ခီဖျိပယီၤသုးခးလီၤကျိဖးဒိၣ်ဆူသ၀ီပူၤအဃိ တီၤကၠၤအ့လီၢ်က၀ီၤဖိဘၣ်ဟးစံၣ်

လါမးရှး ၁၆ သီႇ ၂၀၂၂ နံၣ်ႇ ခ့ၣ်အဲးစံၣ်

ခီဖျိပယီၤသုးခးလီၤနါစိၤကျိဖးဒိၣ်လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကြုၢ်တုကီၢ်ဆၣ် တီၤကၠၤအ့သ၀ီပူၤအဃိ လီၢ်က၀ီၤသ၀ီဖိတနီၤအိၣ်လၢသ၀ီပူၤတဘူၣ်လၢၤဘၣ်ဟးစံၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲအပူၤကွံာ်လါမးရှး ၁၁ သီအနံၤ လၢတီၤကၠၤအ့သ၀ီပူၤ တၢ်ခးလိာ်သးကဲထီၣ်လၢပယီၤသုးဒီးဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တဖၣ်အဘၢၣ်စၢၤ၀ံၤအလီၢ်ခံ ပယီၤသုးခးလီၤကျိဖးဒိၣ်ဆူသ၀ီပူၤအါအါဂီၢ်ဂီၢ်ဟဲကဲထီၣ်သးအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

တီၤကၠၤအ့သ၀ီဖိတဂၤစံး၀ဲလၢ“ယဆှၢကွံာ်ယဖိမုၣ်ဖိခွါတဖၣ်လၢသ၀ီအဂၤလံလီၤႉမ့ၢ်တၢ်အိၣ်သးကမၤသးဒ်လဲၣ်ဒုတသ့ၣ်ညါဘၣ်ႉဘၣ်ယိၣ်လၢတၢ်ဒုးကဆူၣ်ထီၣ်လီၤႉခးလီၤကျိဖးဒိၣ်လၢသ၀ီပူၤတလီၢ်လီၢ်လီၤႉခဲအံၤနါက့ဘၣ်ယိၣ်လၢကဘီယူၤကဟဲခးလီၤတၢ်လီၤႉမ့ခးလီၤကျိဖးဒိၣ်လၢသ၀ီပူၤခဲအံၤခဲအံၤဒုအိၣ်လၢသ၀ီပူၤအ့အ့ဆ့ဆ့တဘူၣ်လၢၤဘၣ်ႉဘၣ်ဟးစံၣ်အိၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

လၢန့ၣ်အမဲာ်ညါဖဲအဟါလါမးရှး ၁၅ သီ ဟါခီအဆၢကတီၢ်စ့ၢ်ကီး ခီဖျိပယီၤသုးလၢအအိၣ်ဖဲမၠီၣ်ကၠၤအ့သ၀ီႇဒၣ်လီကစၢၢ်ခိၣ်တဖၣ်ခးလီၤကျိဖးဒိၣ်တစှၤန့ၢ်(၅)ဖျၢၣ်ဆူ တီၤကၠၤအ့သ၀ီပူၤအဃိ တီၤကၠၤအ့သ၀ီဖိတနီၤဘၣ်ဟးစံၣ်မံသုးလီၢ်သုးကျဲလၢမုၢ်နၤခီအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ခီဖျိပယီၤသုးခးလီၤနါစိၤကျိဖးဒိၣ်အဃိ တီၤကၠၤအ့သ၀ီဃုာ်ဒီးမၠီၣ်ကၠၤအ့သ၀ီႇလီကဲၤႇနီၤတလၤဒီးဖါကၠၣ်သ၀ီဖိကမျၢၢ်တနီၤ ဘၣ်သုးလီၢ်သုးကျဲလဲၤစံၣ်အိၣ်လၢသ၀ီအဂၤတဖၣ်အဂ့ၢ်န့ၣ် လီၢ်က၀ီၤသ၀ီဖိတဖၣ်စံး၀ဲန့ၣ်လီၤႉ

“ပယီၤသုးကရူၢ်လၢအခးလီၤတၢ်ဖဲသ၀ီပူၤဖဲမဟါန့ၣ် တမ့ၢ်ပယီၤသုးလၢအအိၣ်ဖဲတီၤကၠၤအ့သ၀ီပူၤတဖၣ်န့ၣ်ဘၣ်ႉအ၀ဲသ့ၣ်အၦၤန့ၣ်လၢန့ၣ်တကပၤနါက့အိၣ်လီၤႉပယီၤသုးလၢအအိၣ်ဖဲဒၣ်လီကစၢၢ်ခိၣ်တဖၣ်န့ၣ်ခး၀ဲလီၤႉခဲအံၤလီၢ်က၀ီၤသ၀ီဖိတနီၤလဲၤစံၣ်အိၣ်လၢအဘူးအတံၢ်အဟံၣ်အိၣ်လီၤ”အဂ့ၢ်န့ၣ် ခ့ၣ်အဲၣ်ယူၣ် ကြုၢ်တုကီၢ်ဆၣ်ခိၣ် မါကၠၤညိၤ စံးဘၣ်ခ့ၣ်အဲးစံၣ်န့ၣ်လီၤႉ

တီၤကၠၤအ့သ၀ီပူၤအံၤအပူၤကွံာ်န့ၣ်ပယီၤသုးအိၣ်ထဲအဂၤ(၁၀)ဘျဲၣ်လီၤဒီး ကတီၢ်ခဲအံၤပယီၤသုးမၤအါထီၣ်သုးဂံၢ်ဘါအဂၤ(၅၀)ဃၣ်ဃၣ်လံအဂ့ၢ်န့ၣ် လီၢ်က၀ီၤသ၀ီဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ