Home တၢ်ကစီၣ် တၢ်ထုးထီၣ်လံာ်ဟ့ၣ်ပလီၢ်၀ံၤအလီၢ်ခံ KNU(သုးက့ ၅)ထီၣ်မၤရှဲကံွာ်(BGF)သုးကလၢၤတဖျၢၣ်

တၢ်ထုးထီၣ်လံာ်ဟ့ၣ်ပလီၢ်၀ံၤအလီၢ်ခံ KNU(သုးက့ ၅)ထီၣ်မၤရှဲကံွာ်(BGF)သုးကလၢၤတဖျၢၣ်

406
0

လါယနူၤအါရံၤ ၁၇ သီႇ ၂၀၂၂ နံၣ်ႇ ခ့ၣ်အဲးစံၣ်

တၢ်ထုးထီၣ်ဟ့ၣ်ပလီၢ်(BGF)လၢတဘၣ်ပာ်ဖှိၣ်မၤသကိးတၢ်ဒီးပယီၤသုးမီၤစိရိၤဘၣ်၀ံၤအလီၢ်ခံ ဖဲမဟါလါယနူၤအါရံၤ ၁၆ သီအနံၤ ကညီဒီကလုာ်စၢဖှိၣ်ကရၢ-KNU (သုးက့ ၅)စုဒုၣ်တီၤအဖီလာ်သုး ထီၣ်မၤရှဲကွံာ်(BGF)သုးကလၢၤလၢအအိၣ်ဖဲဖၣ်ပူၣ်ကီၢ်ဆၣ်ပူၤတဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

သုးကလၢၤအံၤမ့ၢ်၀ဲဒၣ်(BGF)ဘိၤမီၤခၠ့ၣ်တီခိၣ်ရိၣ်မဲသုးရ့ၣ်(၁၀၁၄)သုးကလၢၤတဖျၢၣ်လၢအအိၣ်ဖဲဖၣ်ပူၣ်ကီၢ်ဆၣ် မဲးပြံးသ၀ီပူၤဒီး ခီဖျိအ၀ဲသ့ၣ်မၤပျံၤမၤဖုးလီၢ်က၀ီၤဒူဖိသ၀ီဖိဒီးခးလီၤကျိဖးဒိၣ်တဖၣ်အဖီခိၣ် ဘၣ်တၢ်ထီၣ်ရှဲကွံာ်၀ဲဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)ဒုးယၤခိၣ် သုးခိၣ်ဒိၣ်စိ စီၤထူကဆှီ စံး၀ဲဒ်အံၤန့ၣ်လီၤႉ

“အ၀ဲသ့ၣ်မၤပျံၤမၤဖုး၀ဲသ၀ီဖိႇ၀ံၤဘျီခးလီၤနါစိၤကျိဖးဒိၣ်ဒိးလီၤမ့ၣ်ပိၢ်တဖၣ်လီၤႉ ၦၤကညီန့ၣ်ကဘၣ်မၤက့ၤၦၤကညီတၢ်မၤႇအဃိန့ၣ်အ၀ဲသ့ၣ်ခီဒုဒ်ပတဲအသိးဒ်ပမုၢ်လၢ်အသိးန့ၣ်တကဲထီၣ်ဘၣ်ႉ တကဲထီၣ်ဘၣ်အဃိန့ၣ်ဖဲမဟါသုးရ့ၣ်(၁၀၂) သုးဒ့(၄)လဲၤမၤရှဲကွံာ်၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ဖဲအပူၤကွံာ်လါယနူၤအါရံၤ ၁၂ သီအနံၤ ခ့ၣ်အဲၣ်ယူၣ်(သုးက့ ၅)ထုးထီၣ်ပာ်ဖျါဟ့ၣ်ပလီၢ်ဒံး၀ဲ(BGF)သုးလၢ လါယနူၤအါရံၤ ၁၅ သီလီၢ်ခံကတၢၢ်တဘၣ်ပာ်ဖှိၣ်မၤသကိးတၢ်ဒီးပယီၤသုးမီၤစိရိၤဘၣ်န့ၣ်လီၤႉ

တၢ်လဲၤထီၣ်ရှဲကွံာ်မဲးပြံးသုးကလၢၤအကတီၢ် တၢ်ဖီၣ်ချုးသမူန့ၢ်၀ဲ(BGF)သုးဖိတဂၤဘၣ်ဆၣ် မ့မ့ၢ်ကျိချံၦာ်သၣ်သ့ၣ်တဖၣ်တၢ်မၤန့ၢ်၀ဲဘၣ်ဒီး (BGF)လၢအဂၤသ့ၣ်တဖၣ်ဂုၤက့ၤအလီၢ်ခံန့ၣ်လီၤႉ ဖဲတၢ်နုာ်လီၤမၤရှဲကွံာ်သုးကလၢၤအဆၢကတီၢ်(KNLA)တကပၤဘၣ်ဒိ၀ဲ(၂)ဂၤဒီး မ့မ့ၢ်(BGF)သုးကလၢၤအံၤဘၣ်တၢ်ဒွဲၣ်အူကွံာ်၀ဲအဂ့ၢ်န့ၣ် သုးခိၣ်ဒိၣ်စိ စီၤထူကဆှီ စံးအါထီၣ်၀ဲန့ၣ်လီၤႉ

ပယီၤသုးဟံးန့ၢ်ဆူၣ်ကွံာ်တၢ်စိတၢ်ကမီၤ၀ံၤအလီၢ်ခံ ခ့ၣ်အဲၣ်ယူၣ်(သုးက့ ၅)စုဒုၣ်တီၤအဖီလာ်(KNLA)လဲၤထီၣ်မၤရှဲကွံာ်၀ဲ ပယီၤသုးကလၢၤဖးဒိၣ်ဒီးသုးကလၢၤဖိတနီၤလၢအအိၣ်ဖဲခ့ၣ်အဲၣ်ယူၣ်(သုးက့ ၅)ဟီၣ်က၀ီၤပူၤအိၣ်၀ဲအသိး ပယီၤသုးကလၢၤတနီၤစ့ၢ်ကီးဘၣ်တၢ်ပာ်တ့ၢ်ကွံာ်အီၤအိၣ်၀ဲအဂ့ၢ်န့ၣ် ခ့ၣ်အဲၣ်ယူၣ်တကပၤစံး၀ဲန့ၣ်လီၤႉ

ဒ်န့ၣ်အသိးအပူၤကွံာ်စ့ၢ်ကီးတၢ်ထီၣ်မၤရှဲကွံာ်(BGF)သုးကလၢၤဖိတနီၤအိၣ်၀ဲဒီး တၢ်ထီၣ်မၤရှဲကွံာ်သုးကလၢၤဒ်အံၤမ့ၢ်၀ဲဒၣ်အဆိကတၢၢ်တဘျီ လၢခ့ၣ်အဲၣ်ယူၣ်ထုးထီၣ်လံာ်ဟ့ၣ်ပလီၢ်၀ံၤအလီၢ်ခံအံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ