Home တၢ်ကစီၣ် ပၢၤကီၢ်သုးဒီးအဟံၣ်ဖိဃီဖိလီၤမၢ်(၁၆)ဂၤဖဲတၢ်ထီၣ်န့ၢ်ဂီၤလ့ၤပၢၤကီၢ်၀ဲၤလီၢ်အခါ

ပၢၤကီၢ်သုးဒီးအဟံၣ်ဖိဃီဖိလီၤမၢ်(၁၆)ဂၤဖဲတၢ်ထီၣ်န့ၢ်ဂီၤလ့ၤပၢၤကီၢ်၀ဲၤလီၢ်အခါ

285
0
Photo: KNDO

လါယူၤ ၁၄ သီႇ ၂၀၂၂ နံၣ်ႇ ခ့ၣ်အဲးစံၣ်

ဖဲမဟါလါယူၤ ၁၃ သီ ဂီၤခီအဆၢကတီၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇ ကညီဒီကလုာ်ဂၢၤသးကရၢ(KNDO)သုးပာ်ဖှိၣ်ထီၣ်မၤန့ၢ်၀ဲမၠၣ်၀တံၣ်ကလံၤထံး ဂီၤလ့ၤပၢၤကီၢ်၀ဲၤလီၢ်တၢ်လီၢ်ဒီးဖဲန့ၣ်ပၢၤကီၢ်သုးဃုုာ်ဒီးအဟံၣ်ဖိဃီဖိ(၁၆)ဂၤလီၤမၢ်တုၤလၢခဲအံၤအဂ့ၢ်န့ၣ် သ့ၣ်ညါဘၣ်လၢၦၤဘူးဒီးပယီၤသုးတဖၣ်အအိၣ်န့ၣ်လီၤႉ

ဖဲမဟါ(KNLA/KNDO)သုးပာ်ဖှိၣ်လဲၤထီၣ်မၤန့ၢ်ပၢၤကီၢ်၀ဲၤလီၢ်တၢ်လီၢ်အခါဖီၣ်ချုး၀ဲပၢၤကီၢ်သုး(၃)ဂၤႇမၤန့ၢ်ကျိချံၦာ်သၣ်တနီၤဒီးဖဲဟါခီအဆၢကတီၢ်န့ၣ်ပၢၤကီၢ်သုးတဖၣ်ဟဲက့ၤဆူပၢၤကီၢ်၀ဲၤလီၢ်အခါပၢၤကီၢ်သုးဒီးအဟံၣ်ဖိဃီဖိလီၤမၢ်၀ဲခဲလၢာ်(၁၆)ဂၤတုၤလၢခဲအံၤဆဲးကျိးတန့ၢ်ဒံးဘၣ်အဂ့ၢ်န့ၣ်ဂံၢ်ခီၣ်ထံးၦၤဟ့ၣ်တၢ်ကစီၣ်ဖိလၢအဘူးဒီးပယီၤသုးအံၤစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ပၢၤကီၢ်သုးတဖၣ်ဖဲအ၀ဲသ့ၣ်ဟဲက့ၤတုၤလၢပၢၤကီၢ်၀ဲၤလီၢ်အခါန့ၣ်သမံသမိးကွၢ်၀ဲအၦၤႇ တၢ်ဖိတၢ်လံၤႇကျိချံၦာ်သၣ်ဘျီဒုပသ့ၣ်ညါဘၣ်လၢပၢၤကီၢ်ခိၣ်(၂)တဂၤႇပၢၤကီၢ်သုးစကီၤ(၁)ဂၤႇပၢၤကီၢ်သုးစကီၤပြံ(၁)ဂၤႇပၢၤကီၢ်သုးဖိ(၇)ဂၤဒီးအဟံၣ်ဖိဃီဖိပိာ်မုၣ်(၃)ဂၤႇဖိသၣ်(၂)ဂၤခဲလၢာ်(၁၆)ဂၤလီၤမၢ်တုၤလၢခဲအံၤဟဲက့ၤတတုၤလၢတၢ်လီၢ်ဒံးဘၣ်မီၤနီၤႉမ့ၢ်ဖဲကညီကရူၢ်နုာ်လီၤရှဲလဲတၢ်အခါဖီၣ်န့ၢ်၀ဲဧါႇမ့ၢ်အလဲၤစံၣ်အိၣ်ခူသူၣ်ကျဲၣ်ကျီလၢဂီၤလ့ၤက၀ီၤဒ့ကမျၢၢ်အကျါဧါႇမ့ၢ်အလဲၤခီဃီၤလၢကၠီၣ်တဲၣ်တကပၤခီဧါန့ၣ်ပဃုသ့ၣ်ညါအဖၢမုၢ်လီၤ”အဂ့ၢ်န့ၣ် စံး၀ဲန့ၣ်လီၤႉ

တၢ်လဲၤထီၣ်မၤန့ၢ်ဂီၤလ့ၤပၢၤကီၢ်၀ဲၤလီၢ်၀ံၤအလီၢ်ခံဖဲ(KNLA/KNDO)သုးပာ်ဖှိၣ်နုာ်လီၤမၤရှဲလဲပၢၤကီၢ်၀ဲၤလီၢ်အခါန့ၣ်တၢ်ဖီၣ်န့ၢ်၀ဲပၢၤကီၢ်ၦၤ(၅)ဂၤႇအဟံၣ်ဖိဃီဖိ(၅)ဂၤဒီးတၢ်ပာ်အ၀ဲသ့ၣ်လၢ(KNDO)သုးကလၢၤဂ့ၤဂ့ၤလီၤအဂ့ၢ်န့ၣ် သုးပာ်ဖှိၣ်တကပၤစံး၀ဲန့ၣ်လီၤႉ

Photo: KNDO

(KNDO)သုးရ့ၣ်လီၤဆီသုးရ့ၣ်ခိၣ်သုးခိၣ်ဒိၣ်ဂီၢ်ဂ့ၢ်စီၤစးလိစံး၀ဲလၢ“ပတဲအ၀ဲသ့ၣ်လၢပာ်လီၤတၢ်စုက၀ဲၤႇပတပာ်သုလၢဒုၣ်ဒါဘၣ်ႇပပာ်နသုလၢပပုၢ်ပ၀ဲၢ်လီၤႉတဘၣ်လိၣ်ပျံၤၦၤဘၣ်ႉတၢ်အိၣ်မူလၢအလီၢ်လံၤလၢအတဂ့ၤဘၣ်တဖၣ်န့ၣ်တၢၤကွံာ်အီၤသူၣ်ထီၣ်တၢ်အိၣ်မူလၢအသီႉနသုကမၤတၢ်ပၢၢ်ဆၢဧါမ့တမ့ၢ်သုကက့ၤလၢဟံၣ်ဧါႉနသုကဃုဖံးအီၣ်မၤအီၣ်ဧါႇနသုကအိၣ်ဖဲအံၤဧါန့ၣ်တဲဖျါၦၤပကမၤန့ၢ်သုလၢအဘၣ်ဂီၢ်ယတဲအ၀ဲသ့ၣ်ဒ်န့ၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

တၢ်နုာ်လီၤမၤရှဲလဲတၢ်လီၢ်အခါထံၣ်န့ၢ်၀ဲပၢၤကီၢ်ၦၤသံအစိၣ်(၂)ဂၤဒီးတၢ်မၤန့ၢ်၀ဲကျိခဲလၢာ်(၈)ခိၣ်ဃုာ်ဒီးကျိချံၦာ်သၣ်တနီၤဒီးမၤထူၣ်ဖျဲးထီၣ်၀ဲတၢ်ဒီသဒၢကမျၢၢ်သုး(PDF)အၦၤ ၉ ဂၤ လၢတၢ်ဖီၣ်ဃာ်အီၤလၢပၢၤကီၢ်၀ဲၤလီၢ်အံၤအဂ့ၢ်န့ၣ် (KNLA/KNDO)သုးကျိၤသုးပာ်ဖှိၣ်စံး၀ဲန့ၣ်လီၤႉ

“ပဟဲက့ၤထီၣ်တလၢပၢၤကီၢ်၀ဲၤလီၢ်အခါန့ၣ်ဂီၤလ့ၤကျိဖးဒိၣ်လူၢ်ခးလီၤကၠိကျိဖးဒိၣ်(၁၂၀)မီၤနီၤႉဖဲန့ၣ်ဘၣ်ဒိ၀ဲဘၣ်(PDF)ဖိသၣ်မုၣ်ခံဂၤႇၦၤသုးဖိတဂၤႇပၢၤကီၢ်သုးလၢပဟဲက့ၤဖီၣ်န့ၣ်(၂)ဂၤမီၤနီၤႉနါက့ဘၣ်တဆါစ့ၢ်ဘၣ်တၢ်ဘၣ်ယိၣ်ဒုတအိၣ်ဘၣ်ႉပကွၢ်ထွဲအ၀ဲသ့ၣ်ဂ့ၤဂ့ၤႇပဒုးအီၣ်ဒုးအီအ၀ဲသ့ၣ်ဂ့ၤဂ့ၤလီၤ”အဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ်စီၤစးလိစံးအါထီၣ်၀ဲန့ၣ်လီၤႉ

ဂီၤလ့ၤပၢၤကီၢ်၀ဲၤလီၢ်လၢပၢၤကီၢ်ခိၣ်လၣ်သ့တီခိၣ်ရိၣ်မဲ၀ဲအံၤသုးဂံၢ်ဘါအိၣ်၀ဲ(၂၄)ဂၤႇအဟံၣ်ဖိဃီဖိ(၄)ဂၤအိၣ်ဆိး၀ဲဒီး ဖဲ(KNLA/KNDO)သုးပာ်ဖှိၣ်လဲၤထီၣ်မၤန့ၢ်ပၢၤကီၢ်၀ဲၤလီၢ်အံၤအကတီၢ် ခီဖျိၦၤနီၣ်ဂံၢ်စှၤအဃိအ၀ဲသ့ၣ်ပာ်တ့ၢ်ကွံာ်တၢ်လီၢ်စံၣ်ဖျိး၀ဲဒီးတၢ်မၤန့ၢ်၀ဲကျိချံၦာ်သၣ်အဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံးပၢၤကီၢ်ၦၤဟ့ၣ်တၢ်ကစီၣ်ဖိအအိၣ်န့ၣ်လီၤႉ