Home တၢ်ကစီၣ် (သုးက့ ၅)ဟီၣ်က၀ီၤပူၤတလါအတီၢ်ပူၤ တၢ်ဒုးကဲထီၣ်(၃၂၂)ဘျီႇပယီၤသုးသံ(၁၉၄)ဂၤႇဘၣ်ဒိ(၂၀၁)ဂၤ

(သုးက့ ၅)ဟီၣ်က၀ီၤပူၤတလါအတီၢ်ပူၤ တၢ်ဒုးကဲထီၣ်(၃၂၂)ဘျီႇပယီၤသုးသံ(၁၉၄)ဂၤႇဘၣ်ဒိ(၂၀၁)ဂၤ

371
0
Photo: KNLA

လါဖ့ၤဘြူၤအါရံၤ ၂ သီ၊ ၂၀၂၂ နံၣ်၊ ခ့ၣ်အဲးစံၣ်

မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ လါယနူၤအါရံၤအတီၢ်ပူၤ တၢ်ဒုးကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးမီၤစိရိၤႇ(BGF)သုးတဖၣ်အဘၢၣ်စၢၤအိၣ်၀ဲ(၃၂၂)ဘျီဒီး ဖဲန့ၣ်ပယီၤသုးတကပၤသံ၀ဲ(၁၉၄)ဂၤႇဘၣ်ဒိ(၂၀၁)ဂၤအဂ့ၢ်န့ၣ် ခ့ၣ်အဲၣ်ယူၣ်-မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲတနံၤအံၤလါဖ့ၤဘြူၤအါရံၤ ၂ သီအနံၤန့ၣ်လီၤႉ

ဒ်မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲအသိးန့ၣ် ပယီၤသုးမီၤစိရိၤသံတဖၣ်အကျါပၣ်ဃုာ်၀ဲသုးရ့ၣ်ခိၣ်-၂(၁)ဂၤဒီး ဘၣ်ဒိအကျါပၣ်ဃုာ်၀ဲသုးရ့ၣ်ခိၣ်(၂)ဂၤႇသုးဒ့ခိၣ်(၁)ဂၤႇသုးစကီၤပြံ(၁)ဂၤန့ၣ်လီၤႉ တကးဒံးဘၣ်ပယီၤသုးမီၤစိရိၤအကသ့ၣ်သံ၀ဲ(၄)ဒုႇဘၣ်ဒိ(၄)ဒုဒီးအသိလ့ၣ်ဟးဂီၤ၀ဲ(၂၀)ခိၣ်အဂ့ၢ်န့ၣ် ပာ်ဖျါ၀ဲန့ၣ်လီၤႉ

တၢ်ဒုးကဲထီၣ်အပူၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တကပၤ ဘၣ်ဟ့ၣ်လီၤကွံာ်အသးသမူ(၃)ဂၤဒီးဘၣ်ဒိ၀ဲ(၁၂)ဂၤအဂ့ၢ်န့ၣ် မုၢ်တြီၢ်တၢ်ကစီၣ်စံး၀ဲန့ၣ်လီၤႉ

လၢန့ၣ်အမဲာ်ညါခီဖျိတၢ်ဒုးကဲထီၣ်အဃိ ပယီၤသုးမီၤစိရိၤအံၤခးလီၤ၀ဲကျိဖးဒိၣ်(၁၈၂)ဖျၢၣ်ဆူလူၤသီကီၢ်ဆၣ်ႇ ဒွဲၣ်လိကီၢ်ဆၣ်ဒီးဘုသိၣ်ကီၢ်ဟီၣ်က၀ီၤ ကမျၢၢ်တၢ်အိၣ်တၢ်ဆိးတၢ်ဖံးအီၣ်မၤအီၣ်လီၢ်ကျဲပူၤအသိး ပယီၤသုးမီၤစိရိၤကဘီယူၤဟဲကွံာ်လီၤမ့ၣ်ပိၢ်(၁၄)ဖျၢၣ်ဆူလီၢ်က၀ီၤဒူသ၀ီတၢ်အိၣ်တၢ်ဆိးလီၢ်ကျဲတဖၣ်အပူၤန့ၣ်လီၤႉ

ခီဖျိပယီၤသုးမီၤစိရိၤဒီးကညီသုးခိးကီၢ်ဆၢ(BGF)သုးပာ်ဖှိၣ်တဖၣ်ခးလီၤကျိဖးဒိၣ်ဆူဒူသ၀ီပူၤအဃိ ကမျၢၢ်သံ(၅)ဂၤႇဘၣ်ဒိ၀ဲ(၁၈)ဂၤအဂ့ၢ်န့ၣ် မုၢ်တြီၢ်တၢ်ကစီၣ်အတၢ်မၤနီၣ်စရီအသိး သ့ၣ်ညါဘၣ်န့ၣ်လီၤႉ

သုးဟံးဆူၣ်ကွံာ်တၢ်စိတၢ်ကမီၤ၀ံၤအလီၢ်ခံ ခီဖျိတၢ်ဒုးတၢ်ယၤဟဲဆူၣ်ထီၣ်၀ဲလၢ(သုးက့ ၅)ဟီၣ်က၀ီၤအပူၤအဃိ ပယီၤသုးမီၤစိရိၤအၦၤသံနီၣ်ဂံၢ်ဟဲအါထီၣ်၀ဲကိးလါဒဲးအသိး ဟဲက့ၤဟ့ၣ်လီၤသးဆူခ့ၣ်အဲၣ်ယူၣ်(သုးက့ ၅)အအိၣ် အနီၣ်ဂံၢ်ဟဲအါထီၣ်၀ဲဒၣ်စ့ၢ်ကီးန့ၣ်လီၤႉ