လါမ့ၤ ၃ သီႇ ၂၀၂၂ နံၣ်ႇ ခ့ၣ်အဲးစံၣ်
တၢ်ထီၣ်မၤန့ၢ်၀ၣ်လူၢ်ပယီၤသုးကလၢၤလၢအအိၣ်ဖဲကညီဒီကလုာ်စၢဖှိၣ်ကရၢ–ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤပူၤအံၤ၀ံၤအလီၢ်ခံ တသီအတီၢ်ပူၤပယီၤသုးကဘီယူၤဟဲခးလီၤတၢ်တစှၤန့ၢ်(၁၀)ဘျီဘၣ်အဂ့ၢ်န့ၣ် ခ့ၣ်အဲၣ်ယူၣ်–မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲတနံၤအံၤန့ၣ်လီၤႉ
ဖဲအပူၤကွံာ်လါအ့ဖြ့ၣ် ၂၈ သီအနံၤ ခ့ၣ်အဲၣ်ယူၣ်(သုးက့ ၅)ဒီးသိၣ်မှံၤအၦၤ လဲၤထီၣ်မၤန့ၢ်ကွံာ်၀ၣ်လူၢ်ပယီၤသုးကလၢၤလၢအအိၣ်ဖဲဃိၣ်လိာ်ကျိကၢၢ်ခိၣ်အံၤ၀ံၤအလီၢ်ခံ ပယီၤသုးကဘီယူၤဟဲက့ၤခးလီၤကဒါတၢ်ဒီး ဖဲအပူၤကွံာ်လါမ့ၤ ၁ သီ တနံၤဃီအတီၢ်ပူၤ ပယီၤသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်အဘျီ(၁၀)ဃၣ်ဃၣ်လၢမုၢ်တြီၢ်ကီၢ်ရ့ၣ် လူၢ်သီကီၢ်ဆၣ် ဒ့ၣ်ဘူးနိၣ်ဒီးသ့ၣ်ကၢ်ထၣ်သ၀ီတဖၣ်အပူၤအဂ့ၢ်န့ၣ် မုၢ်တြီၢ်တၢ်ကစီၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ခီဖျိကဘီယူၤဟဲခးလီၤတၢ်အဃိဟံၣ်ဃီတၢ်သူၣ်ထီၣ်ဟးဂုာ်ဟးဂီၤအိၣ်၀ဲတဆံးတက့ၢ်ဒီး လီၢ်က၀ီၤဖိဘၣ်ဒိဘၣ်ထံးတအိၣ်၀ဲဘၣ်ဆၣ်သနါက့ တုၤလၢခဲအံၤတစုပယီၤသုးတကပၤဟဲဆှၣ်ဃုသ့ၣ်ညါတၢ်ဒီးကဘီယူၤ(drone)ကိးမုၢ်ဆါမုၢ်နၤအဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ
ဒ်န့ၣ်အသိးဖဲလါမ့ၤ(၁)အနံၤစ့ၢ်ကီး ခီဖျိပယီၤသုးမီၤစိရိၤပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ–၈)အဖီလာ် ခီၣ်ချ့သုးရ့ၣ်(ခမရ–၄၀၈)လၢအအိၣ်ဆီလီၤသးဖဲမာ်ထီသ၀ီတဖၣ်ခးလီၤကျိဖးဒိၣ်(၈၁–မမ) ၃ ဖျၢၣ်ဆူဘုသိၣ်ကီၢ်ဆၣ် မဲၢ်ညူးကရူၢ် မဲၢ်ညူးထၣ်သ၀ီပူၤအဃိ မ့ၣ်အူအီၣ်ဟးဂီၤကွံာ်သ၀ီဖိစီၤဖါကၢၤအဘုဖီလၢဘုဘ့ၣ်အိၣ်(၉၀)နာ်တဖျၢၣ်ႇစဲးဂံာ်ဘုတဖျၢၣ်ဒီး လီၢ်က၀ီၤဖိဆၣ်ဖိကီၢ်ဖိဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ပယီၤသုးမီၤစိရိၤ(၄၃၄)သုးရ့ၣ်လၢအအိၣ်ဆီလီၤသးဖဲ၀ၣ်လူၢ်သုးကလၢၤအံၤ မ့ၢ်၀ဲ(KNLA)ႇကီၢ်ပယီၤကမျၢၢ်တၢ်ထူၣ်ဖျဲးသုးမုၢ်ဒိၣ်(BPLA)ဒီးသိၣ်မှံၤသုးပာ်ဖှိၣ်လၢအဂၤတဖၣ်လဲၤထီၣ်မၤန့ၢ်၀ဲဒီး ခီဖျိပယီၤသုးကဘီယူၤဟဲက့ၤတ့ၢ်လီၤမ့ၣ်ပိၢ်လၢသုးကလၢၤအခိၣ်အဃၢၤဖဲမဲၢ်ညူးသ၀ီပူၤအဃိ လီၢ်က၀ီၤဖိတဖၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် (BPLA)ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ
ဒ်န့ၣ်အသိးဖဲလါမ့ၤ ၁ သီ တနံၤဃီအတီၢ်ပူၤန့ၣ် ခီဖျိပယီၤသုးကဘီယူၤဟဲခးလီၤတၢ်(၂)ဘျီလၢခ့ၣ်အဲၣ်ယူၣ်ဒူသထူၣ်ကီၢ်ရ့ုၣ်(သုးက့ ၁)ဟီၣ်က၀ီၤ ဘံလ့ကီၢ်ဆၣ် လ့က့ၣ်သ၀ီပူၤအဃိ မ့ၣ်အူအီၣ်ကွံာ်လီၢ်က၀ီၤအဟံၣ်(၁၀)ဖျၢၣ်ဒီးဟံၣ်ဃီလၢအဂၤတဖၣ်စ့ၢ်ကီးဟးဂုာ်ဟးဂီၤ၀ဲအါမးအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
စးထီၣ်ဖဲကညီဒီကလုာ်ဂၢၤသးကရၢ(KNDO)သုးရ့ၣ်–၂ ထုးထီၣ်လံာ်ဟ့ၣ်ပလီၢ်၀ဲလၢ သုးခိးကီၢ်ဆၢ(BGF)ဒီးပယီၤသုးကလၢၤလၢအအိၣ်ဖဲခ့ၣ်အဲၣ်ယူၣ်(သုးက့ ၁)ဟီၣ်က၀ီၤ လ့က့ၣ်ဒီးတၤပီသ၀ီအပူၤတဖၣ်လါအ့ဖြ့ၣ် ၂၃ သီလီၢ်ခံကတၢၢ်ကဟးထီၣ်ကွံာ်လၢဟီၣ်က၀ီၤအပူၤ၀ံၤအလီၢ်ခံ မ့ၢ်လၢပယီၤသုးတကပၤတဟးထီၣ်၀ဲဘၣ်အဃိ တၢ်ခးလိာ်သးဘၣ်ဟဲကဲထီၣ်၀ဲဒၣ်ဒီး အဆိကတၢၢ်တဘျီပယီၤသုးကဘီယူၤဟဲခးလီၤတၢ်လၢခ့ၣ်အဲၣ်ယူၣ်(သုးက့ ၁)ဟီၣ်က၀ီၤအပူၤကဲထီၣ်သးန့ၣ်လီၤႉ
