ဘံလ့ဟီၣ်က၀ီၤၦၤစံၣ်အိၣ်ကမှံတဖၣ်သဂၢၢ်ဘၣ်တၢ်ဟၢဖၢလူတၢ်ဆါ

လါမ့ၤ ၄ သီႇ ၂၀၂၂ နံၣ်ႇ ခ့ၣ်အဲးစံၣ်

ခီဖျိတၢ်ဒုးကဲထီၣ်လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤ ဘံလ့ကီၢ်ဆၣ်ပူၤအဃိ သူၣ်က့သးၦၢ်ဒီးဖိဒံဖိသၣ်လၢအဘၣ်ဃ့ၢ်အိၣ်ကမှံတဖၣ်အံၤတနီၤန့ၣ် သဂၢၢ်ဘၣ်၀ဲဒီးတၢ်ဟၢဖၢလူတၢ်ဆါအဂ့ၢ်န့ၣ် သ့ၣ်ညါဘၣ်လၢၦၤမၤစၢၤၦၤစံၣ်အိၣ်ကမှံဖိအအိၣ်န့ၣ်လီၤႉ

ၦၤလၢအသဂၢၢ်ဘၣ်ဒီးတၢ်ဟၢဖၢလူတၢ်ဆါသ့ၣ်တဖၣ်အံၤအါဒၣ်တက့ၢ်န့ၣ်မ့ၢ်ၦၤသ့ၣ်တဖၣ်လၢအလဲၤစံၣ်အိၣ်လၢၦၢ်ပူၤလ့ပူၤတဖၣ်ဒီး ၦၤဟၢဖၢလူသ့ၣ်တဖၣ်အံၤအဂီၢ်လိၣ်ဘၣ်၀ဲကသံၣ်ကသီအဂ့ၢ်န့ၣ် ၦၤလၢအမၤစၢၤၦၤစံၣ်အိၣ်ကမှံဖိတဂၤစံးဘၣ်ခ့ၣ်အဲးစံၣ်န့ၣ်လီၤႉ

အ၀ဲစံး၀ဲလၢ“လ့က့ၣ်သ၀ီဖိလၢအစံၣ်ထီၣ်တဖၣ်န့ၣ်သဂၢၢ်ဘၣ်၀ဲတၢ်ဟၢဖၢလူတၢ်ဆါလီၤႉႉတၢ်လီၢ်လၢၦၤလဲၤတတုၤဘၣ်သ့ၣ်တဖၣ်စ့ၢ်ကီးၦၤတဲလၢကဲထီၣ်သးအိၣ်စ့ၢ်လီၤႉမ့၀ံၤတနီၤန့ၣ်တၢ်ကိၢ်ထီၣ်ႇမ့မ့ၢ်ဖိသၣ်န့ၣ်အအ့ၣ်လူႇဘှီးလီၤႉတၢ်ကိၢ်ဒိၣ်မးႇမ့၀ံၤကပၣ်ဃုာ်လၢအီဘၣ်ထံတကဆှီဘၣ်စ့ၢ်လီၤႉမ့၀ံၤအ၀ဲသ့ၣ်အိၣ်ဖှိၣ်အါအဃိဘၣ်မ့သ့ၣ်ဖိဒံဖိသၣ်ႇသူၣ်က့သးၦၢ်တဖၣ်တူၢ်၀ဲတန့ၢ်ဘၣ်ဧါတသ့ၣ်ညါဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ကတီၢ်ခဲအံၤလၢဘံလ့ကီၢ်ဆၣ်အပူၤၦၤလၢအသဂၢၢ်ဘၣ်ဒီးတၢ်ဟၢဖၢလူတၢ်ဆါအိၣ်၀ဲအဂၤ(၃၀)ဘျဲၣ်တကးဒံးဘၣ် တၢ်လီၢ်တနီၤလၢၦၤဃ့ၢ်တၢ်ဒုးဖိသ့ၣ်တဖၣ်လဲၤအိၣ်အလီၢ်န့ၣ်ခီဖျိထံသံးနိသံးအဃိ ကဲထီၣ်၀ဲထံဘၣ်အၢဘၣ်သီတဖၣ်ဒီး ကဒိးန့ၢ်ဘၣ်ထံအီလၢအကဆှီဒီးကအီလုၢ်ဘၣ်ထံအဂီၢ် တၢ်ကီတၢ်ခဲဟဲအိၣ်ထီၣ်၀ဲအဂ့ၢ်န့ၣ် ၦၤလၢအမၤစၢၤၦၤစံၣ်အိၣ်ကမှံဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ

လၢန့ၣ်အမဲာ်ညါလၢခ့ၣ်အဲၣ်ယူၣ်မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤတကပၤစ့ၢ်ကီး ခီဖျိပယီၤသုးခးလီၤကျိဖးဒိၣ်တဖၣ်အဃိ သ၀ီ(၃)ဖျၢၣ်သ၀ီဖိလၢအလဲၤဃ့ၢ်အိၣ်ကဒုသးဆူ(သုးက့ ၁)ဟီၣ်က၀ီၤပူၤအံၤတနီၤစ့ၢ်ကီးန့ၣ် ဘၣ်ကူဘၣ်ဂာ်၀ဲတၢ်ညၣ်ဂိၢ်တၢ်ဆါအိၣ်၀ဲအဂ့ၢ်န့ၣ် ၦၤလၢအမၤစၢၤၦၤစံၣ်အိၣ်ကမှံဖိတဖၣ်စံး၀ဲန့ၣ်လီၤႉ

ဖဲအပူၤကွံာ်လါမ့ၤ ၁ သီအနံၤန့ၣ် တသီအတီၢ်ပူၤ ခီဖျိသုးမီၤစိရိၤကဘီယူၤဟဲခးလီၤတၢ်(၂)ဘျီလၢဘံလ့ကီၢ်ဆၣ် လ့က့ၣ်သ၀ီပူၤအဃိလ့က့ၣ်ႇတၤပီႇကွံလ့ႇပယၢ်ရီႇထံလ့ခီၣ်ႇထံခၠံၣ်ဘီႇကၠီၣ်တီၤလ့ႇတက့လီႇသူကဘံႇကၠီၣ်ဖၠၤကါမဲသ၀ီအဖျၢၣ်(၁၀)ဘျဲၣ်လီၢ်က၀ီၤဖိဘၣ်ဃ့ၢ်ထီၣ်၀ဲသ၀ီဒီတဖျၢၣ်ညါဒီးကတီၢ်ခဲအံၤၦၤလီၢ်အိၣ်ကမှံအနီၣ်ဂံၢ်အိၣ်၀ဲ(၁၀ႇ၀၀၀)ဃၣ်ဃၣ်လံအဂ့ၢ်န့ၣ် သ့ၣ်ညါဘၣ်လၢခ့ၣ်အဲၣ်ယူၣ်ၦၤဘၣ်မူဘၣ်ဒါအအိၣ်န့ၣ်လီၤႉ

လီၢ်က၀ီၤၦၤစံၣ်အိၣ်ကမှံဖိလၢအဘၣ်ပာ်တ့ၢ်ကွံာ်အဟံၣ်အဃီအတၢ်လီၢ်တၢ်ကျဲသ့ၣ်တဖၣ်အံၤအဂီၢ် လိၣ်ဘၣ်၀ဲကသံၣ်ကသီအမဲာ်ညါတၢ်အိၣ်တၢ်ဆိးလီၢ်ကျဲအဂီၢ်လိၣ်ဘၣ်၀ဲတၢ်ခိၣ်ဒုးသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ