Home တၢ်ကစီၣ် ကီၢ်သူလ့ၤတၢ်ပၢဟီၣ်က၀ီၤပူၤၦၤဃ့ၢ်မှံဟးဖျိးအနီၣ်ဂံၢ်ဟဲအါထီၣ်

ကီၢ်သူလ့ၤတၢ်ပၢဟီၣ်က၀ီၤပူၤၦၤဃ့ၢ်မှံဟးဖျိးအနီၣ်ဂံၢ်ဟဲအါထီၣ်

413
0

လါယနူၤအါရံၤ ၁၉ သီႇ ၂၀၂၂ နံၣ်ႇ ခ့ၣ်အဲးစံၣ်

ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤတဖၣ်အပူၤ တကီၢ်ခါခဲအံၤၦၤဃ့ၢ်မှံဟးဖျိးအနီၣ်ဂံၢ်ဟဲအါထီၣ်၀ဲ(၅၀ႇ၀၀၀)ဘျဲၣ်အဂ့ၢ်န့ၣ် ခ့ၣ်အဲၣ်ယူၣ်တၢ်ကစီၣ်ဒီးတၢ်ဘိးဘၣ်ရၤလီၤ၀ဲၤကျိၤထုးထီၣ်ဘိးဘၣ်ရၤလီၤ၀ဲဖဲတနံၤအံၤလါယနူၤအါရံၤ ၁၉ သီအနံၤန့ၣ်လီၤႉ

ၦၤဃ့ၢ်မှံဟးဖျိးသ့ၣ်တဖၣ်အံၤ ခီဖျိပယီၤသုးမီၤစိရိၤအကဘီယူၤဟဲကွံာ်လီၤမ့ၣ်ပိၢ်ဒီးခးလီၤနါစိၤကျိဖးဒိၣ်တဖၣ်အဃိ မ့ၢ်ၦၤသ့ၣ်တဖၣ်လၢအဃ့ၢ်ထီၣ်၀ဲလၢတကီၢ်ခါခဲအံၤသ့ၣ်တဖၣ်ဒီး ကီၢ်သူလ့ၤတၢ်ပၢဟီၣ်က၀ီၤပူၤ လီၢ်က၀ီၤကမျၢၢ်တကလီၢ်ဘျဲၣ်စ့ၢ်ကီး ဘၣ်အိၣ်၀ဲလၢတၢ်ပျံၤတၢ်ဖုးတၢ်ဘၣ်ယိၣ်ပူၤအဂ့ၢ်န့ၣ် ခ့ၣ်အဲၣ်ယူၣ်လံာ် တၢ်ဘိးဘၣ်ရၤလီၤအပူၤပာ်ဖျါ၀ဲန့ၣ်လီၤႉ

ၦၤဃ့ၢ်မှံဟးဖျိးလၢအဟဲအါထီၣ်အံၤမ့ၢ်၀ဲ(သုးက့ ၆)ဒူပျာ်ယာ်ကီၢ်ရ့ၣ်ဒီး(သုးက့ ၅)မုၢ်တြီၢ် ကီၢ်ရ့ၣ်တဖၣ်အါကတၢၢ်လီၤအသိး လၢ(သုးက့ ၁)ဒူသထူၣ်ကီၢ်ရ့ၣ်ႇ(သုးက့ ၃)ချၢၣ်လွံၢ်ထူၣ်ကီၢ်ရ့ၣ်ႇ(သုးက့ ၄)ဘျံးဒ၀ဲၢ်ကီၢ်ရ့ၣ်တဖၣ်အပူၤစ့ၢ်ကီး ၦၤဃ့ၢ်မှံဟးဖျိးအိၣ်လၢအကထိညါအဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ

ဘၣ်ထွဲဒီးၦၤဃ့ၢ်မှံဟးဖျိးတၢ်အိၣ်သးအံၤ ကညီဂ့ၢ်၀ီခွဲးယာ်ကရူၢ်(KHRG)ၦၤကတိၤတၢ်ပၢ စီၤနဒၣ်ဆူ စံး၀ဲလၢ“ၦၤဃ့ၢ်မှံဟးဖျိးအနီၣ်ဂံၢ်လၢခ့ၣ်အဲၣ်ယူၣ်တီၣ်ထီၣ်၀ဲခဲအံၤသ့ၣ်တဖၣ်န့ၣ် မ့ၢ်၀ဲဒၣ်ၦၤစံၣ်မှံဟးဖျိးလၢတကီၢ်ခါခဲအံၤအနီၣ်ဂံၢ်မီၤနီၤႉ တပၣ်ဃုာ်အပူၤကွံာ်လါအ့ဖြ့ၣ်အနီၣ်ဂံၢ်ဒံးဘၣ်ႉ မ့ပာ်ဖှိၣ်ဃုာ်ဒီးၦၤစံၣ်အနီၣ်ဂံၢ်လၢညါတဖၣ်ဒု ထဲ(သုးက့ ၅)တဘ့ၣ်အပူၤန့ၣ် ၦၤဃ့ၢ်မှံဟးဖျိးအိၣ်လၢ(၅)ကလးဘျဲၣ်ညါလီၤႉ မ့ပာ်ဖှိၣ်ကီၢ်ရ့ၣ်ခဲလၢာ်ဒုကအိၣ်တကလီၢ်ဆူဖီခိၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

လၢန့ၣ်အမဲာ်ညါ ခ့ၣ်အဲၣ်ယူၣ်တၢ်ပၢဟီၣ်က၀ီၤပူၤၦၤဃ့ၢ်မှံဟးဖျိးတနီၤန့ၣ် လဲၤဃ့ၢ်အိၣ်ကဒုသးလၢအဘူးတံၢ်အဟံၣ်အိၣ်၀ဲအသိး လဲၤစံၣ်အိၣ်လၢၦၢ်ပူၤစ့ၢ်ကီးအိၣ်၀ဲအဃိ ၦၤဃ့ၢ်မှံဟးဖျိးအနီၣ်ဂံၢ်လၢတၢ်တထၢဘၣ်စရီဒံးဘၣ်အိၣ်ဒံး၀ဲအဂ့ၢ်န့ၣ် စီၤနဒၣ်ဆူစံးအါထီၣ်၀ဲန့ၣ်လီၤႉ

တနံၣ်အံၤစးထီၣ်လၢလါယနူၤအါရံၤ ၁ သီ တုၤလၢ ၁၅ သီအနံၤ လၢ(၁၅)သီအတီၢ်ပူၤ ခ့ၣ်အဲၣ်ယူၣ် တၢ်ပၢဟီၣ်က၀ီၤ(သုးက့ ၅)မုၢ်တြီၢ်ကီၢ်ရ့ၣ်ႇဒွဲၣ်လိကီၢ်ဆၣ်ဒီးဒူပျာ်ယာ်ကီၢ်ရ့ၣ်(သုးက့ ၆)ကီးတရံးဟီၣ်က၀ီၤတဖၣ်အပူၤ ပယီၤသုးမီၤစိရိၤသူ၀ဲကဘီယူၤဒုးသုးဟဲကွံာ်လီၤမ့ၣ်ပိၢ်အိၣ်၀ဲ(၇)ဘျီဒီး ခီဖျိခးလီၤကျိဖးဒိၣ်တဖၣ်အဃိလီၢ်က၀ီၤကမျၢၢ်လၢကအလးဘၣ်ဃ့ၢ်မှံဟးဖျိး၀ဲအသိး လီၢ်က၀ီၤဖိသံ၀ဲ(၇)ဂၤႇဘၣ်ဒိ(၁၉)ဂၤဒီး ဟံၣ်ဃီတၢ်သူၣ်ထီၣ်ဟးဂီၤ၀ဲအါအါဂီၢ်ဂီၢ်စ့ၢ်ကီးအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇကညီဒီကလုာ်ဂၢၤသးကရၢ(KNDO)ဒီးပယီၤသုးမီၤစိရိၤတဖၣ်အဘၢၣ်စၢၤ လၢ(၁၅)သီအတီၢ်ပူၤတၢ်ခးလိာ်သးကဲထီၣ်(၁၈၁)ဘျီဒီး ဖဲန့ၣ်ပယီၤသုးမီၤစိရိၤတကပၤသံ၀ဲ(၁၅၉)ဂၤႇဘၣ်ဒိ(၁၀၂)ဂၤန့ၣ်လီၤႉ မ့မ့ၢ်(KNLA)ဒီး(KNDO)တကပၤဘၣ်ဟ့ၣ်လီၤကွံာ်အသးသမူ(၁၃)ဂၤႇဘၣ်ဒိ(၁၈)ဂၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ