လါအီးကထိဘၢၣ် ၁၉ သီႇ ၂၀၂၂ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် မၠၣ်၀တံၣ်၀့ၢ်ပူၤ ဖဲအပူၤကွံာ်စှၤသီအခါခီဖျိမ့ၣ်ပိၢ်ပိၢ်ဖးထီၣ်ကဲထီၣ်သးတလီၢ်လီၢ်အဃိ ဒ်သိးစွ့ၤကိၣ်ကိၤဟီၣ်က၀ီၤပူၤတၢ်ဘံၣ်တၢ်ဘၢကအိၣ်အဂီၢ်န့ၣ်ကမၤဃံးထီၣ်၀ဲတၢ်သမံသမိးအဂ့ၢ်န့ၣ် ကညီကီၢ်စဲၣ်သုးခိးကီၢ်ဆၢ(BGF)လီၢ်ခၢၣ်သးၦၤဟ့ၣ်ကူၣ်တၢ်ဒီးပၢဆှၢရဲၣ်ကျဲၤတၢ်ကရူၢ်ဆှၢလံာ်ဆူကညီဖီၣ်စုက၀ဲၤကရူၢ်လၢအဂၤတဖၣ်အအိၣ်ဖဲလါအီးကထိဘၢၣ် ၁၇ သီအနံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
လံာ်ဒုးသ့ၣ်ညါအံၤ(BGF)သုးဟီၣ်က၀ီၤ(၃)လီၢ်ခၢၣ်သးၦၤဟ့ၣ်ကူၣ်တၢ်ဒီးပၢဆှၢတၢ်ကရူၢ်အနဲၣ်ရွဲၣ်ခိၣ်ကျၢၢ် သုးခိၣ်ကျၢၢ်ဖိ စီၤခၠ့ၣ်သူၤ အနီၢ်ကစၢ်ဒၣ်၀ဲဆဲးလီၤမံၤဒီးလံာ်အံၤဆှၢ၀ဲဆူကညီတၢ်မုာ်တၢ်ခုၣ်ကီၣ်ကး(KNU/KNLA-PC)ႇ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၁၀၁)ႇကညီဒီကလုာ်ဂၢၤသးကရၢ(KNDO) သုးရ့ၣ်(၅)အအိၣ်ဒီးလံာ်တၢ်ပာ်ဖျါအပူၤစံး၀ဲလၢ ဒ်သိးမ့ၣ်ပိၢ်ပိၢ်ဖးထီၣ်သုတဆဲး ကဲထီၣ်လၢၤတဂ့ၤအဂီၢ်န့ၣ်ကမၤ၀ဲတၢ်ဃိထံသမိးသမိးဒီးမ့ကဟးထီၣ်က့ၤလီၤလၢဟီၣ်က၀ီၤပူၤန့ၣ်ကဘၣ်ဒုးသ့ၣ်ညါလိာ်သးန့ၣ်လီၤႉ
သုးခိၣ်ကျၢၢ်ဖိ စီၤခၠ့ၣ်သူၤစံး၀ဲလၢ“မ့ၣ်ပိၢ်ပိၢ်ဖးထီၣ်လၢမၠၣ်၀တံၣ်၀့ၢ်ပူၤတလီၢ်လီၢ်လီၤႉ ခါဆူညါဒ်သိးတၢ်သုတပိၢ်ဖးထီၣ်လၢၤတဂ့ၤအဂီၢ်န့ၣ်ပကမၤဃံးထီၣ်တၢ်ဘံၣ်တၢ်ဘၢတစဲးမီၤနီၤႉတၢ်ဂ့ၢ်ခီန့ၣ် (KNLA)ႇ(KNDO)ဒီး(PC)မ့ဟးထီၣ်က့ၤလီၤန့ၣ်ကဘၣ်ဒုးသ့ၣ်ညါလိာ်သးမီၤနီၤႉ ဒ်သိးလၢညါန့ၣ်ပသံဒိးသံကွၢ် တအိၣ်ဘၣ်မီၤနီၤႉပထုးထီၣ်ဃာ်လံာ်နါက့အိၣ်စ့ၢ်လီၤႉတၢ်ဂ့ၢ်အခိၣ်သ့ၣ်ခီန့ၣ်လၢဟီၣ်က၀ီၤတၢ်ဘံၣ်တၢ်ဘၢအဂီၢ်လီၤႉပမၤ၀ဲဒၣ်တၢ်သမံသမိးအံၤလၢဟီၣ်က၀ီၤတၢ်ဘံၣ်တၢ်ဘၢအဂီၢ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ
လၢန့ၣ်အမဲာ်ညါလၢမၠၣ်၀တံၣ်၀့ၢ်မုၢ်နုာ်(စွ့ၤကိၣ်ကိၤမၠဲၤ)ဟီၣ်က၀ီၤသ၀ီတဖၣ်အပူၤစ့ၢ်ကီး (BGF)ကအိၣ်ခိးသမံသမိးမၤနီၣ်မၤဃါတၢ်ဖဲသဲပိၤတြဲၤတတီၤႇကျိၣ်ကွဲၤက၀ီၤ(အ၀ဲ)ႇနၣ်ရံၣ်(အ၀ဲ)တြဲၤ တၢ်လီၢ်(၄)တီၤအဂ့ၢ်န့ၣ် သုးဒိၣ်ကျၢၢ်ဖိ စီၤခၠ့ၣ်သူၤ စံးအါထီၣ်၀ဲန့ၣ်လီၤႉ
“ခဲအံၤလၢစွ့ၤကိၣ်ကိၤန့ၣ်ပပာ်လီၤဃာ်၀ဲဒၣ်တြဲၤအိၣ်ခိးတၢ်လီၢ်(၄)ခါႉလၢသဲပိၤတၢ်လီၢ်တတီၤႇမ့၀ံၤလၢနၣ်ရံၣ်က၀ီၤ(အ၀ဲ)တတီၤႇတတါတြဲၤတၢ်လီၢ်တခါႇကျိၣ်ကွဲၤ(အ၀ဲ)တၢ်လီၢ် ခဲလၢာ်တၢ်လီၢ်(၄)တီၤမီၤနီၤႉ မ့မ့ၢ်လၢမၠၣ်၀တံၣ်ဒီးညံၣ်နီၣ်န့ၣ်တပၣ်ဘၣ်ႉလၢန့ၣ်တကပၤခီန့ၣ်ပၢၤကီၢ်ကသမံသမိး၀ဲမီၤနီၤႉအခိၣ်သ့ၣ်ခီန့ၣ်ပကမၤတၢ်သမံသမိးတၢ်မၤနီၣ်မၤဃါလၢကိၣ်ကိၤဟီၣ်က၀ီၤပူၤလီၤမီၤနီၤႉပမ့မၤဒ်န့ၣ်မးမတၤကရူၢ်ကရၢဟဲမၤပိၢ်ဖးထီၣ်တၢ်လဲၣ်န့ၣ်ပကသ့ၣ်ညါဘၣ်မီၤနီၤ”အဂ့ၢ်န့ၣ်သုးခိၣ်ကျၢၢ်ဖိစီၤခၠ့ၣ်သူၤစံးအါထီၣ်၀ဲန့ၣ်လီၤႉ
သုးဟံးန့ၢ်တၢ်စိတၢ်ကမီၤ၀ံၤအလီၢ်ခံမ့ၣ်ပိၢ်ပိၢ်ဖးထီၣ်ကဲထီၣ်သးလၢမၠၣ်၀တံၣ်၀့ၢ်ပူၤတလီၢ်လီၢ်ဒီး ဖဲအပူၤကွံာ်လါအီးကထိဘၢၣ် ၁၅ သီအနံၤစ့ၢ်ကီး တၢ်ပိၢ်ဖးထီၣ်ဒိၣ်ဒိၣ်မုၢ်မုၢ်ကဲထီၣ်သးလၢကီၢ်ကၠီၣ်တဲၣ်–ကီၢ်ပယီၤကီၢ်ဆၢ နီၣ်ဂံၢ်(၁)တၢ်ရ့လိာ်မုာ်လိာ်တိၤကပၤဒံးန့ၣ်လီၤႉ
