Home တၢ်ကစီၣ် တၢ်ဒုးကဲထီၣ်လၢခ့ၣ်အဲၣ်ယူၣ်(သုးက့ ၁)ဒီးပယီၤသုးအဘၢၣ်စၢၤဖဲမိၣ်ပလ့ၤကျဲဖးဒ့ ပယီၤသုးသံ(၆)ဂၤ

တၢ်ဒုးကဲထီၣ်လၢခ့ၣ်အဲၣ်ယူၣ်(သုးက့ ၁)ဒီးပယီၤသုးအဘၢၣ်စၢၤဖဲမိၣ်ပလ့ၤကျဲဖးဒ့ ပယီၤသုးသံ(၆)ဂၤ

1025
0
Photo: KNLA

လါမးရှး ၃၁ သီႇ ၂၀၂၂ နံၣ်ႇ ခ့ၣ်အဲးစံၣ်

ဖဲတနံၤအံၤလါမးရှး ၃၁ သီ ဂီၤခီအဆၢကတီၢ် လၢမိၣ်ကီၢ်စဲၣ် ကၠဲၣ်ထိၤကီၢ်ဆၣ် မိၣ်ပလ့ၤကျဲဖးဒ့န့ၣ် တၢ်ဒုးကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA(သုးက့ ၁)သုးပာ်ဖှိၣ်ဒီး ပယီၤသုးတဖၣ်အဘၢၣ်စၢၤ ဖဲန့ၣ်ပယီၤသုးတကပၤသံ၀ဲ(၆)ဂၤအဂ့ၢ်န့ၣ် ခ့ၣ်အဲၣ်ယူၣ်တကပၤစံး၀ဲန့ၣ်လီၤႉ

ဖဲတနံၤအံၤဂီၤခီ ၅ နၣ်ရံၣ်ဃၣ်ဃၣ်အဆၢကတီၢ် ပယီၤသုးလၢအိၣ်ဆီလီၤသးဖဲမိၣ်ပလ့ၤကျဲဖးဒ့အံၤဒီး ကညီသုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ် ဖဲန့ၣ်ပယီၤသုးတကပၤသံ(၆)ဂၤႇဘၣ်ဒိ(၂)ဂၤဒီး ကညီသုးပာ်ဖှိၣ်တကပၤဘၣ်ဟ့ၣ်လီၤကွံာ်အသးသမူ(၁)ဂၤအဂ့ၢ်န့ၣ် ခ့ၣ်အဲၣ်ယူၣ်ဒူသထူၣ်ကီၢ်ရ့ၣ်ၦၤဘၣ်မူဘၣ်ဒါတဂၤစံး၀ဲန့ၣ်လီၤႉ

“ဖဲတဂီၤညါအံၤ ၅ နၣ်တခီဃၣ်ဃၣ်န့ၣ်ပယီၤသုုးဒီးပသုးပာ်ဖှိၣ်ကရူၢ်တဖၣ်အဘၢၣ်စၢၤတၢ်ဒုးကဲထီၣ်လီၤႉ အ၀ဲသ့ၣ်တကပၤသံ၀ဲ(၆)ဂၤႇဘၣ်ဒိ(၂)ဂၤလီၤႉမ့မ့ၢ်ပၦၤတခီဘၣ်ဟ့ၣ်လီၤအသးသမူ(၁)ဂၤ”အဂ့ၢ်န့ၣ် ခ့ၣ်အဲၣ်ယူၣ်ဒူသထူၣ်ကီၢ်ရ့ၣ်ၦၤဘၣ်မူဘၣ်ဒါစံးဘၣ်ခ့ၣ်အဲးစံၣ်န့ၣ်လီၤႉ

တၢ်ဒုးကဲထီၣ်ဘျီ၀ဲအံၤယံၤ၀ဲ(၄၀)မံးနံးဃၣ်ဃၣ်ဒီး တၢ်ဒုးကဲထီၣ်အကတီၢ်ခီဖျိပယီၤသုးခးလီၤကျိဖးဒိၣ်ကျိဖိတဖၣ်အဃိ လီၢ်က၀ီၤဖိဘၣ်ဒိ(၂)ဂၤဒီး ပယီၤသုးခးပိၢ်ထီၣ်ကျိသမံသမိးတၢ်လၢမိၣ်ပလ့ၤသ၀ီပူၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ

ဖဲအပူၤကွံာ်လါမးရှး ၂၇ သီအနံၤစ့ၢ်ကီး လၢသထူၣ်-ဘံလ့ကျဲမုၢ် စွ့ၤယီၤပၠၣ်သ၀ီကပၤန့ၣ် ခီဖျိပယီၤသုးခးနါစိၤကျိလၢကျဲဒီတဘိလၢကမျၢၢ်ဟးထီၣ်က့ၤလီၤအံၤအဃိ ဘၣ်သံ၀ဲဒၣ်ဖိသၣ်ပိာ်ခွါဖိမီၤကၠီၤစ့ၤမ့(၆)နံၣ်ဒီးမီၤညံၤညံၤစီၣ်ထဲၣ်(၉)နံၣ်တဖၣ်ကဲထီၣ်တ့ၢ်အသးစ့ၢ်ကီးအဂ့ၢ်န့ၣ် လီၢ်က၀ီၤတၢ်ကစီၣ်စံး၀ဲအသိး သ့ၣ်ညါဘၣ်န့ၣ်လီၤႉ

လၢ၀့ၢ်တကူၣ်-မီၣ်လမၠဲၣ်ကျဲ ကၠဲၣ်ထိၤႇသ့ၤစယၣ်ႇဘံလ့ႇမိၣ်ပလ့ၤသ၀ီကျဲမုၢ်ခိၣ်သ့ၣ်တဖၣ်န့ၣ် တၢ်ဒုးကဲထီၣ်၀ဲဒၣ်လၢပယီၤသုးဒီးတၢ်ပၢၢ်ဆၢသုးပာ်ဖှိၣ်တဖၣ်အဘၢၣ်စၢၤအိၣ်၀ဲတလီၢ်လီၢ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ