Home တၢ်ကစီၣ် ပယီၤသုးပညိၣ်ကမျၢၢ်ထံဖိကီၢ်ဖိဒီးခးလီၤကျိဖးဒိၣ်ဆူချၢၣ်လွံၢ်ထူၣ်ကီၢ်ရ့ၣ်ပူၤကိးနံၤဒဲးဃၣ်ဃၣ်

ပယီၤသုးပညိၣ်ကမျၢၢ်ထံဖိကီၢ်ဖိဒီးခးလီၤကျိဖးဒိၣ်ဆူချၢၣ်လွံၢ်ထူၣ်ကီၢ်ရ့ၣ်ပူၤကိးနံၤဒဲးဃၣ်ဃၣ်

339
0

လါယူၤ ၂၇ သီႇ ၂၀၂၂ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)ဟီၣ်က၀ီၤအပူၤန့ၣ် တလါအံၤအတီၢ်ပူၤ ပယီၤသုးပညိၣ်လီၢ်က၀ီၤကမျၢၢ်ထံဖိကီၢ်ဖိဒီးခးလီၤကျိဖးဒိၣ်ဆူချၢၣ်လွံၢ်ထူၣ်ကီၢ်ရ့ၣ်ပူၤကိးမုၢ်နံၤဒဲးဃၣ်ဃၣ်အဂ့ၢ်န့ၣ် လီၢ်က၀ီၤကညီၦၤဂ့ၢ်၀ီကရူၢ်ထုးထီၣ်ပာ်ဖျါ၀ဲဖဲမဟါလါယူၤ ၂၆ သီအနံၤန့ၣ်လီၤႉ

ပယီၤသုးအံၤအိးထီၣ်၀ဲတၢ်ဒုးမဲာ်သၣ်ဟဲအါထီၣ်လၢခ့ၣ်အဲၣ်ယူၣ်(သုးက့ ၃)ဟီၣ်က၀ီၤအပူၤဒီး ကိးမုၢ်နံၤဒဲးတၢ်ဒုးကဲထီၣ်၀ဲဒၣ်အသိး ခီဖျိပယီၤသုးအံၤခးလီၤကျိဖးဒိၣ်ဆူဒူသ၀ီပူၤကိးမုၢ်နံၤဒဲးအဃိ လီၢ်က၀ီၤသ၀ီဖိတဖၣ်ဘၣ်ဃ့ၢ်ထီၣ်ဟဲအါထီၣ်၀ဲအဂ့ၢ်န့ၣ် ချၢၣ်လွံၢ်ထူၣ်ကီၢ်ရ့ၣ်လီၢ်က၀ီၤကညီၦၤဂ့ၢ်၀ီကရူၢ်အၦၤကတိၤတၢ်ပၢစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ပယီၤသုးအံၤအိးထီၣ်၀ဲဒၣ်တၢ်ဒုးမဲာ်သၣ်လၢချၢၣ်လွံၢ်ထူၣ်ကီၢ်ရ့ၣ်ဟီၣ်က၀ီၤပူၤဒီးခးလီၤကျိဖးဒိၣ်တဖၣ်မီၤနီၤႉမ့ဘၣ်တဲန့ၣ်ပညိၣ်၀ဲဒၣ်ကမျၢၢ်လၢတၢ်ဂ့ၢ်တအိၣ်နီတမံၤဘၣ်ဒီးခးလီၤ၀ဲဒ်အံၤန့ၣ်လီၢ်က၀ီၤဖိတဖၣ်သံဘၣ်ဒိဘၣ်ထံးႇဘၣ်ဃ့ၢ်ထီၣ်ဟဲအါထီၣ်မီၤနီၤႉတလါညါအံၤအတီၢ်ပူၤန့ၣ်ခးလီၤ၀ဲကိးမုၢ်နံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ဒ်န့ၣ်အသိးခီဖျိပယီၤသုးခးလီၤကျိဖးဒိၣ်အဃိလီၢ်က၀ီၤဖိသူၣ်က့သးၦၢ်တဖၣ်အတၢ်အိၣ်ဆူၣ်အိၣ်ချ့ဟဲနးထီၣ်၀ဲဒီးကၠိထီၣ်အကတီၢ်စ့ၢ်ကီးလီၢ်က၀ီၤဖိဒံဖိသၣ်တဖၣ်တထီၣ်ဘၣ်ကၠိဘၣ်ဃ့ၢ်ထီၣ်၀ဲဒီးလီၢ်က၀ီၤကမျၢၢ်တဖၣ်ထံၣ်ဘၣ်၀ဲအိၣ်ဆိးအီၣ်အီတၢ်ကီတၢ်ခဲဟဲအါထီၣ်၀ဲအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါပယီၤသုးအံၤမၢ၀ဲဒၣ်(ခ့ၣ်အဲၣ်ယူၣ်)တၢ်ကရၢကရိလၢအိၣ်လၢၢ်ဒိၣ်ကီၢ်ဆၣ်သ၀ီအဖျၢၣ်(၁၂၀)ဘျဲၣ်အပူၤတဖၣ်ကဟးထီၣ်ကွံာ်လၢသ၀ီပူၤဒီးတဲပျံၤ၀ဲလၢ(ခ့ၣ်အဲၣ်ယူၣ်)မ့တဟးထီၣ်ဘၣ်န့ၣ်လီၢ်က၀ီၤဖိကဘၣ်ဟးထီၣ်၀ဲအဂ့ၢ်န့ၣ် လီၢ်က၀ီၤကညီၦၤဂ့ၢ်၀ီကရူၢ်အၦၤကတိၤတၢ်ပၢစံးအါထီၣ်၀ဲဒ်အံၤန့ၣ်လီၤႉ

အ၀ဲစံး၀ဲလၢ“ပယီၤသုးမၢသ၀ီအဖျၢၣ်(၁၂၀)ဘျဲၣ်လၢအိၣ်လၢၢ်ဒိၣ်ကီၢ်ဆၣ်ပူၤတဖၣ်အံၤတဲဘၣ်ခ့ၣ်အဲၣ်ယူၣ်လၢကဟးထီၣ်ကွံာ်လၢသ၀ီပူၤႉမ့တဟးထီၣ်ဘၣ်န့ၣ်သ၀ီဖိကဘၣ်ဟးထီၣ်ႉမ့တမၤဒ်န့ၣ်ဘၣ်န့ၣ်တဲပျံၤ၀ဲလၢကခးလီၤကျိဖးဒိၣ်လၢသ၀ီပူၤမီၤနီၤႉဘၣ်ဃးတၢ်ဂ့ၢ်၀ဲအံၤန့ၣ်အ၀ဲသ့ၣ်တဲဃာ်၀ဲဒူသ၀ီခိၣ်နၢ်တနီၤမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ

ဘၣ်ဃးဒီးတၢ်ဂ့ၢ်အံၤဖဲလါယူၤ ၂၄ သီအနံၤန့ၣ် KNU ထုးထီၣ်ပာ်ဖျါဒံး၀ဲလၢ ပယီၤသုးဟ့ၣ်ပလီၢ်တဲပျံၤနီဟးထီၣ်လၢၢ်ဒိၣ်ကီၢ်ဆၣ်ပူၤသ၀ီကရူၢ်(၃)ကရူၢ်လၢသ၀ီအိၣ်(၁၅)ဖျၢၣ်အံၤကဟးထီၣ်ကွံာ်လၢသ၀ီပူၤန့ၣ်လီၤႉ

ကတီၢ်ခဲအံၤပယီၤသုးလၢအနုာ်လီၤမၤဒုးယၤတၢ်ဟူးတၢ်ဂဲၤလၢခ့ၣ်အဲၣ်ယူၣ်(သုးက့ ၃)ဟီၣ်က၀ီၤအပူၤတဖၣ်မ့ၢ်၀ဲခီၣ်ချ့သုးရ့ၣ်(ခမရ–၂၀)ႇ(ခမရ–၁၂၄)ႇ(ခမရ–၄၃၉)ဒီး (ခမရ–၃၅၀)သုးပာ်ဖှိၣ်တဖၣ်ဒီးၦၤလၢအကိးထံၣ်ဟ့ၣ်ပလီၢ်လီၢ်က၀ီၤခိၣ်နၢ်တဖၣ်အံၤစ့ၢ်ကီးမ့ၢ်၀ဲ(ခမရ–၂၀)သုးရ့ၣ်ခိၣ် အနီၢ်ကစၢ်ဒၣ်၀ဲအဂ့ၢ်န့ၣ် သ့ၣ်ညါဘၣ်ဒ်ခ့ၣ်အဲၣ်ယူၣ််လံာ်တၢ်ပာ်ဖျါပူၤအသိးန့ၣ်လီၤႉ

စးထီၣ်ဖဲအပူၤကွံာ်လါယနူၤအါရံၤန့ၣ်ပယီၤသုးနုာ်လီၤမၤဒုးယၤတၢ်ဟူးတၢ်ဂဲၤလၢခ့ၣ်အဲၣ်ယူၣ်(သုးက့ ၃)ဟီၣ်က၀ီၤအပူၤႇကးတံၢ်ဃာ်၀ဲကျဲတၢ်ဟးထီၣ်က့ၤလီၤဒီးခံခီခံကပၤတၢ်ဘၣ်သဂၢၢ်ခးလိာ်သးကဲထီၣ်တကးဒံးဘၣ်အမဲာ်ညါပယီၤသုးခးလီၤကျိဖးဒိၣ်ဆူဒူသ၀ီပူၤဟဲအါထီၣ်၀ဲဒီးဖီၣ်မၣ်ဒၢၣ်မၤလီၤကမျၢၢ်တဖၣ်လၢတၢ်ဂ့ၢ်တအိၣ်နီတမံၤဘၣ်အိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

ကတီၢ်ခဲအံၤလၢလၢၢ်ဒိၣ်ကီၢ်ဆၣ်အပူၤန့ၣ်ၦၤလီၢ်အိၣ်ကမှံဖိလၢတက့ၤဘၣ်ဒံးဆူအဒူသ၀ီတၢ်လီၢ်တၢ်ကျဲအိၣ်ဒံး၀ဲအဂၤ(၅ႇ၀၀၀)ဘျဲၣ်အဂ့ၢ်န့ၣ် ၦၤလၢမၤစၢၤၦၤလီၢ်အိၣ်ကမှံဖိတဖၣ်စံး၀ဲန့ၣ်လီၤႉ