Home တၢ်ကစီၣ် ကအိၣ်ဆၢထၢၣ်ဒီးဂဲၤလိာ်တၢ်လၢကညီဒီတကလုာ်အတၢ်ဘၣ်ဘျုးအဂီၢ်အဂ့ၢ် ကရၢခိၣ်စီၤမူးတူစ့ဖိဆီၣ်တခူထီၣ်၀ဲ

ကအိၣ်ဆၢထၢၣ်ဒီးဂဲၤလိာ်တၢ်လၢကညီဒီတကလုာ်အတၢ်ဘၣ်ဘျုးအဂီၢ်အဂ့ၢ် ကရၢခိၣ်စီၤမူးတူစ့ဖိဆီၣ်တခူထီၣ်၀ဲ

414
0

လါဖ့ၤဘြူၤအါရံၤ ၇ သီႇ ၂၀၂၂ နံၣ်ႇ ခ့ၣ်အဲးစံၣ်

ဖဲလါဖ့ၤဘြူၤအါရံၤ ၅ သီအနံၤ တၢ်သူၣ်ထီၣ်ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢၦဲၤထီၣ်(၇၅)နံၣ်အမုၢ်နံၤအပူၤ ခ့ၣ်အဲၣ်ယူၣ်အံၤဘၣ်တၢ်ကရၢကရိသူၣ်ထီၣ်အီၤလၢကညီဒီကလုာ်အဃိ ကဘၣ်အိၣ်ဆၢထၢၣ်ဒီးဂဲၤလိာ်တၢ်လၢကညီဒီတကလုာ်အတၢ်ဘၣ်ဘျုးအဂီၢ်အဂ့ၢ်န့ၣ် ကရၢခိၣ်သုးခိၣ်ကျၢၢ်စိ စီၤမူးတူစ့ဖိအလံာ်ဟ့ၣ်ယုၢ်အပူၤ စံး၀ဲန့ၣ်လီၤႉ

တၢ်ကရၢကရိဒုးအိၣ်ထီၣ်ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢမုၢ်နံၤၦဲၤထီၣ်(၇၅)၀ီတ၀ီအဖီခိၣ် ကရၢခိၣ်စီၤမူးတူစ့ဖိအလံာ်ဟ့ၣ်ယုၢ်အပူၤစံး၀ဲလၢ မ်ပကဟံးန့ၢ်သကိးမူဒါဒီး ဂဲၤလိာ်ဆီၣ်ထွဲသကိးခ့ၣ်အဲၣ်ယူၣ်-ညီဒီကလုာ်စၢဖှိၣ်ကရၢအထံရူၢ်ကီၢ်သဲးတၢ်အိၣ်ဆၢထၢၣ်လၢပသနၢၣ်ဒၣ်ပ၀ဲစုာ်စုာ်တုၤလၢကညီကလုာ်အထံရူၢ်ကီၢ်သဲးတၢ်ပညိၣ်ကွၢ်စိလၢထီၣ်ၦဲၤထီၣ်၀ဲတစုန့ၣ်အဂ့ၢ်န့ၣ် ဟ့ၣ်သဆၣ်ထီၣ်၀ဲခိၣ်နၢ်ႇသိၣ်ဒူဒီးၦၤမၤသကိးတၢ်တဖၣ်န့ၣ်လီၤႉ

ခ့ၣ်အဲၣ်ယူၣ်အတၢ်ပညိၣ်အခိၣ်သ့ၣ်န့ၣ်မ့ၢ်တၢ်ဂဲၤလိာ်မၤလၢၦဲၤကညီထံရူၢ်ကီၢ်သဲးတၢ်ပညိၣ်လၢအမ့ၢ်၀ဲတၢ်သူၣ်ထီၣ်ဖဲၣ်ဒရဲၣ်ဒံၣ်မိၣ်ခြ့ၣ်စံၣ်ကီၢ်စၢဖှိၣ်လၢအုၣ်ကီၤ၀ဲဒံၣ်မိၣ်ခြ့ၣ်စံၣ်ခွဲးယာ်ႇကလုာ်တၢ်ထဲသိးတုၤသိးဒီးတၢ်စံၣ်ညီၣ်ပၢလီၤသးခွဲးယာ်အလၢအၦဲၤလၢၦၤကိးကလုာ်ဒဲးအဂီၢ်ဒီး လၢတၢ်မၤလၢၦဲၤတၢ်ခွဲးတၢ်ယာ်တဖၣ်အံၤကန့ၢ်ကသ့၀ဲအဂီၢ် တၢ်ကဘၣ်သူၣ်ထီၣ်တၢ်မုာ်တၢ်ခုၣ်အမ့ၢ်အတီလၢအိၣ်ဒီးတၢ်ထဲသိးတုၤသိးလၢတၢ်ထံၣ်လိာ်စံးကတိၤသကိးထံရူၢ်ကီၢ်သဲးတၢ်မၤအပူၤန့ၣ်မ့ၢ်တၢ်ဂ့ၢ်လၢအကါဒိၣ်ကတၢၢ်လီၤအဂ့ၢ်န့ၣ် ကရၢခိၣ်အလံာ်ဟ့ၣ်ယုၢ်အပူၤစံး၀ဲန့ၣ်လီၤႉ

လါဖ့ၤဘြူၤအါရံၤ ၅ သီအနံၤ တၢ်ကရၢကရိသူၣ်ထီၣ်ကညီဒီကလုာ်စၢဖှိၣ်ကရၢမုၢ်နံၤ(Karen National Union Day)ၦဲၤထီၣ်(၇၅)၀ီတ၀ီတၢ်ရဲၣ်တၢ်ကျဲၤမူးအံၤ ဘၣ်တၢ်မၤအီၤဖဲခ့ၣ်အဲၣ်ယူၣ်ကီၢ်သူလ့ၤတၢ်ပၢဟီၣ်က၀ီၤတၢ်လီၢ်တတီၤဒီး ဖဲန့ၣ်ကရၢခိၣ်(၂)ပဒိၣ်စီၤကွဲၤထူ၀့ႇ သုးရိၣ်မဲခိၣ်ကျၢၢ် သုးခိၣ်ကျၢၢ်စိ စီၤကၠီၤနံၤ ဃုာ်ဒီးလီၢ်ခၢၣ်သးႇကီၢ်ရ့ၣ်အပတီၢ်ပၢပြးဒီး(KNLA)သုးခိၣ်သုးနၢ်ႇ ကညီသးစၢ်ႇလီၢ်က၀ီၤကမျၢၢ်ပာ်ဖှိၣ်ခဲလၢာ်(၂၀၀)ဘျဲၣ်ဟဲထီၣ်မၤလၤကပီၤ၀ဲအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ

တၢ်ရဲၣ်တၢ်ကျဲၤအပူၤ တၢ်ဟ့ၣ်ထီၣ်တၢ်ယူးယီၣ်ဆူကညီဒီကလုာ်နီၢ်တယၢ်ႇ တၢ်ဟ့ၣ်ထီၣ်တၢ်ယူးယီၣ်ဆူကညီမၤထူရၤခိၣ်နၢ်လၢအဟ့ၣ်လီၤကွံာ်အသးသမူတဖၣ်ႇ တၢ်ဖးဖျါထီၣ်ခ့ၣ်အဲၣ်ယူၣ်ကရၢခိၣ်အလံာ်ဟ့ၣ်ယုၢ်ႇတၢ်ရှဲပၠး၀ဲခ့ၣ်အဲၣ်ယူၣ်မုၢ်နံၤ(KNU Day)ဟဲကဲထီၣ်သးအဂ့ၢ်အကျိၤတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဒ်န့ၣ်အသိးတၢ်သူၣ်ထီၣ်ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢမုၢ်နံၤၦဲၤထီၣ်(၇၅)၀ီတ၀ီမူးတၢ်ရဲၣ်တၢ်ကျဲၤအံၤ ဘၣ်တၢ်မၤလၤကပီၤစ့ၢ်ကီး၀ဲလၢခ့ၣ်အဲၣ်ယူၣ်ဘၣ်ထွဲကီၢ်ရ့ၣ်ႇသုးက့ႇကီၢ်ဆၣ်တဖၣ်အပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဒ်ခ့ၣ်အဲၣ်ယူၣ်တၢ်သူၣ်ထီၣ်ဆီလီၤအိၣ်ပာ်အသိးန့ၣ် ခ့ၣ်အဲၣ်ယူၣ်အံၤ ဘၣ်တၢ်သူၣ်ထီၣ်အီၤလၢကီၢ်ရ့ၣ်(၇)ဘ့ၣ်ႇသုးက့(၇)ဘ့ၣ်ဒီး ဘၣ်တၢ်ပၢဆှၢအီၤလွံၢ်ပတီၢ်ဒ်အမ့ၢ် လီၢ်ခၢၣ်သးႇကီၢ်ရ့ၣ်ႇကီၢ်ဆၣ်ႇဒူသ၀ီအပတီၢ်တဖၣ်န့ၣ်လီၤႉ

လၢန့ၣ်အမဲာ်ညါ၀ဲၤကျိၤအိၣ်၀ဲ(၁၄)ခါလၢအမ့ၢ်သ့ၣ်ၦၢ်၀ဲၤကျိၤႇသဲစး၀ဲၤကျိၤႇစံာ်ၦဲၤသူၣ်ဖျးႇထံလီၢ်ကီၢ်ပူၤဒီးတၢ်ဘူၣ်တၢ်ဘါ၀ဲၤကျိၤႇထံဂုၤကီၢ်ဂၤ၀ဲၤကျိၤႇတၢ်ဒီသဒၢႇဘၣ်ဖီၣ်မၤညၣ်၀ဲၤကျိၤႇတၢ်ကရၢကရိဒီးတၢ်ဘိးဘၣ်ရၤလီၤ၀ဲၤကျိၤႇဆူၣ်ချ့မၤစၢၤ၀ဲၤကျိၤႇကူၣ်သ့ဆဲးလၤ၀ဲၤကျိၤႇသိၣ်မှံၤဂ့ၢ်၀ီ၀ဲၤကျိၤႇခိသွဲကျိၣ်စ့၀ဲၤကျိၤႇ၀ံစိာ်တီဆှၢ၀ဲၤကျိၤဒီးစၢၢ်ထး၀ဲၤကျိၤသ့ၣ်တဖၣ်န့ၣ်လီၤႉ

ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢအံၤ ဘၣ်တၢ်ကရၢကရိသူၣ်ထီၣ်အီၤလၢကညီတၢ်ကရၢကရိ(၄)ကရၢ လၢအမ့ၢ်ဒီကလုာ်(Karen National Association-KNA)ႇ ဘူးဒးကညီဒီကလုာ်ကရၢ(Buddhist Karen National Association-BKNA)ႇ ကညီလီၢ်ခၢၣ်သးကရၢ(Karen Center Organization-KCO)ဒီးကညီသးစၢ်ကရၢ(Karen Youth Association-KYO)တဖၣ်ဖဲ(၁၉၄၇)နံၣ် လါဖ့ၤဘြူၤအါရံၤ ၅ သီအနံၤန့ၣ်လီၤႉ