ကီးတရံးကလံၤထံးကမျၢၢ်ၦၤဃ့ၢ်တၢ်ဒုးဖိလၢအကလးသဂၢၢ်ဘၣ်တၢ်အီၣ်တၢ်အီတကူတလၢ

လါအ့ဖြ့ၣ် ၇ သီႇ ၂၀၂၂ နံၣ်ႇ ခ့ၣ်အဲးစံၣ်

ခီဖျိပယီၤမၤအါထီၣ်အသုးဒီးနုာ်လီၤမၤဒုးယၤတၢ်ဟူးတၢ်ဂဲၤလၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ကီးတရံးကလံၤထံးဟီၣ်က၀ီၤပူၤအဃိ သ၀ီ(၂၁)ဖျၢၣ် ကမျၢၢ်နီၣ်ဂံၢ်တကလးဘျဲၣ်အံၤဘၣ်ဃ့ၢ်၀ဲအဆၢကတီၢ်ယံၤလံဒီး သဂၢၢ်ဘၣ်၀ဲတၢ်အီၣ်တၢ်အီတကူတလၢအဂ့ၢ်န့ၣ် ၦၤလီၢ်အိၣ်ကဒုဖိတဖၣ်စံး၀ဲန့ၣ်လီၤႉ

လီၢ်က၀ီၤကမျၢၢ်ၦၤဃ့ၢ်တၢ်ဒုးဖိ(၁၂ႇ၀၀၀)ဘျဲၣ်လၢအပၣ်ဃုာ်၀ဲဒီးသူၣ်က့သးၦၢ်ႇမိၢ်ဒီးဖိဒံဖိသၣ်တဖၣ်အံၤ ဘၣ်ဟးဃ့ၢ်၀ဲအဆၢကတီၢ်ယံၤထီၣ်ဒီးသဂၢၢ်ဘၣ်၀ဲတၢ်အီၣ်တၢ်အီတၢ်ကီတၢ်ခဲအသိး ခီဖျိတၢ်မၤစၢၤအကျဲတဖၣ်စ့ၢ်ကီးပတုာ်သးအဃိ ထံၣ်ဘၣ်တၢ်ကီတၢ်ခဲဟဲအါထီၣ်၀ဲအဂ့ၢ်န့ၣ် လီၢ်က၀ီၤၦၤဃ့ၢ်တၢ်ဒုးဖိတဖၣ်စံးဘၣ်ခ့ၣ်အဲးစံၣ်န့ၣ်လီၤႉ

ကတိထၣ်သ၀ီဖိတဂၤစံး၀ဲ“ပဟးစံၣ်န့ၢ်ဒီတလါလံႉလဲၤစံၣ်အိၣ်လၢဘူတံၢ်တဘျီဘျီႇဟဲက့ၤစံၣ်အိၣ်လၢကျီးပူူၤ ဘျီဘျီႇလီၢ်ကျဲအဂၢၢ်တအိၣ်ဘၣ်ႉပဟးစံၣ်အိၣ်မ့န့ၢ်တနွံအသီတဆံန့ၣ်ပယီၤသုးနုာ်လီၤတၢ်ဒုးကဲထီၣ် ဘၣ်ဟးစံၣ်ကဒီးလၢတၢ်လီၢ်အဂၤလီၤႉခဲအံၤၦၤဟဲနီၤလီၤအီၣ်ၦၤတၢ်လီၤႉကလဲၤၦ့ၤအီၣ်လၢသ၀ီအဂၤနါက့လၢကျးပူၤန့ၣ်တၢ်တအိၣ်နီတမံၤလၢၤဘၣ်ႉကလဲၤၦ့ၤအီၣ်လၢ၀့ၢ်ပူၤနါက့လဲၤက့ၤတညီဘၣ်အဃိကအီၣ်ကအီအဂီၢ်တၢ်ကီတၢ်ခဲဟဲအိၣ်ထီၣ်လီၤႉအခိၣ်သ့ၣ်န့ၣ်မ့ၢ်၀ဲဟုသးဒီးတၢ်အီၣ်တၢ်အီတဖၣ်လီၤ”အဂ့ၢ်န့ၣ်စံး၀ဲန့ၣ်လီၤႉ

လၢန့ၣ်အမဲာ်ညါတၢ်လီၢ်လၢၦၤဃ့ၢ်တၢ်ဒုးဖိလဲၤစံၣ်အိၣ်၀ဲအလီၢ်တဖၣ်တၢ်ဒုးကဲထီၣ်ကိးမုၢ်နံၤဒဲးအသိး ခီဖျိပယီၤသုးခးလီၤကျိဖးဒိၣ်ဆူသ၀ီပူၤအဃိ ဘၣ်ဟးစံၣ်မံလၢမုၢ်နၤခီအဂ့ၢ်န့ၣ် အ၀ဲစံးအါထီၣ်၀ဲန့ၣ်လီၤႉ

လၢကီးတရံးကလံၤထံးဟီၣ်က၀ီၤ ကီးတရံး-ကၠဲးဒိကျဲဒီးတီၤကၠၤအ့-ကၠၤအ့စ့ၣ်ကၠံကျဲခံဘိလၢာ်ဒီတကျိၤန့ၣ် ပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်၀ဲကိးမုၢ်နံၤဒဲးဃၣ်ဃၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

တၢ်ဒုးမ့ကဲထီၣ်တဘျီလၢ်လၢ်ခီဖျိပယီၤသုးအံၤခးလီၤကျိဖးဒိၣ်ဆူဒူသ၀ီပူၤႇကဘီယူၤဟဲခးလီၤတၢ်အဃိ လီၢ်က၀ီၤဖိအဟံၣ်အဃီႇတၢ်ဘူၣ်တၢ်ဘါတၢ်သူၣ်ထီၣ်တဖၣ်ဟးဂူာ်ဟးဂီၤအ၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ

ခီဖျိတၢ်ဒုးကဲထီၣ်လၢ(KNLA)သုးပာ်ဖှိၣ်ဒီးပယီၤသုးတဖၣ်အဘၢၣ်စၢၤအဃိ လၢခ့ၣ်အဲၣ်ယူၣ်-ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ် တီနီၢ်မုၢ်နုာ်(ကီးတရံးကလံၤထံး)တကပၤန့ၣ် လီၢ်က၀ီၤကမျၢၢ်လၢအဘၣ်ဃ့ၢ်တၢ်ဒုးအိၣ်၀ဲ(၁၂ႇ၁၇၇)ဂၤအသိး လၢတီနီၢ်မုၢ်ထီၣ်(မၠၣ်၀တံၣ်ကလံၤထံး)တကပၤစ့ၢ်ကီး ၦၤဃ့ၢ်တၢ်ဒုးဖိအိၣ်၀ဲ(၁၁ႇ၄၃၄)ဂၤအဂ့ၢ်န့ၣ် သ့ၣ်ညါဘၣ်လၢတၢ်ကရၢကရိလၢအမၤစၢၤၦၤလီၢ်အိၣ်ကဒုဖိအတၢ်မၤနီၣ်စရီပူၤန့ၣ်လီၤႉ

ဒ်ကညီပိာ်မုၣ်ကရၢ(KWO)အတၢ်မၤနီၣ်စရီအသိးန့ၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ႇတီအူႇချၢၣ်လွံၢ်ထူၣ်ႇဘျံးဒ၀ဲၢ်ႇမုၢ်တြီၢ်ႇဒူပျာ်ယာ်ဒီးဖၣ်အၣ်ကီၢ်ရ့ၣ်(၇)ဘ့ၣ်အပူၤ ကမျၢၢ်ၦၤလီၢ်အိၣ်ကဒုဖိခဲလၢာ်အိၣ်၀ဲ(၁၀၀ႇ၀၀၀)ဘျဲၣ်ဒီး လၢၦၤသ့ၣ်တဖၣ်အံၤအဂီၢ်လိၣ်ဘၣ်၀ဲဂ့ၢ်ဂီၢ်အူတၢ်ဆီၣ်ထွဲမၤစၢၤသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ