Home တၢ်ကစီၣ် ခီဖျိတၢ်ဒုးကဲထီၣ်လၢမၠၣ်၀တံၣ်အ့ရှါကျဲအဃိ လီၢ်က၀ီၤပူၤတၢ်လုၢ်တၢ်ၦ့ၤထီၣ်အါထီၣ်ခံဆး

ခီဖျိတၢ်ဒုးကဲထီၣ်လၢမၠၣ်၀တံၣ်အ့ရှါကျဲအဃိ လီၢ်က၀ီၤပူၤတၢ်လုၢ်တၢ်ၦ့ၤထီၣ်အါထီၣ်ခံဆး

727
0
Photo: CJ

လါမးရှး ၃၁ သီႇ ၂၀၂၂ နံၣ်ႇ ခ့ၣ်အဲးစံၣ်

ခီဖျိတၢ်ဒုးကဲထီၣ်လၢမၠၣ်၀တံၣ်-ကီးတရံးအ့ရှါကျဲသီအဃိ ပနံာ်တၢ်ဖိတၢ်လံၤတဖၣ်တဟဲလီၤဆိကတီၢ်ကွံာ်အသးဒီး လၢမၠၣ်၀တံၣ်ႇကီးတရံးႇကြုၢ်တုဟီၣ်က၀ီၤအပူၤတဖၣ် တၢ်ဖိတၢ်လံၤအလုၢ်အၦ့ၤထီၣ်အါထီၣ်ခံဆးညါအဂ့ၢ်န့ၣ် ၦၤဆါကျးဖးဒိၣ်လၢလီၢ်က၀ီၤပူၤတဖၣ်စံး၀ဲန့ၣ်လီၤႉ

တခီမ့ၢ်တၢ်ဒုးစးထီၣ်ကဲထီၣ်လၢမၠၣ်၀တံၣ်-ကီးတရံးအ့ရှါကျဲသီန့ၣ် ခီဖျိပနံာ်တၢ်ဖိတၢ်လံၤ ဘၣ်ဆိကတီၢ်ကွံာ်သးအဃိ လၢလီၢ်က၀ီၤဒူသ၀ီတဖၣ်အပူၤတၢ်ဖိတၢ်လံၤအလုၢ်အၦ့ၤဒိၣ်ထီၣ်ခံဆးညါဒီး ကျးဖးဒိၣ်သ့ၣ်တဖၣ်စ့ၢ်ကီးဆါတၢ်တန့ၢ်အါအါလၢၤအဂ့ၢ်န့ၣ် ကျးဖးဒိၣ်ကစၢ်လၢအိၣ်ကြုၢ်တုသ၀ီပူၤတဂၤ စံး၀ဲဒ်အံၤန့ၣ်လီၤႉ

“တၢ်လုၢ်တၢ်ၦ့ၤဒုအၦ့ၤထီၣ်ဖးဒိၣ်ညါမီၤနီၤႉအပူၤကွံာ်စ့အကလီၢ်(၂၀)ကၠးန့ၣ်ကတြီၢ်၀ဲဒၣ်သိလ့ၣ်တခိၣ်ညါႉခဲအံၤနၦ့ၤအကလီၢ်(၅၀)ကၠးနါက့တၦဲၤသိလ့ၣ်တခိၣ်လၢၤဘၣ်ႇကတြီၢ်က့ၤထဲတ၀ာ်လီၤႉလၢညါခါသိပိအဘီန့ၣ်(၂)ကလးဘျဲၣ်လီၤႉခဲအံၤ(၄)ကလးဘျဲၣ်လံႉအပူၤကွံာ်ဒးဆံၣ်ၦဲၤၦဲၤထံကိန့ၣ်(၁၀၀၀)ကၠးလီၤႉခဲအံၤ(၂ႇ၅၀၀)ဘျဲၣ်လံလီၤႉအပူၤကွံာ်န့ၣ်ယကျးအံၤယဆါတၢ်န့ၢ်တနံၤ(၅)ကလီၢ်ဘျဲၣ်ညါႉခဲအံၤခီဖျိၦၤအိၣ်ဖဲသ၀ီပူၤတဖၣ်တဟဲၦ့ၤအီၣ်တၢ်လၢၤဘၣ်အဃိ တနံၤန့ၣ်ဆါန့ၢ်က့ၤထဲ(၂)ကလီၢ်ကၠးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

Photo: CJ

ခီဖျိတၢ်ဒုးကဲထီၣ်လၢဟီၣ်က၀ီၤပူၤအဃိ ကျဲတၢ်ဆဲးကျိးစ့ၢ်ကီးပတုာ်ကွံာ်အသးဒီး ပနံာ်တၢ်ဖိတၢ်လံၤလဲၤလီၤတအိၣ်လၢၤဘၣ်အဃိ တၢ်အီၣ်တၢ်အီႇတၢ်ဖိတၢ်လံၤအမဲာ်ညါဒးဆံၣ်သိအလုၢ်အၦ့ၤဘၣ်ဟဲထီၣ်၀ဲလၢဟီၣ်က၀ီၤအပူၤလီၤအဂ့ၢ်န့ၣ် ၦၤပနံာ်ကၤတၢ်ဖိလၢအအိၣ်ကီၢ်ကၠီၣ်တဲၣ်-ကီၢ်ပယီၤကီၢ်ဆၢတဖၣ်စံး၀ဲန့ၣ်လီၤႉ

ၦၤပနံာ်ကၤတၢ်ဖိလၢအိၣ်မၠၣ်၀တံၣ်၀့ၢ်တဂၤစံး၀ဲ“ခီဖျိပယီၤသုးဒီး(KNLA)တၢ်ဒုးကဲထီၣ်အဃိသိလ့ၣ်တီၣ်တၢ်ဖိတၢ်လံၤဒီးသိလ့ၣ်ဟံၣ်လၢအဟးထီၣ်က့ၤလီၤတဖၣ်အိၣ်ကတာ်ထီသးလၢကျဲပူၤႇတၢ်ဒွဲၣ်အူအီၣ်သိလ့ၣ်ကဲထီၣ်သးတပယူာ်ဃီလီၤႉ အဃိသိလ့ၣ်တဖၣ်က့ၤလီၤတဘူၣ်လၢၤဘၣ်ႉကၠီၣ်တဲၣ်စ့အလုၢ်အၦ့ၤနါက့ထီၣ်အဃိ ကၠီၣ်တဲၣ်တၢ်အီၣ်တၢ်အီတဖၣ်အၦ့ၤထီၣ်၀ဲလီၤ”အဂ့ၢ်န့ၣ် စံး၀ဲန့ၣ်လီၤႉ

လၢန့ၣ်အမဲာ်ညါကတီၢ်ခဲအံၤ ကၠီၣ်တဲၣ်စ့အလုၢ်အၦ့ၤစ့ၢ်ကီးထီၣ်ဒီး ခီဖျိကီၢ်ပယီၤစ့အလုၢ်အၦ့ၤလီၤႇကီၢ်ဆၢတၢ်အီၣ်တၢ်အီတၢ်ဖိတၢ်လံၤအၦ့ၤထီၣ်အဃိ လီၢ်က၀ီၤကမျၢၢ်တဖၣ်တၦ့ၤအီၣ်တၢ်ဒ်အပူၤကွံာ်အသိးလၢၤဘၣ်အဂ့ၢ်န့ၣ် ၦၤပနံာ်ကၤတၢ်ဖိလၢအိၣ်ကီၢ်ဆၢတဖၣ်စံး၀ဲန့ၣ်လီၤႉ