်တၢ်သီတဖၣ်

အ့ရှါကျဲမုၢ်ဖီခိၣ် ဒုၣ်ဒါစူးကါ၀ဲကမျၢၢ်သိလ့ၣ်လၢအသုးဂ့ၢ်၀ီတၢ်မၤအဃိ KNU နဲၣ်လီၤဒုးသ့ၣ်ညါကမျၢၢ်လၢကလူၤပိာ်မၤထွဲတၢ်သိၣ်တၢ်သီတဖၣ်

426
0

လါဒံၣ်စ့ဘၢၣ် ၂၈ သီႇ ၂၀၂၁ နံၣ်ႇ ခ့ၣ်အဲးစံၣ်

ကညီဒီကလုာ်စၢဖှိၣ်ကရၢ-KNU သုးက့(၇)ဒီးသုးက့(၆)အဘၢၣ်စၢၤ ကီးတရံး-မၠၣ်၀တံၣ်အ့ရှါကျဲမုၢ်ဖီခိၣ်အံၤ ခီဖျိပယီၤသုးစူးကါ၀ဲကမျၢၢ်အသိလ့ၣ်လၢအသုးဂ့ၢ်၀ီတၢ်မၤအဃိ ဖဲမဟါလါဒံၣ်စ့ဘၢၣ် ၂၇ သီအနံၤ ခ့ၣ်အဲၣ်ယူၣ်လီၢ်ခၢၣ်သးထုးထီၣ်နဲၣ်လီၤကမျၢၢ်လၢကလူၤပိာ်မၤထွဲတၢ်သိၣ်တၢ်သီ(၄)ထံၣ်န့ၣ်လီၤႉ

တကီၢ်ခါခဲအံၤခီဖျိပယီၤသုးမီၤစိရိၤအံၤစူးကါ၀ဲဒၣ်ကမျၢၢ်သိလ့ၣ်လၢအသုးဂ့ၢ်၀ီတၢ်မၤအဃိ ခ့ၣ်အဲၣ်ယူၣ်လီၢ်ခၢၣ်သး နဲၣ်လီၤဒုးသ့ၣ်ညါကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)လၢကနဲၣ်လီၤဒုးသ့ၣ်ညါက့ၤဟီၣ်က ၀ီၤသုးက့/သုးရ့ၣ်ၦၤဘၣ်မူဘၣ်ဒါတဖၣ်လၢကဒုးသ့ၣ်ညါဘၣ်ကမျၢၢ်လၢကလူၤပိာ်မၤထွဲတၢ်သိၣ်တၢ်သီတဖၣ်အဂ့ၢ်န့ၣ် ပာ်ဖျါ၀ဲန့ၣ်လီၤႉ

KNU လီၢ်ခၢၣ်သးကမံးတံာ်ပဒိၣ်စီၤတီနံစံး၀ဲလၢ “ပယီၤသုးတဖၣ်ဟဲထီၣ်ဒီးစူးကါ၀ဲဒၣ်ကမျၢၢ်သိလ့ၣ်ႇကးဘၢသိလ့ၣ်ဒီးတၢ်ခိၣ်ဒုး(တၤလပၣ်)အဃိ ပၦၤသုးဖိလၢအိၣ်တၢ်မဲာ်ညါသ့ၣ်တဖၣ်မၤဘၣ်ကီခဲ၀ဲလီၤႉ မၤ၀ဲဒီးဟဲထီၣ်၀ဲဒ်အံၤတုၤလၢမၠၣ်၀တံၣ်န့ၣ်အိၣ်ခံဘျီလံလီၤႉ ဆၢကတီၢ်ခဲအံၤကမျၢၢ်ထံဖိကီၢ်ဖိတဖၣ်မ့တဟးထီၣ်က့ၤလီၤဘၣ်န့ၣ်အဂ့ၤကတၢၢ်လီၤႉ အဲၣ်ဒိးတဲကမျၢၢ်တဖၣ်လၢမ့လဲၤထီၣ်က့ၤလီၤန့ၣ်ဆိကမိၣ်လီၤတံၢ်လီၤဆဲး၀ံၤမးလဲၤအီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

တၢ်သိၣ်တၢ်သီလၢ(KNU)လီၢ်ခၢၣ်သးနဲၣ်လီၤ၀ဲ ၄ ထံၣ်န့ၣ်မ့ၢ်၀ဲ ကဘၣ်အိးထီၣ်သိလ့ၣ်ပဲတြီဖဲလဲၤထီၣ်က့ၤလီၤအဆၢကတီၢ်ႇ ကဘၣ်ဒိးသမံသမိးသးတဘျီလၢ်လၢ်ဖဲ(KNLA)ၦၤဘၣ်မူဘၣ်ဒါသမံသမိး၀ဲအဆၢကတီၢ်ႇ တဘၣ်ကျၢၢ်ဘၢဃာ်သိလ့ၣ်ဒီးတၢ်ခိၣ်ဒုး(တၤလပၣ်)ဘၣ်ႇတဘၣ်တီဒုၣ်ဒါသုးဒီးဒုးယၤပီးလီသ့ၣ်တဖၣ်ဘၣ်န့ၣ်လီၤႉ

တၢ်သိၣ်တၢ်သီလၢတၢ်ပာ်လီၤ၀ဲသ့ၣ်တဖၣ်အံၤ ၦၤနီသိလ့ၣ်ဖိတဖၣ်ကဘၣ်လူၤပိာ်မၤထွဲ၀ဲတုၤလီၤတီၤလီၤကိးဂၤဒဲးဒီး မ့တလူၤပိာ်မၤထွဲဘၣ်န့ၣ်တၢ်ကဟံးဂ့ၢ်၀ီတုၤလီၤတီၤလီၤအဂ့ၢ်န့ၣ် လံာ်တၢ်နဲၣ်လီၤအပူၤပာ်ဖျါ၀ဲန့ၣ်လီၤႉ

စးထီၣ်ဖဲအပူၤကွံာ်လါဒံၣ်စ့ဘၢၣ် ၁၅ သီအနံၤန့ၣ် ခီဖျိ သုးမီၤစိရိၤအသုးနုာ်လီၤဖီၣ်၀ဲဘျီၣ်ဒိၣ်ခၢၣ်စးဒီးကမျၢၢ်ထံဖိကီၢ်ဖိတဖၣ်လၢလ့က့ၣ်ကီာ်၀့ၢ်သီပူၤတၢ်ဂ့ၢ်အဃိ ပယီၤသုးအံၤတၢ်ခးလိာ်သးစးထီၣ်ဟဲကဲထီၣ်၀ဲဒီးဟီၣ်က၀ီၤ(KNLA)အၦၤတဖၣ်န့ၣ်လီၤႉ စးထီၣ်ဖဲန့ၣ်တုၤလၢခဲအံၤတစုတၢ်ဒုးကဲထီၣ်၀ဲကိးမုၢ်နံၤဒဲးဃၣ်ဃၣ်ညါအသိး ပယီၤသုးမီၤစိရိၤအကဘီယူၤဟဲကွံာ်လီၤမ့ၣ်ပိၢ်တစှၤန့ၢ်ဒံး ၄ ဘျီလံဘၣ်န့ၣ်လီၤႉ

လၢန့ၣ်အမဲာ်ညါခီဖျိပယီၤသုးမီၤစိရိၤအကဘီယူၤဟဲကွံာ်လီၤမ့ၣ်ပိၢ်ကိးမုၢ်နံၤဒဲးအဃိ လီၢ်က၀ီၤကမျၢၢ်အဟံၣ်အဃီတဖၣ်ဟးဂီၤ၀ဲဒၣ်အသိး ကမျၢၢ်ထံဖိကီၢ်ဖိလၢကအထိဘၣ်လဲၤဃ့ၢ်အိၣ်ကဒု၀ဲဒၣ်လၢကီၢ်ကၠီၣ်တဲၣ်တကပၤဒီး ခီဖျိပယီၤသုးတၢ်ဘၣ်ဒိဘၣ်ထံးအါအဃိမၤၦဲၤထီၣ်အသုးဂံၢ်ဘါကိးမုၢ်ဒဲးဃၣ်ဃၣ်ညါအဂ့ၢ်န့ၣ် သ့ၣ်ညါဘၣ်န့ၣ်လီၤႉ