တၢ်ဟ့ၣ်လၤကပီၤသးၦၢ်မုၣ်(၃၄)ဂၤလၢဟီၣ်ခိၣ်ဒီဘ့ၣ်ပိာ်မုၣ်မုၢ်နံၤတၢ်ရဲၣ်တၢ်ကျဲၤအပူၤ

လါမးရှး ၈ သီႇ ၂၀၂၂ နံၣ်ႇ ခ့ၣ်အဲးစံၣ်

ဖဲတနံၤအံၤလါမးရှး ၈ သီအနံၤ တၢ်မၤလၤကပီၤ၀ဲဟီၣ်ခိၣ်ဒီဘ့ၣ်ပိာ်မုၣ်မုၢ်နံၤတၢ်ရဲၣ်တၢ်ကျဲၤအံၤလၢခ့ၣ်အဲၣ်ယူၣ် ဖၣ်အၣ်ကီၢ်ရ့ၣ် နဘူကီၢ်ဆၣ် သၤယၤကိသ၀ီပူၤဒီး ဖဲန့ၣ်တၢ်ဟ့ၣ်လၤကပီၤ၀ဲလီၢ်က၀ီၤကညီပိာ်မုၣ်(၃၄)ဂၤလၢ အကဲတ့ၢ်သ၀ီသးၦၢ်လၢတဲာ်လွံၢ်တဲာ်သုးပဒိၣ်စိၤအခါသ့ၣ်တဖၣ်န့ၣ်လီၤႉ

ဖဲဖီၣ်စုက၀ဲၤတၢ်သဘံၣ်သဘုၣ်ကဲထီၣ်ကတီၢ်ၦၤသ့ၣ်တဖၣ်အံၤတူၢ်ဆါခီၣ်ဆါအသးဒီးဒီသဒၢ၀ဲဒူသ၀ီအဖီခိၣ်အံၤ ဒ်သိးတၢ်ကသ့ၣ်ညါပာ်ပနီၣ်ဒီးကကဲထီၣ်တၢ်လီၤကွၢ်လိလၢသူၣ်ဘီၣ်သးစၢ်သ့ၣ်တဖၣ်အဂီၢ်ဘၣ်တၢ်ပညိၣ်အီၤဒီးဘၣ်ဟ့ၣ်လၤကပီၤ၀ဲလီၤအဂ့ၢ်န့ၣ် ဖၣ်အၣ်ကီၢ်ရ့ၣ်တၢ်ကရၢကရိဒီးတၢ်ဘိးဘၣ်ရၤလီၤ၀ဲၤကျိၤခိၣ် ပဒိၣ်နီၢ်ရှံ၀ါစံး၀ဲဒ်အံၤန့ၣ်လီၤႉ

“ပမ့ဘၣ်က့ၤကွၢ်ကဒါန့ၣ်အ၀ဲသ့ၣ်မ့ၢ်ၦၤလၢအတူၢ်ဆါအသးလီၤႉအ၀ဲသ့ၣ်မ့ၢ်ၦၤဒူၦၤဃိၤလၢပ၀ဲဒၣ်သ့ၣ်တဖၣ်အဂီၢ်လီၤႉခဲအံၤအ၀ဲသ့ၣ်အသးၦၢ်ထီၣ်လံအဃိကဲထီၣ်၀ဲဒၣ်တၢ်လီၤကွၢ်လိလၢသူၣ်ဘီၣ်သးစၢ်တဖၣ်အဂီၢ်တခါအသိးပဒိးန့ၢ်ဘၣ်တၢ်လဲၤခီဖျိလၢအ၀ဲသ့ၣ်အအိၣ်အါမးအဃိႇပဒိးန့ၢ်ဘၣ်တၢ်မၤလိအါမးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

တၢ်မၤလၤကပီၤဟီၣ်ခိၣ်ဒီဘ့ၣ််ပိာ်မုၣ်မုၢ်နံၤတၢ်ရဲၣ်တၢ်ကျဲၤဘျီ၀ဲအံၤအပူၤ တၢ်ဟ့ၣ်မၤလၤကပီၤ၀ဲခ့ၣ်အဲၣ်ယူၣ်-ဖၣ်အၣ်ကီၢ်ရ့ၣ်ပူၤ လူၢ်ပျဲၢ်ႇတၢ်-ကဲၢ်ႇထံၤလိၤႇတန့ဆါဒီးဒူယီၢ်ကီၢ်ဆၣ်(၅)ဘ့ၣ် လီၢ်က၀ီၤသ၀ီသးၦၢ်မုၣ်သ့ၣ်တဖၣ်ဒီး(၃၄)ဂၤအကျါဟဲထီၣ်၀ဲတၢ်ရဲၣ်တၢ်ကျဲၤမူးအံၤ(၂၉)ဂၤန့ၣ်လီၤႉ

ထိၣ်ကီးကိလီၢ်က၀ီၤသ၀ီသးၦၢ်မုၣ်လီၢ်လံၤနီၢ်မံၤနၤ(၆၃)နံၣ်လၢအဘၣ်တၢ်ဟ့ၣ်မၤလၤကပီၤအီၤတဂၤစံး၀ဲ“အပူၤကွံာ်န့ၣ်တဒိးန့ၢ်ဘၣ်တၢ်တဟ့ၣ်မၤလၤကပီၤဒ်အံၤနီတဘျီဘၣ်ႉတၢ်သ့ၣ်ညါပာ်ပနီၣ်မၤလၤကပီၤယၤဒ်အံၤယသးခုဒိၣ်မးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

လၢန့ၣ်အမဲာ်ညါသ၀ီသးၦၢ်မုၣ်လီၢ်လံၤလၢအကဲတ့ၢ်သ၀ီသးၦၢ်လၢညါသ့ၣ်တဖၣ်န့ၣ် ဘၣ်လဲၤခီဖျိ၀ဲပယီၤသုးအတၢ်ဆီၣ်တံၢ်မၤနၢၤအကလုာ်ကလုာ်အသိး ကတီၢ်ခဲအံၤလၢဟီၣ်က၀ီၤတဖၣ်အပူၤတဘၣ်လဲၤခီဖျိတၢ်ဒ်အပူၤကွံာ်လၢၤဘၣ်အဃိသးခုဒိၣ်မးအဂ့ၢ်န့ၣ် သ၀ီသးၦၢ်မုၣ်လီၢ်လံၤနီၢ်မံၤနၤစံးအါထီၣ်၀ဲန့ၣ်လီၤ
ႉ
အပူၤကွံာ်လၢညါသုးမီၤစိရိၤပၢတၢ်အစိၤအခါဖီၣ်စုက၀ဲၤတၢ်သဘံၣ်သဘုၣ်ဟဲအိၣ်ထီၣ်ဒီး လၢကညီကီၢ်စဲၣ်ဟီၣ်က၀ီၤတဖၣ်အပူၤခီဖျိပယီၤသုးအံၤဖီၣ်မၤသံမၤ၀ီဆီၣ်တံၢ်မၤနၢၤ၀ဲသ၀ီသးၦၢ်ပိာ်ခွါတဖၣ်ဒီးမၢဆူၣ်မၢဆိး၀ဲအဃိ လီၢ်က၀ီၤပိာ်မုၣ်သ့ၣ်တဖၣ်ဘၣ်ကဲက့ၤသ၀ီသးၦၢ်လၢပိာ်ခွါအလီၢ်ဒီး ဖဲန့ၣ်သ၀ီသးၦၢ်မုၣ်စးထီၣ်ဟဲအိၣ်ဖျါထီၣ်၀ဲဒၣ်န့ၣ်လီၤႉ

နီၢ်သရံး(၇၅)နံၣ်လၢအကဲတ့ၢ်သ၀ီသးၦၢ်မုၣ်ယံၤအနံၣ်(၁၀)ဘျဲၣ်တဂၤစ့ၢ်ကီးစံး၀ဲလၢ“လၢပစိၤခါန့ၣ်ပဘၣ်ယိး၀ဲဒၣ်မ့ၣ်ပိၢ်ဖျၢၣ်တဖၣ်လီၤႉဒ်အ၀ဲသ့ၣ်မၢၦၤအသိးပမၤမ့တန့ၢ်ဘၣ်န့ၣ်ပဘၣ်ဟ့ၣ်လီၤ၀ဲဆီႇထိးတဖၣ်မီၤနီၤႉၦၤတနီၤန့ၣ်တဲၦၤလၢပကဲပယီၤသုးအမါလီၤႉပတူၢ်ဆါဟ့ၣ်လီၤသးလၢလီၢ်က၀ီၤအဂီၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ဖဲအပူၤကွံာ် ၂၀၂၁ နံၣ် လါမးရှး ၈ သီအနံၤလၢအလီၤဘၣ်၀ဲဟီၣ်ခိၣ်ဒီဘ့ၣ်ပိာ်မုၣ်အမုၢ်နံၤအခါစ့ၢ်ကီး ကညီပိာ်မုၣ်ကရၢ(KWO)ဟ့ၣ်လၤကပီၤ၀ဲဖၣ်ကီၢ်အၣ်ကီၢ်ရ့ၣ်ပူၤ လူၢ်ပျဲၢ်ႇတၢ်ကြဲၢ်ႇထံၤလိၤႇတန့ဆါဒီးဒူယီၢ်ကီၢ်ဆၣ်(၅)ဘ့ၣ်ပူၤသ၀ီသးၦၢ်မုၣ်လီၢ်လံၤ(၅၄)ဂၤဒံးန့ၣ်လီၤႉ

တၢ်မၤလၤကပီၤဟီၣ်ခိၣ်ဒီဘ့ၣ်ပိာ်မုၣ်မုၢ်နံၤတၢ်ရဲၣ်တၢ်ကျဲၤအပူၤ သ၀ီသးၦၢ်မုၣ်လီၢ်လံၤဃုာ်ဒီးလီၢ်က၀ီၤသ၀ီဖိအဂၤ(၃၀၀)ဃၣ်ဃၣ်ဟဲထီၣ်၀ဲဒီး တၢ်ရဲၣ်တၢ်ကျဲၤအပူၤတၢ်ရှဲပၠးလီၤ၀ဲပိာ်မုၣ်မုၢ်နံၤဟဲကဲထီၣ်သးအဂ့ၢ်အကျိၤႇတၢ်စံၣ်စိၤတဲစိၤအဂ့ၢ်အကျိၤဒီးလီၢ်က၀ီၤခိၣ်နၢ်ဘၣ်ထွဲတဖၣ်ကတိၤစံးဘျုးစံးဖှိၣ်လီၤတၢ်တဂၤစုာ်စုာ်န့ၣ်လီၤႉ