Home တၢ်ကစီၣ် ခီဖျိပယီၤသုးခးလီၤကျိဖးဒိၣ်အဃိတီၤကၠၤအ့လီၢ်က၀ီၤဖိဘၣ်ဒိ(၃)ဂၤ

ခီဖျိပယီၤသုးခးလီၤကျိဖးဒိၣ်အဃိတီၤကၠၤအ့လီၢ်က၀ီၤဖိဘၣ်ဒိ(၃)ဂၤ

588
0

လါယူၤလံ ၁၉ သီႇ ၂၀၂၂ နံၣ်ႇ ခ့ၣ်အဲးစံၣ်

ဖဲမဟါလါယူၤလံ ၁၈ သီအနံၤ လၢကညီကီၢ်စဲၣ် ကီးတရံးကီၢ်ဆၣ်အပူၤ ခီဖျိပယီၤသုးခးလီၤကျိဖးဒိၣ်ဆူတီၤကၠၤအ့သ၀ီပူၤအဃိဘၣ်ဒိ၀ဲလီၢ်က၀ီၤဖိ(၃)ဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ

ဖဲမဟါအနၣ်ရံၣ်(၁၀)တခီအဆၢကတီၢ်ပယီၤသုးခးလီၤကျိဖးဒိၣ်တဘျီဒီးမုၢ်နၤခီ(၁)နၣ်ရံၣ်န့ၣ်တဘျီအဃိလီၢ်က၀ီၤသးစၢ်ဘၣ်ဒိဘၣ်ထံး၀ဲ(၃)ဂၤအဂ့ၢ်န့ၣ် တီၤကၠၤအ့သ၀ီဖိတဂၤစံး၀ဲဒ်အံၤန့ၣ်လီၤႉ

“ခးလီၤ၀ဲလၢၦၤမံအခါမီၤနီၤႉမ့ၢ်သုးဖဲလဲၣ်တဒူၣ်ခးလီၤ၀ဲလဲၣ်န့ၣ်မတၤတဂၤမးတသ့ၣ်ညါဘၣ်ႉကဘၣ်မ့ၢ်၀ဲပယီၤသုးလၢအိၣ်(လဲၤ၀ၣ်)သ၀ီခးလီၤ၀ဲလီၤႉကျိဖးဒိၣ်လီၤတဲာ်ခီန့ၣ်လၢသီခါဖၠၣ်ဖီခိၣ်န့ၣ်ကၠိအိၣ်တဖျၢၣ်ႇလီၤတဲာ်၀ဲလၢန့ၣ်တကပၤမီၤနီၤ”အဂ့ၢ်န့ၣ်အ၀ဲစံးဘၣ်ခ့ၣ်အဲးစံၣ်န့ၣ်လီၤႉ

ခီဖျိပယီၤသုးအံၤခးလီၤကျိဖးဒိၣ်ဆူတီၤကၠၤအ့သ၀ီပူၤလၢမုၢ်နၤတၢ်ခံးတလီၢ်လီၢ်အဃိ လီၢ်က၀ီၤသ၀ီဖိတဖၣ်မုၢ်နၤခီန့ၣ်ဘၣ်လဲၤစံၣ်မံ၀ဲဒၣ်လၢသ၀ီအဂၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

စးထီၣ်ဖဲအပူၤကွံာ်လါမးရှး ၁၁ သီန့့ၣ် လၢတီၤကၠၤအ့သ၀ီပူၤ တၢ်ခးလိာ်သးကဲထီၣ်၀ဲလၢ ဟီၣ်က၀ီၤကညီဒီကလုာ်ဂၢၤသးကရၢ(KNDO)သုးပာ်ဖှိၣ်ဒီးပယီၤသုးတဖၣ်အဘၢၣ်စၢၤ၀ံၤအလီၢ်ခံပယီၤသုးတကပၤမၤအါထီၣ်သုးဂံၢ်ဘါလၢတီၤကၠၤအ့သ၀ီပူၤတကးဒံးဘၣ်အမဲာ်ညါခီဖျိခးလီၤကျိဖးဒိၣ်ဆူသ၀ီပူၤခဲအံၤခဲအံၤအဃိလီၢ်က၀ီၤကမျၢၢ်ဘၣ်ဒိဘၣ်ထံးဒီးဟံၣ်ဃီဟးဂီၤအိၣ်၀ဲတနီၤန့ၣ်လီၤႉ

လီၢ်က၀ီၤဖိလၢတအဲၣ်ဒိးပာ်ဖျါအမံၤလၢအဂၤတဂၤစ့ၢ်ကီးစံး၀ဲ“တဘျီညါအံၤလၢမုၢ်ဆါခီန့ၣ်ပယီၤသုးခးလီၤကျိဖးဒိၣ်တအိၣ်အါအါလၢၤဘၣ်ႉလၢမုၢ်ဆါခီန့ၣ်ၦၤဟးထီၣ်က့ၤလီၤစ့ၢ်ကီးအိၣ်မီၤနီၤႉသီခါနါက့ဃ့ထီၣ်၀ဲအိၣ်အဃိလၢမုၢ်ဆါခီန့ၣ်တခး၀ဲဘၣ်ႉမ့မ့ၢ်လၢမုၢ်နၤခီန့ၣ်မတၤတဂၤမးဟံမူဒါတဘူၣ်ဘၣ်အဃိကမျၢၢ်ဘၣ်ဟးစံၣ်ပလဲာ်၀ဲမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ

ကတီၢ်ခဲအံၤပယီၤသုးတဖၣ်နုာ်လီၤအိၣ်လၢတီၤကၠၤအ့သ၀ီတီၤထီကၠိကရၢၢ်ပူၤဒီး ခီဖျိပယီၤသုးအံၤတပျဲန့ၢ်တၢ်လီၢ်ဘၣ်အဃိကၠိဖိအဂၤ(၂၀၀)ဘျဲၣ်ဘၣ်သုးလီၢ်သုးကျဲလဲၤမၤလိက့ၤတၢ်လၢသီခါဖၠၣ်ကရၢၢ်ပူၤန့ၣ်လီၤႉ

ဖဲအပူၤကွံာ်လါမးရှးအခါစ့ၢ်ကီးခီဖျိပယီၤသုးခးလီၤကျိဖးဒိၣ်ဆူသ၀ီပူၤအဃိတီၤကၠၤအ့သ၀ီဖိတဖၣ်ဘၣ်ဃ့ၢ်ထီၣ်၀ဲသ၀ီဒီတဖျၢၣ်ညါဒံးန့ၣ်လီၤႉကတီၢ်ခဲအံၤလီၢ်က၀ီၤဖိတဖၣ်အါဒၣ်တက့ၢ်က့ၤအိၣ်လၢသ၀ီပူၤလံဘၣ်ဆၣ်တနီၤန့ၣ်တုၤလၢခဲအံၤက့ၤအိၣ်လၢသ၀ီပူၤတဘူၣ်ဒံး၀ဲဘၣ်ဒီးဘၣ်ဟးစံၣ်အိၣ်ခူသူၣ်ဒံး၀ဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ