လါစဲးပထ့ဘၢၣ် ၁၅ သီႇ ၂၀၂၂ နံၣ်ႇ ခ့ၣ်အဲးစံၣ်
လၢတနီသရံၣ်ကီၢ်ခီဒိၣ် ဘျဲးဒ၀ဲၢ်ကီၢ်ရ့ၣ် ဒ၀ဲၢ်ကီၢ်ဆၣ်အပူၤ ဖဲလါစဲးပထ့ဘၢၣ် ၁၃ သီအနံၤန့ၣ် ပယီၤသုးလၢအနုာ်လီၤအိၣ်လၢ(ပ၀့ၤပ့ၤ)သ၀ီပူၤတဖၣ်ဒွဲၣ်အူအီၣ်၀ဲၦၤလီၢ်အိၣ်ကမှံတၢ်လီၢ်တခါဒီးခးလီၤကျိဖးဒိၣ်ကျိဖိ၀ံၤအလီၢ်ခံဟးထီၣ်ကွံာ်၀ဲလၢသ၀ီပူၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
ဖဲအပူၤကွံာ်လါစဲးပထ့ဘၢၣ် ၆ သီအနံၤန့ၣ် ပယီၤသုးလၢအနုာ်လီၤအိၣ်လၢ ဘျံးဒ၀ဲၢ်ကီၢ်ရ့ၣ်(ဘ၀့ၤပ့ၤ)သ၀ီပူၤတဖၣ်အံၤဖီၣ်က့ၤကိး၀ဲသ၀ီဖိအဂၤ(၁၀၀)ဘျဲၣ်၀ံၤ ဖဲလါစဲးပထ့ဘၢၣ် ၁၃ သီ ဟါခီ ၉ နၣ်ရံၣ်ဃၣ်ဃၣ်အဆၢကတီၢ်န့ၣ် ပျၢ်လီၤက့ၤ၀ဲသ၀ီဖိိတဖၣ်အံၤ၀ံၤအလီၢ်ခံ ခးလီၤ၀ဲကျိဖးဒိၣ်ကျိဖိတဖၣ်ဒီး ဟးထီၣ်ကွံာ်၀ဲလၢသ၀ီပူၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
တချုးလၢပယီၤသုးဟးထီၣ်လၢ(ဘ၀့ၤပ့ၤ)သ၀ီပူၤဒံးဘၣ်အခါန့ၣ်ဒွဲၣ်အူ၀ဲၦၤလီၢ်အိၣ်ကမှံလီၢ်တခါလၢအိၣ်ဖဲသ၀ီမုၢ်နုာ််တကပၤအံၤအသိးနုာ်လီၤမၤဟးဂီၤသ၀ီပူၤဟံၣ်တဖၣ်ဒီးက့ၤစိာ်၀ဲတၢ်ဖိိတၢ်လံၤတဖၣ်အဂ့ၢ်န့ၣ် လီၢ်က၀ီၤဖိိတဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“အ၀ဲသ့ၣ်ဟးထီၣ်လၢသ၀ီပူၤန့ၣ်ကဘၣ်ဖဲဟါခီ ၉ နၣ်ရံၣ်န့ၣ်မီၤနီၤႉ မ့၀ံၤခးလီၤ၀ဲကျိဖး ဒိၣ်ကျိဖိတဖၣ်လီၤႉဒွဲၣ်အူအီၣ်၀ဲၦၤလီၢ်အိၣ်ကမှံတၢ်လီၢ်တခါအိၣ်ဖဲ(ဘ၀့ၤပ့ၤ)သ၀ီမုၢ်နုာ်တကပၤန့ၣ်ႉနုာ်လီၤမၤဟးဂီၤၦၤဟံၣ်လၢသ၀ီပူၤဒီတဖျၢၣ်ႇမ့မ့ၢ်ယဟံၣ်န့ၣ်အခိၣ်သ့ၣ်လီၤသူအီၣ်တသ့နီတမံၤလၢၤဘၣ်ႉတအိၣ်တ့ၢ်နီတမံၤလၢၤဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲမဟါလါစဲးပထ့ဘၢၣ် ၁၄ သီအနံၤန့ၣ်လီၤႉ
ပယီၤသုးတဖၣ်အံၤမၤဟးဂီၤလီၢ်က၀ီၤဖိအဟံၣ်တကးဒံးဘၣ်တဲပျံၤ၀ဲလၢၦၤမ့ဒိဃာ်ဟံၣ်လၢအဟးဂီၤႇမ့ဒိဃာ်တၢ်ဒွဲၣ်အူအီၣ်ၦၤလီၢ်အိၣ်ကမှံလီၢ်လၢတၢ်ဂီၤတဖၣ်န့ၣ်မ့ဟဲလၢသ၀ီပူၤတဘျီကဒီးန့ၣ်ကဒွဲၣ်အူအီၣ်ကဒီး၀ဲသ၀ီႇကမၤသံစ့ၢ်ကီးသ၀ီဖိအသိးသီခါလၢအိၣ်သ၀ီပူၤတဖၣ်ဘၣ်ဆဲးလီၤ၀ဲလံာ်တၢ်အၢၣ်လီၤအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ
“သီခါလၢအိၣ်သ၀ီပူၤတဖၣ်ဘၣ်ဆဲးလီၤဃာ်လံာ်မီၤနီၤႉၦၤမ့ဒိဃာ်တၢ်ဂီၤလၢဟံၣ်လၢအ၀ဲသ့ၣ်မၤဟးဂီၤ၀ဲတဖၣ်န့ၣ်အ၀ဲသ့ၣ်မ့ဟဲလၢသ၀ီပူၤတဘျီကဒီးန့ၣ်ကဒွဲၣ်အူအီၣ်သ၀ီဒီတဖျၢၣ်လီၤတဲ၀ဲဒ်န့ၣ်ႉတဲပျံၤစ့ၢ်ကီး၀ဲလၢကမၤသံသ၀ီဖိတဖၣ်မီၤနီၤ” အဂ့ၢ်န့ၣ်သ၀ီဖိလၢတအဲၣ်ဒိးပာ်ဖျါအမံၤတဂၤစံးဘၣ်ခ့ၣ်အဲးစံၣ်န့ၣ်လီၤႉ
(ဘ၀့ၤပ့ၤ) သ၀ီပူၤအံၤအါဒၣ်တက့ၢ်န့ၣ်ကညီဖိတဖၣ်အိၣ်ဆိး၀ဲဒီးဟံၣ်ခိၣ်အိၣ်၀ဲ (၅၈၅) ဖျၢၣ်ဃၣ်ဃၣ်ဒီး ဖဲအပူၤကွံာ်လါစဲးပထ့ဘၢၣ် ၁ သီႇ၃ သီဒီး ၆ သီအနံၤစ့ၢ်ကီး ခီဖျိတၢ်ဒုးကဲထီၣ်၀ဲလၢ ဟီၣ်က၀ီၤတၢ်ဒီသဒၢကမျၢၢ်သုး (PDF)ဒီးပယီၤသုးတဖၣ်အဘၢၣ်စၢၤအဃိပယီၤသုးတဖၣ်နုာ်လီၤအိၣ်၀ဲလၢသ၀ီပူၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
