Home တၢ်ကစီၣ် တၢ်ဒုးကဲထီၣ်တပယူာ်ဃီလၢမၠၣ်၀တံၣ်–ကီးတရံးအ့ရှါကျဲမုၢ်တီနီၢ်ကစၢၢ်ခိၣ်

တၢ်ဒုးကဲထီၣ်တပယူာ်ဃီလၢမၠၣ်၀တံၣ်–ကီးတရံးအ့ရှါကျဲမုၢ်တီနီၢ်ကစၢၢ်ခိၣ်

747
0
Photo: CJ

လါအီကူး ၁၉ သီႇ ၂၀၂၂ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် မၠၣ်၀တံၣ်–ကီးတရံးအ့ရှါကျဲမုၢ်ခိၣ်န့ၣ် တၢ်ဒုးကဲထီၣ်ဒံး၀ဲလၢပယီၤသုးဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တဖၣ်အဘၢၣ်စၢၤအဂ့ၢ်န့ၣ် (KNLA)သုးပာ်ဖှိၣ်ကဆီ၀ါသုးဒ့(၁)အသုးဒ့ခိၣ်သုးခိၣ်စီၤကၠီၤသဲၣ်စံး၀ဲန့ၣ်လီၤႉ

ဖဲအပူၤကွံာ်လါအီကူး ၁၅ သီအနံၤန့ၣ် (KNLA)သုးပာ်ဖှိၣ်တဖၣ်နီၤဖးလီၤအကရူၢ်ဒီးနုာ်လီၤခး၀ဲကီးတရံး၀့ၢ်ပူၤ ပယီၤသုးမီၤစိရိၤအစုတီၤဖီလာ်ပၢၤကီၢ်၀ဲၤလီၢ်ကဲထီၣ်သး၀ံၤအလီၢ်ခံ တုၤလၢတနံၤအံၤလါအီကူး ၁၉ သီအနံၤန့ၣ် တၢ်ဒုးကဲထီၣ်ဒံး၀ဲတပယူာ်ဃီလၢကီးတရံး၀့ၢ်ကပၤအ့ရှါကျဲမုၢ်ပယီၤသုးအိၣ်ခိးတၢ်လီၢ်တဖၣ်အဂ့ၢ်န့ၣ် ကဆီ၀ါသုးဒ့(၁)အသုးဒ့ခိၣ် သုးခိၣ် စီၤကၠီၤသဲၣ်စံး၀ဲဒ်အံၤန့ၣ်လီၤႉ

“စးထီၣ်ခးဖဲတဂီၤအံၤ ၉ နၣ်ရံၣ်ဘျဲၣ်န့ၣ်မီၤနီၤႉလၢကီးတရံးတကပၤန့ၣ်တၢ်ဒုးကဲထီၣ်ကိးမုၢ်နံၤဒဲးလီၤႉ တုၤလၢခဲအံၤခးဒံးလီၤႉခးကိးမုၢ်နံၤဒဲးလီၤတနံၤညါအံၤနါက့ခးဒံးႉမ့မ့ၢ်ပယီၤသုးတၢ်ဟူးတၢ်ဂဲၤခီဆူၣ်ဆူၣ်မုၢ်မုၢ်အိၣ်တသ့ဘၣ်တၢ်အသုးတအိၣ်လၢၤစ့ၢ်ဧဲၢ်ႉအိၣ်ဒၣ်လၢပဘၣ်နုာ်လီၤခးအီၤန့ၣ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲတနံၤအံၤန့ၣ်လီၤႉ

ခီဖျိတၢ်ဒုးကဲထီၣ်အဃိဖဲမဟါလါအီကူး ၁၈ သီအနံၤန့ၣ် ပယီၤသုးကးတံၢ်ကွံာ်၀ဲ မၠၣ်၀တံၣ်–ကီးတရံး အ့ရှါကျဲမုၢ်ဒီးဒ်န့ၣ်အသိးကးတံၢ်ဃုာ်၀ဲမၠၣ်၀တံၣ်ကီၢ်ဆၢတၢ်ကူၣ်လဲၤမၤကၤလီၢ်(ကုန်သယွ်ေရးဇုန်)ဒီးၦၤမၤတၢ်ဖိဒီးသိလ့ၣ်လၢအိၣ်တၢ်ကူၣ်လဲၤမၤကၤလီၢ်ကရၢၢ်ပူၤတဖၣ်အံၤပယီၤသုးမၢသုးအလီၢ်ဆူမၠၣ်၀တံၣ်၀့ၢ်ပူၤန့ၣ်လီၤႉ၀ံၤအလီၢ်ခံဖဲတနံၤအံၤလါအီကူး ၁၉ သီ ဂီၤခီ ၉ နၣ်ရံၣ်အဆၢကတီၢ်န့ၣ် ပယီၤသုးက့ၤအိးထီၣ်ကဒါက့ၤ တၢ်ကူၣ်လဲၤမၤကၤလီၢ်လံအသိးအ့ရှါမုၢ်စ့ၢ်ကီးက့ၤအိးထီၣ်ကဒါ၀ဲလံအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဂၤစံး၀ဲန့ၣ်လီၤႉ

“ဖဲမဟါန့ၣ်တၢ်ဒုးကဲထီၣ်တ့ၢ်ဃာ်မီၤနီၤႉတနံၤညါအံၤကဲထီၣ်ကဒီးအဃိအ၀ဲသ့ၣ်ဘၣ်ယိၣ်လၢတၢ်ကနုာ်လီၤခး(သုးကလၢၤ)အံၤအဃိဖဲမဟါန့ၣ်အ၀ဲသ့ၣ်က့ၤဆှၢပာ်အဟံၣ်ဖိဃီဖိလၢမၠၣ်၀တံၣ်၀့ၢ်ပူၤ(၂၇၅)သုးကရၢၢ်ပူၤမီၤနီၤႉခဲအံၤတၢ်ဒုးကဲထီၣ်ဒီယုၢ်အဃိကိၢ်သး၀ဲလၢၦၤကနုာ်လီၤခးအ၀ဲသ့ၣ်ဒီးသုးဃာ်အလီၢ်အကျဲဒ်န့ၣ်မီၤနီၤ”အဂ့ၢ်န့ၣ်သုးခိၣ်စီၤကၠီၤသဲၣ်စံးအါထီၣ်၀ဲန့ၣ်လီၤႉ

ကတီၢ်ခဲအံၤပယီၤသုးက့ၤခးလီၤကဒါကျိဖးဒိၣ်ဆူတၢ်ဒုးကဲလီၢ်က၀ီၤဒူသ၀ီတဖၣ်အပူၤအဃိ လီၢ်က၀ီၤသ၀ီဖိ သံဘၣ်ဒိဘၣ်ထံးအိၣ်၀ဲအသိးတနံၤညါအံၤစ့ၢ်ကီးပယီၤသုးကဘီယူၤဟဲတ့ၢ်လီၤမ့ၣ်ပိၢ်ဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ