လါစဲးပထ့ဘၢၣ် ၈ သီႇ ၂၀၂၂ နံၣ်ႇ ခ့ၣ်အဲးစံၣ်
ဖဲအပူၤကွံာ်လါစဲးပထ့ဘၢၣ် ၄ သီအနံၤန့ၣ် တၢ်ဖီၣ်န့ၢ်၀ဲသုးမီၤစိရိၤအၦၤသုးဖိ(၈)ဂၤလၢတလၢၤကီၢ်စဲၣ် သၤဖၠူၤစယၣ်–ယ့ကျဲတၢ်လီၢ်တတီၤဒီးၦၤသ့ၣ်တဖၣ်အံၤတၢ်ပၢၤဃာ်အ၀ဲသ့ၣ်ဒ်သုးတၢ်သိၣ်တၢ်သီအိၣ် အသိးအဂ့ၢ်န့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်အနဲၣ်ရွဲၣ် ပဒိၣ်စီၤလ့စတၣ် စံးဘၣ်ခ့ၣ်အဲးစံၣ်န့ၣ်လီၤႉ
ပယီၤသုုးဖိတဖၣ်အံၤထီၣ်၀ဲတၢ်သိၣ်လိလၢပကိကီၢ်ခီဒိၣ်ႇယ့ၤနံၤကီၢ်ဆၣ်နီၣ်ဂံၢ်(၅)ဂံၢ်ခီၣ်ထံးသုးတၢ်သိၣ်လိသုးတၢ်လီၢ်ဒီး လၢကလဲၤလီၤက့ၤမူဒါဆူတလၢၤကီၢ်စဲၣ်ႇယ့ကီၢ်ဆၣ်(အၤယူၣ်တိၤ)သ၀ီပူၤ ခီၣ်ချ့သုးရ့ၣ်(ခမရ–၃၄၃)အအိၣ်အဂီၢ် ဖဲအဟဲလၢကျဲအခါ ခ့ၣ်အဲၣ်ယူၣ်(သုးက့ ၆)ဒီးသုးပာ်ဖှိၣ်ကရူၢ်ဖီၣ်ချုးအ၀ဲသ့ၣ်ဖဲ သၤဖၠူၤစယၣ်–ယ့ကျဲတၢ်လီၢ်တတီၤန့ၣ်လီၤႉ
ပယီၤသုးလၢတၢ်ဖီၣ်ချုးတဖၣ်မ့ၢ်၀ဲသုးဖိစ့ၤမိအီၣ်ႇမီၤမီၤထွ့ႇကၠီၤမ့ခၣ်ႇပၠ့ၣ်စိၣ်အူႇပၠ့ၣ်ဖၠိအီၣ်ႇ စံၣ်သူၣ်ထဲၣ်ႇထဲၣ်စီၣ်ဒီး(ခမရ–၃၄၃)ပတြီာ်သုးခိၣ်ဖိလၣ်တ့ၤလၢအဟဲစိၢ်သုးဖိသ့ၣ်တဖၣ်အံၤန့ၣ်လီၤႉ
ဒူပျာ်ယာ်ကီၢ်ရ့ၣ်(သုးက့ ၆)အနဲၣ်ရွဲၣ် ပဒိၣ်စီၤလ့စတၣ်စံး၀ဲ“ဒ်ပယီၤသုးကမၣ်အသိးန့ၣ်ပမၤပိာ်အခံ တန့ၢ်ဘၣ်ႉတၢ်တဘၣ်ဘၣ်န့ၣ်ပထိၣ်သတြီၤအီၤဒီးတၢ်တဘၣ်ဘၣ်တသ့ဘၣ်ႉဒ်ပၦၤအီၣ်ဘၣ်အသိးန့ၣ်အ၀ဲသ့ၣ်အီၣ်ဘၣ်လီၤႉဒ်သုးတၢ်သိၣ်တၢ်သီအိၣ်အသိးန့ၣ်ပပၢၤဃာ်အ၀ဲသ့ၣ်ဂ့ၤဂ့ၤလီၤႉခ့ၣ်အဲၣ်ယူၣ်အံၤလၢတၢ်လဲၤကျဲအတၢ်ပညိၣ်အပူၤန့ၣ်ကဟးမၤဟးဂီၤဒူသ၀ီႇကဒွဲၣ်အူဒူသ၀ီႇကမၤသံၦၤကညီဒ်သိးပယီၤန့ၣ်နပြၢဒီးအ၀ဲသ့ၣ်တန့ၢ်ဘၣ်မီၤနီၤႉပလဲၤဒ်တၢ်သိၣ်တၢ်သီတၢ်ဘျၢအိၣ်အသိးလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲမဟါလါစဲးပထ့ဘၢၣ် ၇ သီအနံၤန့ၣ်လီၤႉ
လၢန့ၣ်အမဲာ်ညါပယီၤသုး(၈)ဂၤလၢတၢ်ဖီၣ်န့ၢ်၀ဲအံၤတဖၣ်အတၢ်အိၣ်သးလီၤတံၢ်လီၤဆဲးအံၤစ့ၢ်ကီး တၢ်ကဟ့ၣ်ဒုးသ့ၣ်ညါ၀ဲဆူဟီၣ်ခိၣ်ဒီဘ့ၣ်ဂာ်တဲာ်ဂီၤကမံးတံာ်(ကြက်ေခြနီ-ICRC)အအိၣ်အဂ့ၢ်န့ၣ် ပဒိၣ်စီၤလ့စတၣ်စံးအါထီၣ်၀ဲန့ၣ်လီၤႉ
ပတြီာ်သုးခိၣ်ဖိလၣ်တ့ၤလၢတၢ်ဖီၣ်ချုး၀ဲအံၤစ့ၢ်ကီးစံး၀ဲ“ဖဲယလဲၤကိးၦၤထီၣ်တၢ်သိၣ်လိဖိဟဲက့ၤလၢကျဲအခါၦၤဖီၣ်ချုးၦၤမီၤနီၤႉၦၤသုးဖိလၢအိၣ်တၢ်ဖီလာ်တဖၣ်အံၤလ့ၤတက့ၤတတူၢ်လိာ်၀ဲသုးဟံးန့ၢ်တၢ်စိတၢ်ကမီၤအံၤဘၣ်မီၤနီၤႉခီဖျိဟံၣ်ဖိဃီဖိတၢ်အိၣ်သးဒီးသးၦၢ်ညါအိၣ်ထီၣ်အဃိအိၣ်ခိးမုၢ်လၢ်၀ဲ(ပင်စင်)ဒီးဆဲးအိၣ်၀ဲလၢသုးပူၤလီၤႉ ၦၤဖီၣ်ၦၤနါက့ၦၤပာ်ၦၤဂ့ၤဂ့ၤခဲလၢာ်လီၤ”အဂ့ၢ်န့ၣ်စံး၀ဲန့ၣ်လီၤႉ
သုးဟံးန့ၢ်ထံကီၢ်တၢ်စိတၢ်ကမီၤ၀ံၤအလီၢ်ခံခီဖျိသုးမီၤစိရိၤအၦၤသုးဖိတဖၣ်တအဲၣ်ဒိးဆဲးမၤတၢ်သုးပူၤလၢၤဘၣ်ဒီးစံၣ်ဖျိးထီၣ်ကွံာ်တကးဒံးဘၣ်သံလၢတၢ်ဒုးပူၤစ့ၢ်ကီးအိၣ်အဃိလၢတၢ်မၤလၢၦဲၤသုးဖိအတၢ်လိၣ်ဘၣ်အံၤအဂီၢ်န့ၣ်အ၀ဲသ့ၣ်ကိး၀ဲတၢ်အိၣ်ဖှိၣ်စံးလီၤ၀ဲလၢၦၤလၢအမၤကမၣ်တၢ်သ့ၣ်တဖၣ်န့ၣ်ကပျၢၢ်၀ဲတၢ်ကမၣ်အဂ့ၢ်န့ၣ် ပယီၤသုးလၢတၢ်ဖီၣ်ချုး၀ဲတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ
ပယီၤသုးလၢအဟဲနုာ်လီၤမၤတၢ်ထီၣ်ဒုးလၢခ့ၣ်အဲၣ်ယူၣ်(သုးက့ ၆)ဟီၣ်က၀ီပူၤအံၤတဖၣ်ဒီး တၢ်ပၢၢ်ဆၢသုးပာ်ဖှိၣ်ကရူၢ်အဘၢၣ်စၢၤတၢ်ဒုးကဲထီၣ်ဒံး၀ဲတပယူာ်ဃီဒီး ပယီၤသုးလၢတၢ်ဖီၣ်န့ၢ်အီၤလၢတၢ်ဒုးပျီပူၤအိၣ်၀ဲအဂၤ(၃၀)ဃၣ်ဃၣ်ညါဒီး ၦၤသ့ၣ်တဖၣ်အံၤတၢ်ပၢၤဃာ်အ၀ဲသ့ၣ် ဂ့ၤဂ့ၤလီၤဒီးကလဲၤဒ်ကရူၢ်တၢ်သိၣ်တၢ်သီတၢ်ဘျၢအိၣ်အသိးလီၤအဂ့ၢ်န့ၣ်ခ့ၣ်အဲၣ်ယူၣ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ