Home တၢ်ကစီၣ် (DKBA)သုးတနီၤစးထီၣ်သူကီၢ်သူလ့ၤသုးမုၢ်ဒိၣ်လံာ်မဲာ်ဖျၢၣ်တၢ်ပနီၣ်

(DKBA)သုးတနီၤစးထီၣ်သူကီၢ်သူလ့ၤသုးမုၢ်ဒိၣ်လံာ်မဲာ်ဖျၢၣ်တၢ်ပနီၣ်

772
0
Photo: Crd.

လါအီကူး ၂၃ သီႇ ၂၀၂၂ နံၣ်ႇ ခ့ၣ်အဲးစံၣ်

စးထီၣ်ဖဲတလါအံၤန့ၣ်တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)သုးတဖၣ်စးထီၣ်သူ၀ဲကီၢ်သူလ့ၤသုးမုၢ်ဒိၣ်(Kawthoolei Armed Forces-KAF)အလံာ်မဲာ်ဖျၢၣ်တၢ်ပနီၣ်လံအဂ့ၢ်န့ၣ် (DKBA)ခိၣ်နၢ်ပာ်ဂၢၢ်ပာ်ကျၢၤစံး၀ဲန့ၣ်လီၤႉ

ဖဲအပူၤကွံာ်စှၤသီအခါခ့ၣ်အဲၣ်ယူၣ်ဆှၢဃီၤသးနါၦၢ်လံာ်မဲာ်ဖျၢၣ်တၢ်ပနီၣ်တဖၣ်ဆူ(DKBA)သုး၀ဲၤလီၢ်ခိၣ်သ့ၣ်အအိၣ်ဒီးလၢတၢ်ဃူတၢ်ဖိးအဂီၢ်ဘၣ်ထီထီၣ်က့ၤ၀ဲဒ်အံၤလီၤအဂ့ၢ်န့ၣ် (DKBA)သုးခိၣ်လၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ

“ၦၤဟ့ၣ်လီၤၦၤဖဲသ့ၣ်ဘီဘိန့ၣ်ဘျီဒၢးၦၤဟ့ၣ်လီၤသုးခိၣ်ကျၢၢ်န့ၣ်ႉမ့မ့ၢ်အ၀ဲဒုထီဧါတထီဧါတသ့ၣ်ညါဘၣ်ႉယဲမုၢ်နံၤဂ့ၤမုၢ်သၢနံၤဘျီယမၢၦၤထီထီၣ်ႉမ့တထီဘၣ်နါက့တဘၣ်တၢ်နီမံၤဘၣ်တၢ်တဖၣ်န့ၣ်မ့ၢ်ဒၣ်တၢ်ဃူတၢ်ဖိးလီၣ်ဒၢးႉမ့မ့ၢ်ပ၀ဲဒုပထီထီၣ်လံႉတၢ်မၢၤတထီခဲလၢာ်ဒံးဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ

ကတီၢ်ခဲအံၤတီနီၢ်မုၢ်ထီၣ်(DKBA)သုးက့စုတီၤဖီလာ်သုးဒီးလီၢ်ခၢၣ်သးသုးတဖၣ်စးထီၣ်ထီထီၣ်၀ဲလံာ်မဲာ်ဖျၢၣ်တၢ်ပနီၣ်လံအသိးခီဖျိသးနါၦၢ်လံာ်မဲာ်ဖျၢၣ်တၢ်ပနီၣ်အံၤတကူတလၢဒံးဘၣ်အဃိတၢ်ကမၤအါထီၣ်လၢအသီဒီးထီထီၣ်တၢ်ပနီၣ်အံၤလၢတၢ်ဃူတၢ်ဖိးအဂီၢ်လီၤအဂ့ၢ်န့ၣ်သုးခိၣ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

ဖဲအပူၤကွံာ်လါအီကူး ၃ သီအနံၤန့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိစီၤကၠီၤနံၤဃုာ်ဒီး (KNLA)ခိၣ်နၢ်ဒိၣ်ထီတနီၤဒီး(DKBA)သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤစတံတီခိၣ်ရိၣ်မဲ(DKBA)ခိၣ်နၢ်တနီၤ မၤ၀ဲတၢ်ထံၣ်လိာ်အိၣ်သကိးတခါဒီးလၢကက့ၤပာ်ဖှိၣ်ထီၣ်သးအဂီၢ်ခံခီခံကပၤတၢ်သးလီၤပလိာ်အိၣ်ထီၣ်၀ဲ (၅)ထံၣ်န့ၣ်လီၤႉ

တၢ်ထီထီၣ်လံာ်မဲာ်ဖျၢၣ်တၢ်ပနီၣ်အံၤန့ၣ် ဖဲအပူၤကွံာ်လါအီကူး ၁၂ သီအနံၤ (KNLA)သုးရိၣ်မဲခိၣ်ကျၢၢ်–၂ သုးခိၣ်ကျၢၢ်စိ စီၤဘီကၠီၤဟဲစးထီၣ်ကၤ၀ဲဆ့ကၤတၢ်ပနီၣ်အံၤဖဲကညီဒီကလုာ်မၤထူရၤမုၢ်နံၤမူး တၢ်ရဲၣ်တၢ်ကျဲၤအပူၤဒီးဒ်န့ၣ်အသိးပထံၣ်ဘၣ်စ့ၢ်ကီးလၢ(Cobra)သုးကျိၤခိၣ်သုးခိၣ်ဒးဘီစ့ၢ်ကီးသိးထီၣ်ဆ့ကကၤတၢ်ပနီၣ်အံၤန့ၣ်လီၤႉ

ဒ်န့ၣ်အသိးဖဲအပူၤကွံာ်လါယူၤလံအခါစ့ၢ်ကီး ကညီဂၢၤသးကရၢ (KNDO)သုးရိၣ်မဲခိၣ်ကျၢၢ်လီၢ်လံၤ သုးခိၣ်ကျၢၢ်ဒိၣ်စိစီၤနၢၤဒါမၠးထုးထီၣ်ဘိးဘၣ်ရၤလီၤ၀ဲလၢဒုးအိၣ်ထီၣ်၀ဲကီၢ်သူလ့ၤသုးမုၢ်ဒိၣ်(Kaw Thoo Lei Army)လံဒီး ဖဲန့ၣ်တၢ်ပဲာ်ထံနီၤဖးဟဲအိၣ်ထီၣ်၀ဲလၢကညီထံဖိကီၢ်ဖိကျါအကလုာ်ကလုာ်စ့ၢ်ကီးန့ၣ်လီၤႉ

ဒ်သိးကညီဖီၣ်စုက၀ဲၤ(KNLA)ႇ(KNDO)ႇ(DKBA)ဒီး(KNU/KNLA-PC)တၢ်ကရၢကရိတဖၣ်အံၤ ကက့ၤပာ်ဖှိၣ်ထီၣ်သးအဂီၢ် ဖဲအပူၤကွံာ်(၂၀၁၄)လါအီးကထိဘၢၣ် ၁၃ သီအနံၤန့ၣ် ကရူၢ်ကရၢတဖၣ်အံၤအခိၣ်နၢ်ဒိၣ်ထီတဖၣ်စုာ်စုာ်ဆဲးလီၤမံၤထုးထီၣ်ပာ်ဖျါ၀ဲလၢ ဒုးအိၣ်ထီၣ်၀ဲကီၢ်သူလ့ၤသုးမုၢ်ဒိၣ်(Kawthoolei Armed Forces-KAF)အံၤန့ၣ်လီၤႉ

ဘၣ်ဆၣ်တၢ်ထုးထီၣ်ဘိးဘၣ်ရၤလီၤလံာ်၀ံၤအလီၢ်ခံလၢတၢ်ကမၤဖျါထီၣ်အမိၢ်လံၤမိၢ်ၦၢ်အဂီၢ်န့ၣ် ခံခီခံကပၤခိၣ်နၢ်မၤ၀ဲတၢ်ထံၣ်လိာ်အိၣ်သကိးဒီးကတီၢ်ခဲအံၤတၢ်ထီထီၣ်သးနါၦၢ်တၢ်ပနီၣ်အံၤ (KNU/KNLA-PC)တပၣ်ဃုာ်ဒံး၀ဲဘၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ