Home တၢ်ကစီၣ် တၢ်ခိးခးပယီၤသုးသိလ့ၣ်လၢကၠဲၣ်ထိၤ၀့ၢ်ကပၤ

တၢ်ခိးခးပယီၤသုးသိလ့ၣ်လၢကၠဲၣ်ထိၤ၀့ၢ်ကပၤ

429
0
Photo: KIC (ပုံဟောင်း)

လါမ့ၤ ၁၀ သီႇ ၂၀၂၂ နံၣ်ႇ ခ့ၣ်အဲးစံၣ်

ဖဲတနံၤအံၤလါမ့ၤ ၁၀ သီ မုၢ်ထူၣ် ၁၂ နၣ်ရံၣ်ဘျဲၣ်အဆၢကတီၢ် ပယီၤသုးသိလ့ၣ်လၢအိၣ်ဟဲလၢပကိကီၢ်ခီဒိၣ်ႇ၀ီ၀့ၢ်တကပၤအံၤ ဖဲအဟဲတုၤလၢတလၢၤကီၢ်စဲၣ် ကၠဲၣ်ထိၤ၀့ၢ်ကပၤ အ့ၤကၣ်ဘိၤသ၀ီအခါန့ၣ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အိၣ်ခိးခးအ၀ဲသ့ၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ပယီၤသုးတဖၣ်အံၤအိၣ်ဟဲ၀ဲဒၣ်လၢ၀ီ၀့ၢ်ဒီးသိလ့ၣ်(၅)ခိၣ်ဟဲထီၣ်၀ဲဆူကၠဲၣ်ထိၤတကပၤဒီး ခီဖျိဟီၣ်က၀ီၤ(KNLA)သုးပာ်ဖှိၣ်အိၣ်ခိးခးအီၤလၢတၢ်ဘၢၣ်စၢၤအဃိ ပယီၤသုးတကပၤသံဘၣ်ဒိဘၣ်ထံးအိၣ်၀ဲအဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ

ခ့ၣ်အဲၣ်ယူၣ်ခိၣ်နၢ်ၦၤဘၣ်မူဘၣ်ဒါတဂၤစံး၀ဲ“ပၦၤတဖၣ်နုာ်လီၤခး၀ဲအဃိအ၀ဲသ့ၣ်တကပၤန့ၣ်ဘၣ်ဒိဘၣ်ထံးအိၣ်လီၤႉတၢ်သံတၢ်ဘၣ်ဒိဘၣ်ထံးအိၣ်ဆံးအါလဲၣ်ခီန့ၣ်တသ့ၣ်ညါဘၣ်ဒံးဘၣ်ႉမ့မ့ၢ်လၢပ၀ဲတကပၤဒုတၢ်ဘၣ်ဒိဘၣ်ထံးတအိၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

၀ီ–ကၠဲၣ်ထိၤကျဲအံၤအိၣ်၀ဲဒၣ်လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤအပူၤဒီးလၢကျဲမုၢ်ဖီခိၣ်အံၤတၢ်ခးလိာ်သးကဲထီၣ်၀ဲလၢဟီၣ်က၀ီၤ(KNLA)သုးပာ်ဖှိၣ်ဒီးပယီၤသုးတဖၣ်အဘၢၣ်စၢၤတလီၢ်လီၢ်န့ၣ်လီၤႉအပူၤကွံာ်လါမ့ၤ ၃ သီအခါစ့ၢ်ကီး ဟီၣ်က၀ီၤ(KNLA)နုာ်လီၤခးပယီၤသုးတၢ်လီၢ်တခါလၢအိၣ်ဆီလီၤသးဖဲအ့ၤကၣ်ဘိၤသ၀ီပူၤအံၤဒံးန့ၣ်လီၤႉ

လၢန့ၣ်အမဲာ်ညါကတီၢ်ခဲအံၤပယီၤသုးတနီၤဟဲတုၤ၀ဲဒၣ်လၢခ့ၣ်အဲၣ်ယူၣ်ဒူသထူၣ်ကီၢ်ရ့ၣ် ဘံလ့ကီၢ်ဆၣ် လ့က့ၣ်ဒီးတၤပီသုးကလၢၤလံဒီးကျဲဒီတဘိလၢပယီၤသုးဟဲထီၣ်၀ဲအံၤ သုးခိးကီၢ်ဆၢ(BGF)ႇပယီၤသုးတဖၣ်ပာ်ဖှိၣ်ထီၣ်သးသူ၀ဲကမျၢၢ်ဒ်တၢ်ဒီသဒၢစုက၀ဲၤတခါအသိးဒီးဟးလူၤဖီၣ်လီၢ်က၀ီၤသ၀ီဖိတဖၣ်စ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ