တၢ်ဒုးဆူၣ်ထီၣ်လၢကီးတရံးကလံၤထံးအဃိလီၢ်က၀ီၤၦၤလီၢ်အိၣ်ကမှံဖိတဖၣ်ဘၣ်သုးကဒီးအလီၢ်အကျဲ

လါမးရှး ၂၂ သီႇ ၂၀၂၂ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီးတရံး၀့ၢ်ကလံၤထံးတကပၤန့ၣ် ခီဖျိပယီၤသုးမီၤစိရိၤဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တဖၣ်အဘၢၣ်စၢၤတၢ်ဒုးဆူၣ်ထီၣ်အဃိ လီၢ်က၀ီၤၦၤလီၢ်အိၣ်ကမှံဖိတဖၣ်ဘၣ်သုးကဒီးအလီၢ်အကျဲလၢတၢ်လီၢ်အဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ခီဖျိပယီၤသုးတဖၣ်ဟဲထီၣ်လၢခ့ၣ်အဲၣ်ယူၣ်တၢ်ပၢဟီၣ်က၀ီၤကီးတရံးကလံၤထံးသ၀ီတဖၣ်အပူၤဒီး ဖဲန့ၣ်တၢ်ဒုးကဲထီၣ်၀ဲဒီးဟီၣ်က၀ီၤ(KNLA)သုးပာ်ဖှိၣ်တဖၣ်ကိးမုၢ်နံၤဒဲးအဃိ ၦၤလီၢ်အိၣ်ကမှံဖိလၢအကထိဘၣ်သုးကဒီးအလီၢ်အကျဲလၢတၢ်လီၢ်အဂၤအဂ့ၢ်န့ၣ် လီၢ်က၀ီၤဖိလၢအဟးမၤစၢၤၦၤလီၢ်အိၣ်ကမှံဖိတဂၤစံးဘၣ်ခ့ၣ်အဲးစံၣ်န့ၣ်လီၤႉ

အ၀ဲစံး၀ဲလၢ“ခီဖျိလၢပယီၤသုးဟဲထီၣ်အဃိၦၤလီၢ်အိၣ်ကမှံဖိတဖၣ်ဘၣ်ဂုၤကဒါလီၢ်ခံဒီးဘၣ်သုးကဒီးအလီၢ်အကျဲမီၤနီၤႉအါဒၣ်တက့ၢ်န့ၣ်လဲၤမံ၀ဲဒၣ်လၢအဘူးအတံၢ်ဟံၣ်ႇအသမူသကိးဟံၣ်ႇကၠိႇသီခါဖၠၣ်အဃိ တနၤအံၤမ့မံ၀ဲဖဲသ၀ီတဖျၢၣ်အံၤအပူၤန့ၣ်နီၢ်တနၤဘၣ်လဲၤစံၣ်မံ၀ဲလၢသ၀ီအဂၤတဖျၢၣ်လီၤႉအိၣ်တပူၤဃီတဘၣ်ဂီၢ်ဘၣ်ႉမ့ၢ်ပယီၤသုးဟဲတုၤဖဲလဲၣ်လံလဲၣ်ႇဒ်သိးတတိနိၣ်ဒီးအ၀ဲသ့ၣ်ဘၣ်န့ၣ်ဘၣ်သုးလီၢ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

တကီၢ်ခဲအံၤလၢကမဲၤကိႇသ၀ီသီသ၀ီအပူၤန့ၣ်ပယီၤသုးဒီးသုးခိးကီၢ်ဆၢ(BGF)သုးအိၣ်ဆီလီၤသးဒံး၀ဲအသိး ဖဲမဟါလါမးရှး ၂၁ သီ ဂီၤခီအဆၢကတီၢ်စ့ၢ်ကီး ပယီၤသုး(၁၀၀)ဘျဲၣ်ဟဲတုၤ၀ဲဒၣ်လၢနါစွ့ၤမိၤႇအီၤလဲၤသ၀ီပူၤဒီး နုာ်လီၤအိၣ်၀ဲဒၣ်လၢသီခါဖၠၣ်ကရၢၢ်ပူၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

ဒ်ၦၤလၢအဟးမၤစၢၤၦၤလီၢ်အိၣ်ကမှံဖိအတၢ်မၤနီၣ်မၤဃါစရီအသိးန့ၣ် လၢကီးတရံးကလံၤထံးကီးနွဲၣ်ႇမီမၣ်သ၀ီသီႇကၠးက၀းႇအီးဖးဖးဒိၣ်ဒီးယွၤတါရှ့ၤသ၀ီကရူၢ် ဒူသ၀ီ(၂၅)ဖျၢၣ်ဃၣ်ဃၣ်ဟံၣ်ခိၣ်အဖျၢၣ်(၂ႇ၀၀၀)ဘျဲၣ်ၦၤလီၢ်အိၣ်ကမှံခဲလၢာ်အိၣ်၀ဲ(၁၂ႇ၀၀၀)ဘျဲၣ်ဒီး ၦၤလီၢ်အိၣ်ကမှံဖိတဖၣ်အါဒၣ်တက့ၢ်န့ၣ်လဲၤစံၣ်အိၣ်၀ဲလၢသ၀ီလၢအိၣ်ဘူးဖဲန့ၣ်တဖၣ်အိၣ်၀ဲအသိး တနီၤန့ၣ်လဲၤစံၣ်အိၣ်၀ဲလၢကီးတရံး၀့ၢ်တကပၤစ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ခီဖျိၦၤလီၢ်အိၣ်ကမှံဖိတဖၣ်ဘၣ်ဟးစံၣ်အိၣ်၀ဲဒ်အံၤနံၤသီအါထီၣ်လံအဃိ အ၀ဲသ့ၣ်ထံၣ်ဘၣ်၀ဲတၢ်အိၣ်တၢ်ဆိးလီၢ်ကျဲတၢ်ကီတၢ်ခဲဒီးတၢ်အီၣ်တၢ်အီတၢ်ကီတၢ်ခဲသ့ၣ်တဖၣ်အဂ့ၢ်န့ၣ် လီၢ်က၀ီၤဖိလၢအဟးမၤစၢၤၦၤလီၢ်အိၣ်ကမှံဖိတဂၤစံး၀ဲအသိး သ့ၣ်ညါဘၣ်န့ၣ်လီၤႉ

ခီဖျိတၢ်ဒုးကဲထီၣ်အဃိဒ်သိးလီၢ်က၀ီၤကမျၢၢ်တဖၣ်ကက့ၤအိၣ်ဘၣ်လၢအဟံၣ်အဃီအဒူသ၀ီပူၤမုာ်မုာ်ခုၣ်ခုၣ်အဂီၢ် ဖဲအပူၤကွံာ်လါမးရှး ၇ သီအနံၤန့ၣ် ခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ် ကွဲးဆှၢထီၣ်လံာ်လၢမုၢ်ထီၣ်ကလံၤထံးသုး၀ဲၤလီၢ်ခိၣ်သ့ၣ်ကီၢ်ခီခိၣ်အအိၣ်မ့ၢ်ဒ်သိးပယီၤသုးကဟးထီၣ်ကွံာ်လၢဟီၣ်က၀ီၤပူၤအဂီၢ်ဘၣ်ဆၣ် ပယီၤသုးအံၤမ့မ့ၢ်တခီတဟးထီၣ်ကွံာ်ဘၣ်အမဲာ်ညါဟဲအါထီၣ်၀ဲဒၣ်ကွ့ၢ်ကွ့ၢ်အဃိ လီၢ်က၀ီၤၦၤလီၢ်အိၣ်ကမှံဖိတဖၣ်ဘၣ်သုးကဒီးအလီၢ်အကျဲကဲထီၣ်သးဒ်အံၤန့ၣ်လီၤႉ

ဖဲစှၤသီအတီၢ်ပူၤပယီၤသုးမၤ၀ဲတၢ်ထီၣ်ဒုးလၢကီးတရံးကလံၤထံးဟီၣ်က၀ီၤတကပၤအသိး ခီဖျိပယီၤသုးလၢအိၣ်ဖဲကီးတရံး၀့ၢ်တဖၣ်ခးလီၤကျိဖးဒိၣ်ဆူတီၤကၠၤအ့သ၀ီပူၤကိးမုၢ်နၤဒဲးဃၣ်ဃၣ်အဃိ လီၢ်က၀ီၤသ၀ီဖိတဖၣ်ဘၣ်ဟးစံၣ်သုးလီၢ်သုးကျဲန့ၣ်လီၤႉ

ဒ်န့ၣ်အသိးဖဲစှၤသီအတီၢ်ပူၤလၢမၠၣ်၀တံၣ်ကလံၤထံးသ့ၣ်ဘီဘိဒီးမီခံလီၢ်က၀ီၤတကပၤစ့ၢ်ကီး ခီဖျိတၢ်ဒုးကဲထီၣ်၀ဲလၢပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တဖၣ်အဘၢၣ်စၢၤကိးမုၢ်နံၤဒဲးအဃိ သ့ၣ်ဘီဘိဒီးမီခံကရူၢ်ပူၤသ၀ီ(၈)ဖျၢၣ်ဃၣ်ဃၣ်လီၢ်က၀ီၤ(၄ႇ၀၀၀)ဘျဲၣ်ဘၣ်ဃ့ၢ်မှံဟးဖျိး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ႇတီအူႇချၢၣ်လွံၣ်ထူၣ်ႇဘျံးဒ၀ဲၢ်ႇမုၢ်တြီၢ်ႇဒူပျာ်ယာ်ဒီးဖၣ်အၣ်ကီၢ်ရ့ၣ်(၇)ဘ့ၣ်အပူၤ ကမျၢၢ်ၦၤလီၢ်အိၣ်ကမှံဖိအနီၣ်ဂံၢ်ခဲလၢာ်အိၣ်၀ဲ(၁၄၀ႇ၀၀၀)ဘျဲၣ်အဂ့ၢ်န့ၣ် ကညီပိာ်မုၣ်ကရၢ(KWO)တၢ်မၤနီၣ်စရီအသိး သ့ၣ်ညါဘၣ်န့ၣ်လီၤႉ