Home တၢ်ကစီၣ် ပယီၤသုးနုာ်လီၤမၤဟးဂီၤတၢ်ဖိတၢ်လံၤလၢနံၣ်ပိဖီၣ်ဒ့ရှၢၣ်မၤဘူၣ်လီၤ၀ဲဖဲလ့က့ၣ်ကိာ်၀့ၢ်သီပူၤတဖၣ်

ပယီၤသုးနုာ်လီၤမၤဟးဂီၤတၢ်ဖိတၢ်လံၤလၢနံၣ်ပိဖီၣ်ဒ့ရှၢၣ်မၤဘူၣ်လီၤ၀ဲဖဲလ့က့ၣ်ကိာ်၀့ၢ်သီပူၤတဖၣ်

231
0

လါယနူၤအါရံၤ ၃ သီႇ ၂၀၂၂ နံၣ်ႇ ခ့ၣ်အဲးစံၣ်

မီၤစိရိၤအသုးလၢအအိၣ်ဆီလီၤသးဖဲမၠၣ်၀တံၣ်ကလံၤထံးလ့က့ၣ်ကိာ်၀့ၢ်သီဟီၣ်က၀ီၤလၢတၢ်ဒုးကဲထီၣ်အလီၢ်သ့ၣ်တဖၣ်အံၤနုာ်လီၤမၤဟးဂီၤကွံာ်၀ဲကၠိႇဆူၣ်ချ့တၢ်သူၣ်ထီၣ်ဒီးကၠိတၢ်ပီးတၢ်လီလၢနံၣ်ပီဖီၣ်ဒ့ရှၢၣ်မၤဘူၣ်လီၤ၀ဲဖဲလ့က့ၣ်ကီာ်၀့ၢ်သီပူၤတဖၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤတၢ်ကစီၣ်အအိၣ်န့ၣ်လီၤႉ

လ့က့ၣ်ကိာ်ဟီၣ်က၀ီၤပူၤလၢတၢ်ဒုးကဲထီၣ်ဒံး၀ဲဒၣ်အံၤ ပယီၤသုးလၢအနုာ်လီၤဟူးဂဲၤဖဲန့ၣ်သ့ၣ်တဖၣ် နုာ်လီၤမၤဟးဂီၤကွံာ်၀ဲဒၣ်ထံဖိကီၢ်ဖိကမျၢၢ်အဟံၣ်အဃီႇကၠိဆူၣ်ချ့တၢ်သူၣ်ထီၣ် လၢယပၣ်နံၣ်ပိဖီၣ်ဒ့ရှၢၣ်ဆီၣ်ထွဲမၤစၢၤ၀ဲသ့ၣ်တဖၣ်ဒီး ကၠိတၢ်ပီးတၢ်လီႇခီၣ်ဖၠူထၢၣ်ဆဲးဖီကဟၣ်ႇ၀ဲၤဒၢးတၢ်ဖိတၢ်လံၤဒီးတၢ်ဖိတၢ်လံၤလၢတၢ်သူ၀ဲသ့ၣ်တဖၣ်အဂ့ၢ်န့ၣ် လီၢ်က၀ီၤၦၤဃ့ၢ်မှံဟးဖျိးဖိလၢအက့ၤလၢအဟံၣ်တဖၣ်စံး၀ဲဒၣ်န့ၣ်လီၤႉ

လ့ၣ်က့ၣ်ကိာ်ဆူၣ်ချ့ၦၤမၤတၢ်ဖိတဂၤစံး၀ဲလၢ“(BGF)စီၤမိၣ်သိၤတဲ၀ဲလၢပက၀ီၤဒ့ဖိတဖၣ်က့ၤအိၣ်လၢက၀ီၤဒ့ပူၤန့ၢ်လံမီၤနီၤႉ ပဟဲက့ၤဘျီဒုခိ၀ံၣ်စဲထၢၣ်လီၢ်လၢပမၤဃာ်လၢကၠိပူၤတဖၣ် ဆူၣ်ချ့တၢ်ဖိ တၢ်လံၤတဖၣ်တၢ်မၤဟးဂီၤ၀ဲခဲလၢာ်လီၤႉ ကသံၣ်ကသီတနီၤန့ၣ်တအိၣ်လၢၤဘၣ်ႉ ကသံၣ်ကသီတနီၤန့ၣ်ဘၣ်တၢ်မၤဟးဂီၤကွံာ်၀ဲန့ၣ်ပသ့ၣ်ညါလီၤႉ လၢက၀ီၤဒ့ပူၤနါက့တၢ်နုာ်လီၤဘၢၣ်ဖျိ၀ဲၦၤဟံၣ်လီၤႉ ကျးလၢအဆါတၢ်ဖိတၢ်လံၤတၢ်အီၣ်တၢ်အီတဖၣ်န့ၣ်ဟံ၀ဲခဲလၢာ်ႇမ့မ့ၢ်ကျးတၢ်ဖိတၢ်လံၤခီန့ၣ်မၤဟးဂီၤ၀ဲခဲလၢာ်လီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

လ့က့ၣ်ကိာ်၀့ၢ်သီတကးဘၣ်အမဲာ်ညါလၢထံမဲး၀ါခံႇပဟံၣ်ကျီးသ၀ီတကပၤန့ၣ်စ့ၢ်ကီး တီၢ်သဲၣ်ဖးကမျၢၢ်အဟံၣ်အကျးခဲလၢာ်ဒီးဟံးန့ၢ်၀ဲတၢ်ဖိတၢ်လံၤစ့ၢ်ကီးအဂ့ၢ်န့ၣ် လ့က့ၣ်ကိာ်ဆူၣ်ချ့ၦၤမၤတၢ်ဖိတဂၤဃီ၀ဲန့ၣ်စံးအါထီၣ်၀ဲဒၣ်န့ၣ်လီၤႉ

သုးမီၤစိရိၤဘိးဘၣ်ရၤလီၤ၀ဲလၢဖီၣ်ဂၢၢ်ဃာ်၀ဲ KNU-ကညီဒီကလုာ်စၢဖှိၣ်ကရၢ သုးက့(၆) လ့က့ၣ်ကိာ်ဟီၣ််က၀ီၤန့ၢ်လံဘၣ်ဆၣ် မ့မ့ၢ်လၢဟီၣ်က၀ီၤပူၤတုၤလၢတနံၤအံၤလါယနူၤအါရံၤ ၃ သီတစု ခံခီခံကပၤတၢ်ဒုးကဲထီၣ်ဒံး၀ဲကွ့ၢ်ကွ့ၢ်အဂ့ၢ်န့ၣ် ၦၤဃ့ၢ်မှံဟးဖျိးလၢအက့ၤသ့ၣ်တဖၣ်စံး၀ဲန့ၣ်လီၤႉ

တၢ်ဒုးကဲထီၣ်လၢအသီ(၂၀)အတီၢ်ပူၤ ဒူသ၀ီ(၆)ဖျၢၣ်ဃုာ်ဒီးလ့က့ၣ်ကိာ်ဟီၣ်က၀ီၤ က၀ီၤဒ့(၆)ဘ့ၣ် ကမျၢၢ်ၦၤဃ့ၢ်မှံဟးဖျိးအိၣ်၀ဲ(၁၅ႇ၀၀၀)ဘျဲၣ်အကျါ ခီဖျိသုးခိးကီၢ်ဆၢ(BGF)ၦၤဘၣ်မူဘၣ်ဒါသုးခိၣ်ဒိၣ်ဖိစီၤမိၣ်သိၤအတၢ်ရဲၣ်တၢ်ကျဲၤက့ၤဆှၢ၀ဲအဃိ လီၢ်က၀ီၤကမျၢၢ်အဂၤ(၃၀၀)ဃၣ်ဃၣ်ဟဲက့ၤအိၣ်လၢအတၢ်လီၢ်တၢ်ကျဲန့ၣ်လီၤႉ

ဘၣ်ဆၣ်သနါက့ၦၤတနီၤက့ၤကွၢ်၀ဲအတၢ်လီၢ်တၢ်ကျဲဒီးထံၣ်၀ဲလၢတၢ်ဟးဂုာ်ဟးဂီၤႇခံခီခံကပၤတၢ်ခးလိာ်သးအိၣ်ဒံး၀ဲအဃိ ဟဲက့ၤအိၣ်ကဒုသးဖဲၦၤဃ့ၢ်မှံဟးဖျိးအိၣ်တၢ်လီၢ်လၢအအိၣ်ဘူးဖဲန့ၣ်သ့ၣ်တဖၣ်အိၣ်ဒံး၀ဲအဂ့ၢ်န့ၣ် ၦၤလၢအမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ