လါမးရှး ၁၈ သီႇ ၂၀၂၂ နံၣ်ႇ ခ့ၣ်အဲးစံၣ်
ခီဖျိပယီၤသုးမီၤစိရိၤခဲအံၤတဖၣ်တမ့ၢ်၀ဲဒၣ်ထံကီၢ်ပဒိၣ်ဘၣ်အဃိ ဘၣ်ဃးဒီးတၢ်ကးတံၢ်ဃာ်ကၠိ(၄)ဖျၢၣ်လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁) ဖၣ်အၣ်ကီၢ်ဆၣ်ပူၤတၢ်ဂ့ၢ်အဖီခိၣ် ကီၢ်စဲၣ်သုးမီၤစိရိၤဘံၣ်ဘၢဒီးကီၢ်ဆၢဂ့ၢ်၀ီကိတိာ် သုးခိၣ်ဒိၣ်စိမၠိမ့နီၤဆှၢထီၣ်လံာ်ထီဒါအံၤ တဖိးသဲစးဘၣ်အဂ့ၢ်န့ၣ် KNU က့ၤခီၣ်ဆၢစံး၀ဲန့ၣ်လီၤႉ
ခီဖျိတၢ်ဟံးန့ၢ်တၢ်ဘံၣ်တၢ်ဘၢတန့ၢ်လၢၤဘၣ်အဃိဘၣ်ဃးဒီးတၢ်ကးတံၢ်ကွံာ်ဖၣ်အၣ်ကီၢ်ဆၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤပူၤကၠိ(၄)ဖျၢၣ်တၢ်ဂ့ၢ်အံၤအဖီခိၣ် ဖဲလါမးရှး ၁၄ သီအနံၤ ပယီၤသုးမီၤစိရိၤဘံၣ်ဘၢဒီးကီၢ်ဆၢဂ့ၢ်၀ီကိတိာ်သုးခိၣ်ဒိၣ်စိမၠိမ့နီၤဆှၢထီၣ်လံာ်ထီဒါဆူဖၣ်အၣ်ကီၢ်ဆၣ်(ခ့ၣ်အဲၣ်ယူၣ်)လီၢ်ခၢၣ်သးဒီးသုးက့တၢ်ရ့လိာ်မုာ်လိာ်၀ဲၤဒၢးႇ၀ဲၤဒၢးခိၣ်အအိၣ်အံၤအဖီခိၣ်န့ၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်ခိၣ် ပဒိၣ်စီၤစိမၠ့ၣ် က့ၤခီၣ်ဆၢစံး၀ဲဒ်အံၤန့ၣ်လီၤႉ
“အ၀ဲသ့ၣ်န့ၣ်တမ့ၢ်ပဒိၣ်ဘၣ်ႇမတၤတဂၤပာ်ထီၣ်အီၤလၢပဒိၣ်လဲၣ်ႉကမျၢၢ်ထံဖိကီၢ်ဖိခဲလၢာ်တတူၢ်လိာ်အီၤဘၣ်ႉအ၀ဲသ့ၣ်ဆှၢထီၣ်လံာ်လၢ(NCA)အကျဲဘၣ်ဆၣ် ပ၀ဲဒၣ်အံၤ(NCA)စ့ၢ်ကီးတအိၣ်လၢၤဘၣ်ႉ (NCA)အံၤဟးဂီၤယံၤလံႉ(JMC)နါက့တအိၣ်လၢၤဘၣ်ႉစးထီၣ်လၢပဒိၣ်တအိၣ်လၢၤဘၣ်န့ၣ်(NCA)အံၤတအိၣ်လၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
ပယီၤသုးမီၤစိရိၤဘံၣ်ဘၢဒီးကီၢ်ဆၢဂ့ၢ်၀ီကိတိာ်လံာ်ထီဒါအပူၤစံး၀ဲလၢ ဖဲ(၇/၂/၂၀၂၂)ခ့ၣ်အဲၣ်ယူၣ်(သုးက့ ၁)ထုးထီၣ်ပာ်ဖျါ၀ဲလၢခီဖျိဖၣ်အၣ်ကီၢ်ဆၣ်(အထက)တကီၤဘိႇ(အထက)မၠဲၤႇ(အထက)အဒ့၀ဲပၠၣ်ဒီး(အလက)ဘီသဘၠူၣ်ကၠိကမံးတံာ်တဖၣ်ဟံးန့ၢ်ကၠိသရၣ်ၦၤမၤတၢ်ဖိအတၢ်ဘံၣ်တၢ်ဘၢတန့ၢ်လၢၤဘၣ်အဃိ စးထီၣ်လၢ(၁၀/၂/၂၀၂၂)တၢ်ကးတံၢ်ဃာ်ကၠိအံၤဒီး ခ့ၣ်အဲၣ်ယူၣ်အံၤကလူၤပိာ်မၤထွဲ(NCA) လံာ်ဃံးဃာ်တၢ်သိၣ်တၢ်သီတဖၣ်ႇတဘၣ်နုာ်လီၤဂိာ်စုဂိာ်ခီၣ်လၢဟီၣ်က၀ီၤပြၢပြးတၢ်ဂ့ၢ်တဖၣ်ဘၣ်ႇကမၤဃံးထီၣ်အစုဒုၣ်တီၤအဖီလာ်သုးဖိတဖၣ်အဂ့ၢ်န့ၣ် ပာ်ဖျါ၀ဲန့ၣ်လီၤႉ
ဘၣ်ဃးပယီၤသုးမီၤစိရိၤဘံၣ်ဘၢဒီးကီၢ်ဆၢဂ့ၢ်၀ီကိတိာ်လံာ်ထီဒါအံၤန့ၣ် တၢ်တိစၢၤမၤစၢၤကညီတၢ်မုာ်တၢ်ခုၣ်ၦာ်ဘျးစဲ(KPSN)ကရူၢ် ၦၤကတိၤတၢ်ပၢ စီၤလ့ကပီၤစံး၀ဲလၢ “(NCA)န့ၣ်သံလၢ(၂၀၁၈)နံၣ်အခါလံၤလံၤလံလီၤႉခ့ၣ်အဲၣ်ယူၣ်စ့ၢ်ကီးတဲ၀ဲလၢတၢ်မုာ်တၢ်ခုၣ်အကျဲစ့ၢ်ကီးကတၢၢ်လံႉအ၀ဲသ့ၣ်အံၤသူ၀ဲ(NCA)မ့ၢ်ဒ်သိးအဲၣ်ဒိးဖီၣ်ဃံာ်၀ဲကလုာ်ဒူၣ်ဖီၣ်စုက၀ဲၤတၢ်ကရၢကရိတဖၣ်လီၤမီၤနီၤႉလၢတၢ်ကဒုးလီၤၦီၢ်ကွံာ်ပယီၤသုးမီၤစိရိၤအံၤအဂီၢ်တၢ်လၢခ့ၣ်အဲၣ်ယူၣ်ကြၢးမၤ၀ဲသ့ၣ်တဖၣ်န့ၣ်အလီၢ်အိၣ်လၢကဘၣ်မၤ၀ဲမီၤနီၤ”အဂ့ၢ်န့ၣ်ပဲာ်ထံနီၤဖး၀ဲန့ၣ်လီၤႉ
ဖဲအပူၤကွံာ်လါဖ့ၤဘြူၤအါရံၤ ၇ သီအနံၤ ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ဖၣ်အၣ်ကီၢ်ဆၣ် ထုးထီၣ်ပာ်ဖျါဒံး၀ဲလၢ ၀ဲၤကျိၤၦၤမၤတၢ်ဖိလၢအမၤတၢ်လၢပယီၤသုးမီၤစိရိၤအစုတီၤအဖီလာ်သ့ၣ်တဖၣ်ခဲလၢာ်ကဟးထီၣ်ကွံာ်လၢခ့ၣ်အဲၣ်ယူၣ်ဖၣ်အၣ်ကီၢ်ပူၤန့ၣ်လီၤႉ
လၢတၢ်န့ၣ်အဃိၦၤမၤတၢ်ဖိလၢအတနုာ်လီၤပၣ်ဃုာ်လၢ(CDM)ပူၤသ့ၣ်တဖၣ်ကဲထီၣ်လၢဟ့ၣ်ဂံၢ်ဟ့ၣ်ဘါ၀ဲပယီၤသုးမီၤစိရိၤအဃိ ၦၤမၤတၢ်ဖိလၢအတူၢ်လိာ်ဆီၣ်ထွဲပယီၤသုးတဖၣ် တတူၢ်လိာ်၀ဲလၢအ၀ဲသ့ၣ်ဟီၣ်က၀ီၤပူၤဘၣ်အသိး တၢ်ဂ့ၢ်မ့ဟဲကဲထီၣ်သးဒီး၀ဲၤကျိၤၦၤမၤတၢ်ဖိတမံၤလၢ်လၢ်န့ၣ် ပတဲတ့ၢ်ဃာ်လံလၢခ့ၣ်အဲၣ်ယူၣ်တဟံးမူဒါဘၣ်အဂ့ၢ်န့ၣ် ခ့ၣ်အဲၣ်ယူၣ်ဒူသထူၣ်ကီၢ်ရ့ၣ်ခိၣ် ပဒိၣ်စီၤစိမၠ့ၣ် စံး၀ဲန့ၣ်လီၤႉ
