Home တၢ်ကစီၣ် တၢ်ထၢစ့ဟံၣ်တဖျၢၣ်(၅၀၀)ဘးလၢ(BGF)သုးအိၣ်တၢ်မဲာ်ညါတဖၣ်အဂီၢ်

တၢ်ထၢစ့ဟံၣ်တဖျၢၣ်(၅၀၀)ဘးလၢ(BGF)သုးအိၣ်တၢ်မဲာ်ညါတဖၣ်အဂီၢ်

163
0

လါမ့ၤ ၁၀ သီႇ ၂၀၂၂ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် မၠၣ်၀တံၣ်ကီၢ်ဆၣ် စွ့ၤကိၣ်ကိၤဒူသ၀ီကရူၢ်တဖၣ်အပူၤန့ၣ် တၢ်ဟးထၢ၀ဲဟံၣ်တဖျၢၣ်ကဘၣ်ဟ့စ့(၅၀၀)ဘးလၢ(BGF)သုးလၢအအိၣ်တၢ်မဲာ်ညါသ့ၣ်တဖၣ်အဂီၢ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ

ဖဲအပူၤကွံာ်လါမ့ၤ ၇ သီအခါန့ၣ် ဟီၣ်က၀ီၤ(BGF)ကိးအိၣ်ဖှိၣ်၀ဲစွ့ၤကိၣ်ကိၤသ၀ီကရူၢ် သ၀ီၦၤဘၣ်မူဘၣ်ဒါတဖၣ်ဒီး ဃ့၀ဲစ့ဒ်အံၤလီၤအဂ့ၢ်န့ၣ် လီၢ်က၀ီၤဖိစံး၀ဲအသိးသ့ၣ်ညါဘၣ်န့ၣ်လီၤႉ

လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲ“အ၀ဲသ့ၣ်တဲ၀ဲလၢကဘၣ်ထၢနုာ်စ့ဟံၣ်တဖျၢၣ်န့ၣ်(၅၀၀)ဘးမီၤနီၤႉဘၣ်မနုၤအဃိလဲၣ်န့ၣ်မ့ၢ်ဒ်သိးကဆီၣ်ထွဲမၤစၢၤ၀ဲၦၤလၢအကဲသုးတဖၣ်အဂီၢ်မီၤနီၤႉခဲအံၤၦၤစးထီၣ်ထၢစ့လံအဃိဘၣ်စးထီၣ်ထၢနုာ်စ့လံမီၤနီၤႉဖဲသ၀ီပူၤဒုၦၤဟးထၢသုးအသီဒုတအိၣ်ဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ဒူသ၀ီလၢအဘၣ်ထၢနုာ်စ့သ့ၣ်တဖၣ်လၢအမ့ၢ်သဲပိၤသ၀ီႇ၀ါခးဟီႇခၠီစိၤႇ မဲးပံးႇထံလီၤသံးသ၀ီတဖၣ်အံၤမ့ၢ်ဟီၣ်က၀ီၤလၢ(BGF)လုၢ်ဘၢ၀ဲဒီး ဟံၣ်တဖျၢၣ်န့ၣ်ဘၣ်ဟ့ၣ်၀ဲလၢစ့ယိၤ(၅၀၀)ဘး လီၤလၢ၀ဲစ့ပယီၤခံကလီၢ်ဘျဲၣ်ညါအဃိၦၤလၢအကျိၣ်အစ့အိၣ်သ့ၣ်တဖၣ်တၢ်ကီတၢ်ခဲတအိၣ်လၢအ၀ဲသ့ၣ်အဂီၢ်ဘၣ်ဆၣ် မ့မ့ၢ်လၢၦၤမုၢ်ဆ့ၣ်မုၢ်ဂီၤဖိတဖၣ်အဂီၢ်န့ၣ်တၢ်ကီတၢ်ခဲအိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

ဘၣ်ဃးဒီးတၢ်ဂ့ၢ်ကဲထီၣ်သးအံၤ ခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ် ဆဲးကျိး(BGF)ၦၤဘၣ်မူဘၣ်ဒါတဖၣ်ဘၣ်ဆၣ် ဆဲးကျိးတန့ၢ်ဒံး၀ဲဘၣ်န့ၣ်လီၤႉ

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤ ဖၣ်အၣ်ကီၢ်ဆၣ်အပူၤစ့ၢ်ကီး သုးမီၤစိရိၤအစုတီၤအဖီလာ်သုးခိးကီၢ်ဆၢ(BGF)သုးအံၤဟးဖီၣ်၀ဲလီၢ်က၀ီၤဖိလၢကလဲၤပီၣ်တၣ်အဂီၢ်အိၣ်၀ဲအသိး လီၢ်က၀ီၤသ၀ီဖိလၢတၢ်ဖီၣ်အီၤသ့ၣ်တဖၣ်အံၤတၢ်ဃ့အီၣ်၀ဲစ့ဒီးပျၢ်လီၤက့ၤ၀ဲစ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ခီဖျိ(BGF)ဟးလူၤဖီၣ်ပီၣ်တၣ်အဃိ ဖၣ်အၣ်ကီၢ်ဆၣ် ဃိၣ်လိာ်ကျိမုၢ်နုာ်လီၢ်က၀ီၤဒူသ၀ီသးစၢ်တနီၤတုၤလၢခဲအံၤတက့ၤဘၣ်လၢအဟံၣ်အဃီဒံးဘၣ်ဒီး ဘၣ်ဟးစံၣ်အိၣ်ခူသူၣ်ဒံးအဖၢမုၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ