လၢကထီၣ်မၤန့ၢ်က့ၤသ့ၣ်ဘီဘိသုးကလၢၤအဂီၢ် ပယီၤသုးမၤအါထီၣ်သုးဂံၢ်ဘါလၢဖလူဖးဒိၣ်သ၀ီပူၤ

လါမ့ၤ ၃၁ သီႇ ၂၀၂၂ နံၣ်ႇ ခ့ၣ်အဲးစံၣ်

ဒ်သိးကလဲၤထီၣ်မၤန့ၢ်က့ၤခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၆)ဟီၣ်က၀ီၤ သ့ၣ်ဘီဘိသုးကလၢၤအံၤအဂီၢ်န့ၣ်ပယီၤသုးပာ်ဖှိၣ်ထီၣ်သးအါအါဂီၢ်ဂီၢ်လၢဖလူဖးဒိၣ်သ၀ီသုးခိးကီၢ်ဆၢ(BGF)သုးကလၢၤဒီးမၤအါထီၣ်သုးဂံၢ်ဘါႇကျိချံၦာ်သၣ်ဂံၢ်ဘါတဖၣ်အဂ့ၢ်န့ၣ် လီၢ်က၀ီၤဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤႉ

ဖဲအပူၤကွံာ်လါမ့ၤ ၁၈ သီအနံၤန့ၣ် (KNLA၊KNDO)သုးပာ်ဖှိၣ်လဲၤထီၣ်မၤန့ၢ်၀ဲသ့ၣ်ဘီဘိပယီၤသုး ကလၢၤ၀ံၤအလီၢ်ခံခီဖျိတၢ်ကးတံၢ်ကွံာ်ပယီၤသုးတၢ်အီၣ်ကျိၤႇကျိချံၦာ်သၣ်အကျဲလၢလ့က့ၣ်ကီာ်–သ့ၣ်ဘီဘိ–ဂီၤလ့ၤဟီၣ်က၀ီၤပူၤအဃိ(KNLA)သုးပာ်ဖှိၣ်ထီၣ်မၤန့ၢ်၀ဲပယီၤသုးကလၢၤတပယူာ်ဃီန့ၣ်လီၤႉ

လၢတၢ်န့ၣ်အဃိပယီၤသုးအံၤကပာ်ဖှိၣ်ထီၣ်သးဒီး(BGF)လၢအိၣ်ဆီလီၤသးဖဲမၠၣ်၀တံၣ်အတၢ်တီခိၣ်ရိၣ်မဲဒီး စှၤသီအတီၢ်ပူၤလၢကနုာ်လီၤမၤဒုးယၤတၢ်ဟူးတၢ်ဂဲၤလၢကထီၣ်မၤန့ၢ်က့ၤသုးကလၢၤအံၤအဂီၢ်န့ၣ် မၤအါထီၣ်၀ဲအသုးဂံၢ်ဘါအါအါဂီၢ်ဂီၢ်အဂ့ၢ်န့ၣ် လီၢ်က၀ီၤ(KNLA)ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤႉ

“စးထီၣ်လၢပမၤန့ၢ်သ့ၣ်ဘီဘိသုးကလၢၤန့ၣ်ပယီၤသုးကလၢၤလၢအဟဲဆီလီၤသးဖဲအံၤအၦၤတဖၣ်အသးသဟီၣ်လီၤစၢ်၀ဲလီၤႉဆိမိၣ်၀ဲမ့ၢ်တၢ်ကဟဲခးအ၀ဲသ့ၣ်သုးကလၢၤဆံးယံာ်လဲၣ်မီၤနီၤႉပ၀ဲဒၣ်နါက့ပကတဲၤကတီၤထီၣ်သးႇမ့ၢ်အကဟဲထီၣ်ခးၦၤဖဲလဲၣ်တနံၤလဲၣ်မီၤနီၤႉပအိၣ်လၢတၢ်ပလီၢ်ပဒီပူၤႇပပာ်ဖှိၣ်ထီၣ်သးကရူၢ်ခဲလၢာ်လီၤႉခဲအံၤပဒိးန့ၢ်ဘၣ်တၢ်ကစီၣ်လၢအ၀ဲသ့ၣ်မၤအါထီၣ်အၦၤလၢဖလူဖးဒိၣ်ႇလ့က့ၣ်ကိာ်ႇလဲၣ်ခၣ်တီၤတကပၤမီၤနီၤႉမ့ဟဲထီၣ်ခး၀ဲဘျီမးပကသ့ၣ်ညါဘၣ်လီၤႉပသ့ၣ်ညါဘၣ်လၢအိၣ်ဖှိၣ်အါလၢဖလူဖးဒိၣ်သ၀ီမီၤနီၤ”အဂ့ၢ်န့ၣ် (KNLA)ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤႉ

လၢန့ၣ်အမဲာ်ညါမုၢ်နၤခီန့ၣ်ကဘီယူၤဟဲဃုသ့ၣ်ညါတၢ်အိၣ်၀ဲအသိးလၢမုၢ်ဆါခီန့ၣ်လ့က့ၣ်ကိာ်ကျိဖးဒိၣ်လူၢ်တကပၤခးလီၤစ့ၢ်ကီးကျိဖးဒိၣ်န့ၣ်လီၤႉကတီၢ်ခဲအံၤကမၤ၀ဲတၢ်ဒုးလၢကဘီယူၤအမဲာ်ညါန့ၣ်ကသူ၀ဲကျိဖးဒိၣ်နုာ်လီၤမၤဒုးယၤတၢ်ဟူးတၢ်ဂဲၤလၢပျီပူၤအဂ့ၢ်န့ၣ်(KNLA)ဂံၢ်ခီၣ်ထံးတၢ်ကစီၣ်တခါဃီ၀ဲန့ၣ်စံးအါထီၣ်၀ဲန့ၣ်လီၤႉ

လၢခ့ၣ်အဲၣ်ယူၣ်(သုးက့ ၆)ဒူပျာ်ယာ်ကီၢ်ရ့ၣ် လ့က့ၣ်ကိာ်ႇဘျၢၣ်ဒိၣ်ႇသ့ၣ်ဘီဘိႇဂီၤလ့ၤႇ အူကြ့ၣ်ထၣ်လီၢ်က၀ီၤတကပၤန့ၣ်(KNLA၊KNDO)သုးပာ်ဖှိၣ်ကရူၢ်ဒီးပယီၤသုးတဖၣ်အဘၢၣ်စၢၤသုးတၢ်ဖ့ၣ်စၢအိၣ်ဒံး၀ဲဒီးဒ်န့ၣ်အသိးလၢကၠၤအ့စ့ၣ်ကၠံႇချၢၣ်တကူၣ်တၢၣ်သ၀ီတကပၤန့ၣ်စ့ၢ်ကီးတုၤလၢတနံၤအံၤလါမ့ၤ ၃၁ သီဂီၤခီန့ၣ် တၢ်ဒုးကဲထီၣ်ဒံး၀ဲဒီးပယီၤသုးတဖၣ်အဂ့ၢ်န့ၣ် လီၢ်က၀ီၤဂံၢ်ခီၣ်ထံးတၢ်ကစီၣ်စံး၀ဲအသိးသ့ၣ်ညါဘၣ်န့ၣ်လီၤႉ

ခီဖျိပယီၤသုးလၢအိၣ်ဆီလီၤသးဖဲချၢၣ်–တကူၣ်တၢၣ်ပၢၤကီၢ်၀ဲၤလီၢ်ကရၢၢ်ပူၤအံၤတဖၣ် ခးလီၤကျိဖးဒိၣ်ဆူလီၢ်က၀ီၤဒူသ၀ီပူၤအဃိ ကမျၢၢ်အဟံၣ်အဃီဟးဂူာ်ဟးဂီၤ၀ဲဒီး ကမျၢၢ်သံဘၣ်ဒိဘၣ်ထံးကဲထီၣ်ဒံး၀ဲကွ့ၢ်ကွ့ၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ