ပယီၤသုးနုာ်လီၤအိၣ်ဆီလီၤအသးလၢလ့က့ၣ်ကိာ်၀့ၢ်သီဒီးဟံးန့ၢ်လီၢ်က၀ီၤဖိအတၢ်ဖိတၢ်လံၤတဖၣ်

လါမးရှး ၁၄ သီႇ ၂၀၂၂ နံၣ်ႇ ခ့ၣ်အဲးစံၣ်

ပယီၤသုးဒီးသုးခိးကီၢ်ဆၢ(BGF)သုးပာ်ဖှိၣ်တဖၣ်နုာ်လီၤအိၣ်ဆိးဟံးန့ၢ်အလီၢ်လၢလ့က့ၣ်ကိာ်၀့ၢ်သီက၀ီၤဒ့တဖၣ်အပူၤဒီး ဟံးန့ၢ်၀ဲကမျၢၢ်လၢအဘၣ်ဃ့ၢ်မှံဟးဖျိးတဖၣ်အတၢ်ဖိတၢ်လံၤလၢက၀ီၤဒ့တဖၣ်အပူၤကိးမုၢ်နံၤဒဲးအဂ့ၢ်န့ၣ် လ့က့ၣ်ကိာ်ၦၤဃ့ၢ်မှံဟးဖျိးတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ

ကတီၢ်အံၤပယီၤသုးဒီးသုးခိးကီၢ်ဆၢ(BGF)သုးပာ်ဖှိၣ်တဖၣ် နုာ်လီၤအိၣ်ဆိးဟံးန့ၢ်အလီၢ်လၢလ့က့ၣ်ကိာ်၀့ၢ်သီက၀ီၤဒ့တဖၣ်အပူၤဒီးခူၣ်ဃာ်၀ဲတၢ်ပူၤအကျိၤတဖၣ်လၢတစှၤန့ၢ်တၢ်လီၢ်အတီၤ(၁၀)ဘၣ်ဒီး နုာ်လီၤဟံးန့ၢ်ကမျၢၢ်ၦၤဃ့ၢ်မှံဟးဖျိးအတၢ်ဖိတၢ်လံၤလၢဟံၣ်ပူၤတဖၣ်အဂ့ၢ်န့ၣ် ကမျၢၢ်ၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ

ကမျၢၢ်ၦၤဃ့ၢ်တၢ်ဒုးဖိလၢတအဲၣ်ဒိးပာ်ဖျါအမံၤတဂၤစံး၀ဲ“ယသိလ့ၣ်တခိၣ်န့ၣ်ႇၦၤလဲၤထီၣ်လၢမၠၣ်၀တံၣ်တဖၣ်ထံၣ်၀ဲလၢၦၤနီ၀ဲအဃိ အတဲဘၣ်ယၤမးယသ့ၣ်ညါလီၤႉယမၢအသံကွၢ်ၦၤနီသိလ့ၣ်ဖိတဂၤန့ၣ်ဘျီ တဲ၀ဲလၢအၦ့ၤဒိး၀ဲလၢသုးရ့ၣ်(၂၇၅)သုးဖိအဟံၣ်ဖိဃီဖိတဂၤအအိၣ်လီၤႉပယီၤသုးနုာ်လီၤဟံၦၤတၢ်ဖိတၢ်လံၤအံၤမ့ဘၣ်တဲန့ၣ် ဟံၣ်ခဲလၢာ်ဃၣ်ဃၣ်လၢၤလံႉအ၀ဲတဂၤမ့ထံၣ်န့ၣ်ဟံႇအ၀ဲတဂၤနါက့မ့လီကီ၀ဲဒီးဟံ၀ဲလီၤႉ နုာ်လီၤဟံၦၤတၢ်ဖိတၢ်လံၤလၢၦၤဟံၣ်ကိးမုၢ်နံၤဒဲးလီၤႉမ့တဲန့ၣ်အိၣ်တ့ၢ်က့ၤထဲဟံၣ်အဘ့ၣ်အကုလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

တၢ်ဒုးကဲထီၣ်လၢလ့က့ၣ်ကိာ်ဟီၣ်က၀ီၤပူၤယံၤ၀ဲ(၃)လါဘျဲၣ်အတီၢ်ပူၤအံၤ သ၀ီ(၅)ဖျၢၣ်ဒီးလ့့က့ၣ်ကိာ်၀့ၢ်သီက၀ီၤဒ့ပူၤကမျၢၢ်ၦၤဃ့ၢ်မှံဟးဖျိး(၆၀၀၀)ဘျဲၣ်တက့ၤဘၣ်ဒံးလၢအဒူသ၀ီဘၣ်ဒီး ဘၣ်ဟးဃ့ၢ်အိၣ်ကဒုဒံးသးအဖၢမုၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဒ်သိးတၢ်ကသ့ၣ်ညါဘၣ်တၢ်စုလီၢ်ခီၣ်ခိၣ်တၢ်ဂ့ၢ်တၢ်ကျိၤလၢၦၤဃ့ၢ်မှံဟးဖျိးပၢ၀ဲတဖၣ်ဒီးတၢ်ဖိတၢ်လံၤလၢအဟးဂီၤလၢပျီပူၤတဖၣ်အံၤအဂီၢ်န့ၣ် တၢ်ဃုထၢမၤနီၣ်မၤဃါၦၤဃ့ၢ်မှံဟးဖျိးအနီၣ်ဂံၢ်စရီဒီး တုၤလၢခဲအံၤတဒိးန့ၢ်ဘၣ်စရီလၢလၢၦဲၤၦဲၤဒံးဘၣ်အဂ့ၢ်န့ၣ် တၢ်ကရၢကရိလၢအမၤစၢၤတၢ်တဖၣ်စံး၀ဲန့ၣ်လီၤႉ

“တၢ်ဒုးကဲထီၣ်အဃိယပာ်ယသိလ့ၣ်ႇဆဲးကဲးႇခီၣ်ဖၠူထၢၣ်တၢ်ဖိတၢ်လံၤလၢဟံၣ်ဒီးယကးတံၢ်ဃာ်အီၤလီၤႉဖဲတၢ်ဒုးဂၢၢ်ထီၣ်အခါယမၢၦၤလဲၤကွၢ်န့ၢ်ယဟံၣ်ဒီးတဲ၀ဲလၢဟံၣ်တြဲၤဒီးကျးအတြဲၤတဖၣ်အိးထီၣ်သးႇတထံၣ်သိလ့ၣ်ဆဲးကဲးတဖၣ်လၢၤဘၣ်ႉယသ့ၣ်ညါလၢကျိဖးဒိိၣ်လီၤတဲာ်လၢယဟံၣ်ပူၤအဃိမ့ဆိမိၣ်လၢကက့ၤအိၣ်တဘျီလၢ်လၢ်န့ၣ်ယသးဟးဂီၤဒိၣ်မးလီၤ”အဂ့ၢ်န့ၣ် လ့က့ၣ်ကိာ်လီၢ်က၀ီၤပိာ်မုၣ်တဂၤစံး၀ဲန့ၣ်လီၤႉ

ဖဲအပူၤကွံာ်လါမးရှး ၁၀ သီအနံၤန့ၣ် နံၣ်ပိဖီၣ်ဒ့ရှၢၣ်ၦၤပၢၤလီၢ်ဆ့ၣ်နီၤ မံၣ်စထၢၣ်စၤစၤကၤ၀ၤဒီး ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ကရၢခိၣ်စီၤမူးတူစ့ဖိတဖၣ်ထံၣ်လိာ်သးလၢကီၢ်ကၠီၣ်တဲၣ်ကံၣ်မဲ၀့ၢ်ပူၤဒီး တၢၣ်ပီၣ်တဲသကိး၀ဲဘၣ်ဃးလ့က့ၣ်ကိာ်လီၢ်က၀ီၤဖိကက့ၤအိၣ်လၢအဒူသ၀ီအဂ့ၢ်ဒီးၦၤဂ့ၢ်၀ီတၢ်ဆီၣ်ထွဲမၤစၢၤတၢ်ရဲၣ်တၢ်ကျဲၤအဂ့ၢ်တဖၣ်ဒံးအဂ့ၢ်န့ၣ် ၦၤလၢအဘူးဒီးခ့ၣ်အဲၣ်ယူၣ်တဖၣ်စံး၀ဲအသိး သ့ၣ်ညါဘၣ်န့ၣ်လီၤႉ