Home တၢ်ကစီၣ် သိလ့ၣ်တီၣ်ၦၤလဲၤတၢ်ဖိဒီးသိလ့ၣ်တီၣ်တၢ်ဖိတၢ်လံၤကတာ်ထီသးလၢမၠၣ်၀တံၣ်-ကီးတရံးအ့ရှါကျဲမုၢ်

သိလ့ၣ်တီၣ်ၦၤလဲၤတၢ်ဖိဒီးသိလ့ၣ်တီၣ်တၢ်ဖိတၢ်လံၤကတာ်ထီသးလၢမၠၣ်၀တံၣ်-ကီးတရံးအ့ရှါကျဲမုၢ်

848
0
Photo: CJ

လါမးရှး ၃၀ သီႇ ၂၀၂၂ နံၣ်ႇ ခ့ၣ််အဲးစံၣ်

ကတီၢ်ခဲအံၤခီဖျိဒုးယၤတၢ်ဖ့ၣ်ဆၢဟဲအိၣ်ထီၣ်၀ဲလၢမၠၣ်၀တံၣ်-ကီးတရံးအ့ရှါကျဲမုၢ်အဃိ သိလ့ၣ်တီၣ်ၦၤလဲၤတၢ်ဖိဒီးသိလ့ၣ်တီၣ်တၢ်ဖိတၢ်လံၤလၢကယၤအိၣ်ကတာ်ထီအသးလၢကျဲပူၤအဂ့ၢ်န့ၣ် လီၢ်က၀ီၤတၢ်ကစီၣ်စံး၀ဲအသိး သ့ၣ်ညါဘၣ်န့ၣ်လီၤႉ

စးထီၣ်လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ်ပၢဆှၢတၢ်ကရူၢ် ထုးထီၣ်လံာ်ဒုသ့ၣ်ညါကမျၢၢ်လၢ စးထီၣ်ဖဲလါမးရှး ၂၇ သီ တၢ်ကပတုာ်ဆိဃာ်တၢ်ဟးထီၣ်က့ၤလီၤလၢမၠၣ်၀တံၣ်-ကီးတရံးအ့ရှါကျဲ၀ံၤအလီၢ်ခံ တၢ်ဒုးကဲထီၣ်၀ဲကိးမုၢ်နံၤဒဲးဃၣ်ဃၣ်ဒီး တၢ်ဒွဲၣ်အူကမျၢၢ်အသိလ့ၣ်တုၤလၢတၢ်သံတၢ်ၦၢ်ဟဲအိၣ်ထီၣ်၀ဲဒၣ်န့ၣ်လီၤႉ

ဖဲမဟါလါမးရှး ၂၉ သီအနံၤစ့ၢ်ကီး လၢမၠၣ်၀တံၣ်ကီးတရံးအ့ရှါကျဲသီ ကီးနွဲၢ်သ၀ီဒီးတီနီၢ်တိၤတကပၤန့ၣ် တၢ်ဒွဲၣ်အူအီၣ်သိလ့ၣ်ဟံၣ်(၂)ခိၣ်ဒီးသိလ့ၣ်တီၣ်တၢ်ဖိတၢ်လံၤ(၂)ခိၣ်အသိး ကမျၢၢ်သိလ့ၣ်ႇသိလ့ၣ်တီၣ်တၢ်ဖိတၢ်လံၤသ့ၣ်တဖၣ်ဂုၤက့ၤအလီၢ်ခံက့ၤကဒါဆူမၠၣ်၀တံၣ်ဒီးကီးတရံး၀့ၢ်တကပၤဒီးႇ သိလ့ၣ်အခိၣ်လၢအကယၤအိၣ်ကတာ်ထီိအသးလၢကျဲပူၤအဂ့ၢ်န့ၣ် လီၢ်က၀ီၤတၢ်ကစီၣ်တခါစံး၀ဲန့ၣ်လီၤႉ

အ၀ဲစံး၀ဲလၢ“လၢမၠၣ်၀တံၣ်အ့ရှါကျဲအသီန့ၣ်(BGF)ဒီးပယီၤသုးကလၢၤလူၢ်တဖၣ်အိၣ်၀ဲလီၤႉ အ၀ဲသ့ၣ်အံၤလၢကမၤၦဲၤထီၣ်ကျိချံၦာ်သၣ်ႇသုးဂံၢ်ဘါအဂီၢ်သူ၀ဲဒၣ်ကမျၢၢ်သိလ့ၣ် အိၣ်ခိး၀ဲကျဲတၢ်ဘံၣ်တၢ်ဘၢအိၣ်မီၤနီၤႉ ခီဖျိတၢ်ဒုးကဲထီၣ်ဒီးကညီသုးကရူၢ်ဖဲကျဲမုၢ်ဖီခိၣ်အံၤအဃိ တအဲၣ်ဒိးလၢသိလ့ၣ်ကဟးထီၣ်က့ၤလီၤဘၣ်ႉ ဖဲစှၤသီအတီၢ်ပူၤအံၤတၢ်ခး၀ဲသိလ့ၣ်ႇ တၢ်ဒွဲၣ်အူအီၣ်သိလ့ၣ်ပၢၢ်တုၤလၢတၢ်သံတၢ်ၦၢ်ဟဲအိၣ်ထီၣ်အဃိတအဲၣ်ဒိးလၢသိလ့ၣ်ကဟးထီၣ်က့ၤလီၤဘၣ်”အဂ့ၢ်န့ၣ် စံး၀ဲန့ၣ်လီၤႉ

ခီဖျိပယီၤသုးအံၤအိၣ်ဟဲထီၣ်၀ဲလၢအ့ရှါကျဲမုၢ်သီတကပၤဒီးသူ၀ဲကမျၢၢ်သိလ့ၣ်ဆှၢအါထီၣ်အၦၤလၢ၀ီၤလ့ၤ-သ့ၣ်ဘီဘိတကပၤအဃိ ကီးတရံးလီၢ်က၀ီၤ(KNLA)သုးပာ်ဖှိၣ်တဖၣ်အိၣ်ခိးခးအ၀ဲသ့ၣ်ကိးမုၢ်နံၤဒဲးအသိး လၢကၠီးခဲးကျဲႇဘျၢၣ်ဒိၣ်သ၀ီကျဲတကပၤန့ၣ်စ့ၢ်ကီးခီဖျိတၢ်ဒုးကဲထီၣ်၀ဲလၢပယီၤသုးကျိၤတဖၣ်ဒီး(KNLA)သုးပာ်ဖှိၣ်တဖၣ်အဘၢၣ်စၢၤကိးမုၢ်နံၤဒဲးအဃိ လီၢ်က၀ီၤဖိလၢအကထိဘၣ်လဲၤဃ့ၢ်အိၣ်ကဒုအသးလၢသူမှဲကျိကၢၢ်နံၤန့ၣ်လီၤႉ

ဖဲစှၤသီအတီၢ်ပူၤခီဖျိတၢ်ဒုးကဲထီၣ်လၢအ့ရှါကျဲသီႇကျဲလီၢ်လံၤႇသ့ၣ်ကါညံၣ်နီၣ်ဒီးကွ့ကလ့သ၀ီတကပၤအဃိ လီၢ်က၀ီၤသ၀ီဖိတဖၣ်ဘၣ်လဲၤဃ့ၢ်အိၣ်ကဒုအသးလၢယွၤသ့ၣ်ကိႇဖါခၠီသ၀ီသီခါဖၠၣ်ကရၢၢ်ပူၤအဂ့ၢ်န့ၣ် ၦၤလၢအမၤစၢၤၦၤလီၢ်အိၣ်ကဒုတဖၣ်စံး၀ဲန့ၣ်လီၤႉ

လၢန့ၣ်အမဲာ်ညါခီဖျိတၢ်ဒုးကဲထီၣ်လၢကီးတရံးကလံၤထံးႇကၠဲးဒိႇကၠၤအ့စ့ၣ်ကၠံဟီၣ်က၀ီၤတကပၤစ့ၢ်ကီးအဃိ လီၢ်က၀ီၤသ၀ီဖိတဖၣ်ဘၣ်ဟးစံၣ်ပလဲာ်သးအဂ့ၢ်န့ၣ် သ့ၣ်ညါဘၣ်န့ၣ်လီၤႉ