ၦၤလၢအဒုးအိၣ်ထီၣ်တၢ်ဒုးဖဲလ့က့ၣ်ကိာ်ဟီၣ်က၀ီၤအပူၤတဖၣ်မ့ၢ်ၦၤလၢအဒုးငါအီၣ်တၢ်အဂ့ၢ် DKBA သုးရိၣ်မဲခိၣ်ကျၢၢ်စံး၀ဲ

လါယူၤ ၆ သီႇ ၂၀၂၂ နံၣ်ႇ ခ့ၣ်အဲးစံၣ်

ၦၤလၢအဒုးအိၣ်ထီၣ်တၢ်ဒုးလၢမၠၣ်၀တံၣ်ကီၢ်ဆၣ်လ့က့ၣ်ကိာ်ဟီၣ်က၀ီၤပူၤတဖၣ်န့ၣ် မ့ၢ်ၦၤသ့ၣ်တဖၣ်လၢအဒုးငါအီၣ်တၢ်လီၤအဂ့ၢ်န့ၣ် တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA) သုးရိၣ်မဲခိၣ်ကျၢၢ်သုးခိၣ်ကျၢၢ်ဒိၣ်စိစီၤစတံစံးလီၤ၀ဲဖဲမဟါလါယူၤ ၅ သီ တၢ်မၤတၢ်ထံၣ်လိာ်အိၣ်သကိးဒီးလီၢ်က၀ီၤဖိတဖၣ်ဖဲဖလူဖးဒိၣ်သ၀ီပူၤန့ၣ်လီၤႉ

ဖဲမဟါလါယူၤ ၅ သီ ဂီၤခီအဆၢကတီၢ်န့ၣ် ပယီၤသုးႇသုးခိးကီၢ်ဆၢ(BGF)ႇ(DKBA)သုးတဖၣ်ဒီး လီၢ်က၀ီၤကမျၢၢ်တဖၣ်မၤ၀ဲတၢ်ထံၣ်လိာ်အိၣ်သကိးတခါဖဲဖလူဖးဒိၣ်တၢ်ဘါယွၤသရိာ်ပူၤဒီးတၢ်ထံၣ်လိာ်အိၣ်သကိးအပူၤ(DKBA)သုးရိၣ်မဲခိၣ်ကျၢၢ်စံးလီၤ၀ဲလၢၦၤလၢအဒုးတၢ်သ့ၣ်တဖၣ်အံၤတမ့ၢ်လၢအဒုးတၢ်လၢထံကီၢ်ဒီးကလုာ်အဂီၢ်ဘၣ်ဒီးမ့ၢ်ၦၤသ့ၣ်တဖၣ်လၢအဒုးအီၣ်စ့လီၤအဂ့ၢ်န့ၣ် စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“လၢညါန့ၣ်ပထံၣ်ဘၣ်ၦၤဟးတူၢ်ငါန့ၣ်အိၣ်ဒၣ်ၦၤဟးဘီးအီၣ်ဘုခ့ႇၦၤဟး၀ံငါအီၣ်တၢ်ႇၦၤဟးသူၣ်ငါအီၣ်တၢ်လီၤႉခဲအံၤအိၣ်လၢဒုးငါအီၣ်တၢ်အိၣ်တဒူၣ်ဒံးႉမ့တဒုးဘၣ်တၢ်န့ၣ်တအီၣ်ဘၣ်မ့ၤဘၣ်ႉအစ့တအိၣ်ဘၣ်ႇမ့ဒုးဘၣ်တၢ်မးၦၤကီၢ်ချၢဆှၢန့ၢ်အီၤစ့မးကအီၣ်ဘၣ်မ့ၤလီၤႉၦၤတဖၣ်အံၤမ့ၢ်ဒၣ်အဒုးငါအီၣ်တၢ်လီၤ”အဂ့ၢ်န့ၣ်စံးလီၤ၀ဲဖဲတၢ်ထံၣ်လိာ်အိၣ်သကိးအပူၤန့ၣ်လီၤႉ

တၢ်သဘံၣ်သဘုၣ်ကဲထီၣ်လၢတကီၢ်ခါခဲအံၤစ့ၢ်ကီးအလီၢ်အိၣ်လၢကရၢမိၢ်ၦၢ်ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢဒီးသုးကီၣ်ကးအဘၢၣ်စၢၤကဘၣ်ထံၣ်လိာ်ဘှါဆှဲ၀ဲဒီး(DKBA)နုာ်လီၤဘှါရှဲ၀ဲ လၢတၢ်ဘၢၣ်စၢၤတဘၣ်ဂီၢ်ဘၣ်ႇတၢ်ဒုးကဲထီၣ်ခဲအံၤစ့ၢ်ကီးၦၤလၢအတမ့ၢ်ၦၤဟီၣ်က၀ီၤဖိတဖၣ်လီၤဟဲဒုးအိၣ်ထီၣ်၀ဲဒီး(DKBA)တဒုးအိၣ်ထီၣ်တၢ်ဒုးတၢ်ယၤလၢဟီၣ်က၀ီၤပူၤနီတဘျီဘၣ်ဒီးၦၤလၢအဒီသဒၢမၤစၢၤကမျၢၢ်တဖၣ်န့ၣ်မ့ၢ်၀ဲ(DKBA)ဒီး(BGF)လီၤအဂ့ၢ်န့ၣ် သုးခိၣ်ကျၢၢ်ဒိၣ်စိ စီၤစတံစံးလီၤ၀ဲန့ၣ်လီၤႉ

ကတီၢ်ခဲအံၤဘၣ်လၢတၢ်ဒုးတၢ်ယၤကဲထီၣ်အကတီၢ်အဃိ (DKBA)အတၢ်စံးတၢ်ကတိၤအံၤအဖီခိၣ်တအဲၣ်ဒိးတဲတၢ်နီတမံၤဘၣ်ဒီးကအိၣ်ခိးကွၢ်တၢ်ဂ့ၢ်လၢအကဲထီၣ်သးတဖၣ်အဂ့ၢ်န့ၣ် ကညီဒီကလုာ်ဂၢၤသးကရၢ(KNDO)သုးခိၣ်ကျၢၢ်ဖိ စီၤနၢၤဒါမၠး စံး၀ဲန့ၣ်လီၤႉ

အ၀ဲစံး၀ဲလၢ“တၢ်တခါအံၤတအဲၣ်ဒိးတဲတၢ်နီတမံၤဒံးဘၣ်ႉဘၣ်မနုၤအဃိလဲၣ်န့ၣ်အ၀ဲသ့ၣ်ဖံးတၢ်မၤတၢ်န့ၣ်မၤန့ၢ်ပယီၤတၢ်အဃိယတတဲတၢ်အါအါဘၣ်ႉအ၀ဲသ့ၣ်တဲပာ်စၢၤဒၣ်၀ဲတဲနါက့သ၀ီဖိသ့ၣ်ညါ၀ဲလီၤအဂ့ၢ်န့ၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ

လၢန့ၣ်အမဲာ်ညါၦၤလီၢ်အိၣ်ကဒုဖိတဖၣ်အံၤမ့ၢ်ဒၣ်(DKBA)ဒီး(BGF)ကွၢ်ထွဲကဟုကယာ်၀ဲလီၤဒီးတၢ်လၢအ၀ဲသ့ၣ်မၤစၢၤ၀ဲတဖၣ်န့ၣ်ၦၤတထံၣ်၀ဲဘၣ်ဒီးၦၤထံၣ်၀ဲလၢၦၤကီၢ်ချၢမၤစၢၤ၀ဲန့ၣ်လီၤႉလၢန့ၣ်အမဲာ်ညါၦၤအိၣ်လၢကီၢ်ချၢသ့ၣ်တဖၣ်ဆါအီၣ်၀ဲၦၤလီၢ်အိၣ်ကဒုဖိအမံၤလီၤအဂ့ၢ်န့ၣ် (DKBA)သုးရိၣ်မဲခိၣ်ကျၢၢ် စံးအါထီၣ်၀ဲဒ်အံၤန့ၣ်လီၤႉ

“ခိၣ်ဖၢၣ်ဘီတမၤစံၣ်သုဘၣ်ႇခိၣ်ဖၢၣ်ဘီဘၣ်ဟးကဟုကယာ်သုလီၤႉၦၤဘၣ်ကီဘၣ်ခဲဘၣ်ဟးစံၣ်ဟးဃ့ၢ်န့ၣ်ခိၣ်ဖၢၣ်ဘီတကွၢ်ထွဲသုယၤႉမၤစၢၤထဲၦၤကီၢ်ချၢလီၣ်ဧါႉခိၣ်ဖၢၣ်ဘီမၤစၢၤန့ၣ်တဖျါဘၣ်ႇသုးခိးကီၢ်ဆၢမၤစၢၤတဖျါဘၣ်ႇဖျါထဲၦၤကီၢ်ချၢမၤစၢၤလီၤႉအဃိန့ၣ်ၦၤကီၢ်ချၢလၢအတဲဆါၦၤတကျးန့ၣ်တဟဲက့ၤလုၢ်အီၣ်ၦၤဘၣ်ႉမ့ဘၣ်တဲလၢတၢ်ကတိၤလၢာ်န့ၣ်အဆါအီၣ်သုမံၤလီၤႉမ့န့ၢ်စ့ဒီလၣ်တကထိန့ၣ်ကအီၣ်၀ဲဒၣ်ဒီၣ်လၣ်(၅၀၀)ႇကတုၤက့ၤလၢသုအိၣ်ဒီၣ်လၣ်(၅၀၀)လီၤ”အဂ့ၢ်န့ၣ် သုခိၣ်ကျၢၢ်ဒိၣ်စိ စီၤစတံစံးအါထီၣ်၀ဲန့ၣ်လီၤႉ

တၢ်ထံၣ်ကမၣ်လိာ်ဘၢလိာ်ကွီၢ်ဒ်အံၤဖျါလၢ(DKBA)အံၤတနၢ်ပၢၢ်၀ဲၦၤဂ့ၢ်၀ီတၢ်တိစၢၤမၤစၢၤအတၢ်ဖံးတၢ်မၤတဖၣ်ဘၣ်အဂ့ၢ်န့ၣ်ကညီပိာ်မုၣ်ကရၢ(KWO)လၢအမၤစၢၤၦၤလီၢ်အိၣ်ကဒုဖိ အနဲၣ်ရွဲၣ်နီၢ်ကညီဖီ စံး၀ဲဒ်အံၤန့ၣ်လီၤႉ

“အ၀ဲသ့ၣ်န့ၣ်တမ့ၢ်လၢအမၤဘူဘၣ်၀ဲၦၤဂ့ၢ်၀ီတၢ်ဆီၣ်ထွဲမၤစၢၤနီဘျီဘၣ်ႉဘၣ်သ့ၣ်သ့ၣ်န့ၣ်ကထီၣ်ဘၣ်တၢ်မၤလိမၤဒိးကနၢ်ဟူဘူဘၣ်၀ဲန့ၣ်ကအိၣ်ႉဘၣ်ဆၣ်သနါက့န့ၣ်ကအိၣ်လၢအစှၤလီၤႉအဃိန့ၣ်အ၀ဲသ့ၣ်တနၢ်ပၢၢ်၀ဲဘၣ်အိၣ်ဒၣ်လၢကဆိမိၣ်၀ဲလီၤႉအ၀ဲသ့ၣ်န့ၣ်တသ့ၣ်ညါ၀ဲတၢ်ဆီၣ်ထွဲမၤစၢၤအကျိၤအကျဲႇတၢ်ဘၣ်လူၤပိာ်မၤထွဲ၀ဲဒၣ်တၢ်ဘျၢသဲစးသ့ၣ်တဖၣ်အိၣ်န့ၣ်တမၤဘူဘၣ်၀ဲနီတဘျီဘၣ်အဃိတသ့ၣ်ညါ၀ဲဘၣ်မီၤနီၤႉယဆိမိၣ်တၢ်လၢအတဲ၀ဲဒၣ်သ့ၣ်တဖၣ်န့ၣ်မ့ၢ်ဒၣ်အကတဲဟးဂီၤနၤႇတၢ်ကရၢကရိဒီးၦၤလၢအမၤတၢ်တဖၣ်အမံၤကဟးဂီၤအဂီၢ်လီၤ”အဂ့ၢ်န့ၣ် အ၀ဲစံး၀ဲန့ၣ်လီၤႉ

လၢန့ၣ်အမဲာ်ညါ ဖဲတၢ်ထံၣ်လိာ်အိၣ်သကိးဒီးလီၢ်က၀ီၤဒူသ၀ီဖိဘျီ၀ဲန့ၣ်အပူၤ (DKBA)သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤစတံစံးစ့ၢ်ကီး၀ဲလၢ ကမျၢၢ်တနီၤန့ၣ်က့ၤအိၣ်လၢအဟံၣ်အဃီသ့လံဘၣ်ဆၣ်တက့ၤအိၣ်၀ဲဘၣ် အိၣ်ခိးအီၣ်၀ဲတၢ်မၤစၢၤဒီးကတီၢ်ခဲအံၤဒ်သိးဖီၣ်စုက၀ဲၤကရူၢ်အဘၢၣ်စၢၤတၢ်ဃူတၢ်ဖိးကအိၣ်အဂီၢ်ကမျၢၢ်တနီၤခဲၣ်သူခဲၣ်ဂီၤတၢ်အိၣ်၀ဲစ့ၢ်ကီးန့ၣ်လီၤႉ

ဘၣ်ဃးဒီး(DKBA)သုးရိၣ်မဲခိၣ်ကျၢၢ်စံးလီၤတၢ်အံၤအဖီခိၣ်လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲ“အ၀ဲသ့ၣ်တဲတၢ်န့ၣ်တဘၣ်စ့ၢ်ဘၣ်ႉကမျၢၢ်ဘၣ်အိၣ်ဆၢထၢၣ်ဘၣ်လုၢ်အီၣ်သးသမူဒ်လဲၣ်ဒ်လဲၣ်န့ၣ်တဆိမိၣ်တၢ်လၢကမျၢၢ်အဂီၢ်ဘၣ်ႉခဲအံၤကမျၢၢ်ဘၣ်ဟးစံၣ်န့ၣ်အ၀ဲသ့ၣ်တမ့ၢ်လၢအဟဲကွၢ်ၦၤစ့ၢ်ကီးဘၣ််”အဂ့ၢ်န့ၣ် စံး၀ဲန့ၣ်လီၤႉ

တၢ်ထံၣ်လိာ်အိၣ်သကိးဘျီ၀ဲအံၤအပူၤအခိၣ်သ့ၣ်န့ၣ်ဟဲတဲဘၣ်ဖလူဖးဒိၣ်သ၀ီႇမဲၢ်ထီးတလ့ဒူသ၀ီလီၢ်က၀ီၤၦၤလီၢ်အိၣ်ကမှံဖိတဖၣ်လၢကက့ၤအိၣ်ကဒါလၢဒူသ၀ီဟံၣ်ဃီႇသုးမီၤစိရိၤအကၠိကအိးထီၣ်ကဒါႇမၢလဲၤဆဲးလီၤဖိသၣ်မံၤလၢကထီၣ်ကၠိႇမၢက့ၤဖံးအီၣ်မၤအီၣ်ကဒါတၢ်အဂ့ၢ်သ့ၣ်တဖၣ်လီၤဘၣ်ဆၣ်လၢကဟံးမူဒါကမၤရှဲကွံာ်မ့ၣ်ပိၢ်အံၤတတဲဃုာ်၀ဲဘၣ်ဒီးတဲ၀ဲထဲလၢတၢ်ဂ့ၢ်လၢအ၀ဲသ့ၣ်တၢ်အဲၣ်ဒိး၀ဲတဖၣ်လီၤအဂ့ၢ်န့ၣ် ဖလူလီၢ်က၀ီၤဖိတဂၤစံး၀ဲန့ၣ်လီၤႉ

တၢ်ဟဲထံၣ်လိာ်အိၣ်သကိးဒီးဒူသ၀ီကမျၢၢ်တၢ်ရဲၣ်တၢ်ကျဲၤအံၤအပူၤ သုးခိးကီၢ်ဆၢ(BGF)အနဲၣ်ရွဲၣ်ခိၣ်ကျၢၢ် သုးခိၣ်ဒိၣ်စိစီၤခၠ့ၣ်သူၤဒီးအၦၤႇ(DKBA)သုးရိၣ်မဲခိၣ်ကျၢၢ်သုးခိၣ်ကျၢၢ်ဒိၣ်စိစီၤစတံဒီးအၦၤ ဒီးပယီၤသုးမီၤစိရိၤအသုးပာ်ဖှိၣ်ခဲလၢာ်အဂၤ(၃၀၀)ဘျဲၣ်ဒီးလီၢ်က၀ီၤသ၀ီဖိအဂၤ(၁၀၀)ဘျဲၣ်ဟဲထီၣ်၀ဲဒၣ်တၢ်ထံၣ်လိာ်သကိးဘျီ၀ဲအံၤန့ၣ်လီၤႉ

လၢမၠၣ်၀တံၣ်ကလံၤထံးမဲၢ်ထီးတလ့ႇမ့လဲၣ်ပၤႇအ့ၤကၠ့မၠဲၤႇထံမဲး၀ါခံႇပဟံၣ်ကျီးႇဖလူဖးဒိၣ်ႇဖလူဖိႇတလၤအ့းသံးဖၠၣ်လီၢ်က၀ီၤတဖၣ်အပူၤန့ၣ်တၢ်ဒုးကဲထီၣ်၀ဲလၢပယီၤသုးဒီး(KNLA)သုးပာ်ဖှိၣ်တဖၣ်အဘၢၣ်စၢၤယံၤ၀ဲ(၆)လါဘျဲၣ်လံဒီးတုၤလၢခဲအံၤတၢ်ဒုးကဲထီၣ်ဒံးန့ၣ်လီၤႉ

လ့က့ၣ်ကိာ်လီၢ်က၀ီၤတုၤလၢကၠီးခဲးႇလ့ဒ့ႇဂီၤလ့ၤႇကနဲလ့ႇအၤအုးထၣ်ႇတနီၢ်ထၣ်ႇသ့ၣ်ဘီဘိႇကျီၢ်ထီႇစူးကလံလီၢ်က၀ီၤန့ၣ်ၦၤလီၢ်အိၣ်ကဒုဖိအနီၣ်ဂံၢ်ခဲလၢာ်အိၣ်၀ဲ(၁၅ႇ၀၀၀)ဘျဲၣ်ဒီးတုၤလၢခဲအံၤအ၀ဲသ့ၣ်တက့ၤအိၣ်ဘၣ်လၢအဒူသ၀ီပူၤဒံးဘၣ်အဂ့ၢ်န့ၣ် ၦၤလၢမၤစၢၤၦၤလီၢ်အိၣ်ကဒုဖိတဖၣ်စံး၀ဲန့ၣ်လီၤႉ