ကဘီယူၤဟဲတ့ၢ်လီၤမ့ၣ်ပိၢ်အဃိသ့ၣ်ဘီဘိလီၢ်က၀ီၤၦၤဃ့ၢ်မှံဟးဖျိး(၁၄၀၀)ဘျဲၣ်ဘၣ်သုးလီၢ်လၢသူမှဲကျိကၢၢ်နံၤ

လါနိၣ်၀့ဘၢၣ် ၁၈ သီႇ၂၀၂၂ နံၣ်ႇ ခ့ၣ်အဲးစံၣ်

သုးမီၤစိရိၤအတၢ်ရဲၣ်တၢ်ကျဲၤအိၣ်လၢကထီၣ်ဟံးန့ၢ်က့ၤမၠၣ်၀တံၣ်ကလံၤထံး(သ့ၣ်ဘီဘိ)သုးကလၢၤဒီး ခီဖျိအ၀ဲသ့ၣ်ခးလီၤကျိဖးဒိၣ်ဆူဒူသ၀ီပူၤဒီးကဘီယူၤစ့ၢ်ကီးဟဲတ့ၢ်လီၤမ့ၣ်ပိၢ်အဃိ သ့ၣ်ဘီဘိလီၢ်က၀ီၤကမျၢၢ်(၁၄၀၀)ဘျဲၣ်ဘၣ်သုးလီၢ်လၢသူမှဲကျိကၢၢ်နံၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ

ဖဲအပူၤကွံာ်လါမ့ၤ ၁၈ သီအနံၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် ထီၣ်မၤန့ၢ် ပယီၤသုးကလၢၤကဲထီၣ်သး၀ံၤအလီၢ်ခံဒ်သိးပယီၤသုးအံၤကထီၣ်ဟံးန့ၢ်က့ၤသုးကလၢၤအံၤအဂီၢ် စှၤသီအတီၢ်ပူၤခီဖျိအ၀ဲသ့ၣ်နုာ်လီၤမၤတၢ်ထီၣ်ဒုးဟဲအါထီၣ်အဃိလီၢ်အိၣ်ကဒုလီၢ်ၦၤဃ့ၢ်မှံဟးဖျိးတဖၣ်ဘၣ်သုးလီၢ်သုးကျဲအဂ့ၢ်န့ၣ်သ့ၣ်ဘီဘိသ၀ီဖိတဂၤစံး၀ဲဒ်အံၤန့ၣ်လီၤႉ

“ခဲအံၤတၢ်ခးလိာ်သးကဲထီၣ်ကိးမုၢ်နံၤဒဲးလီၤႉခီဖျိပယီၤသုးအံၤကက့ၤထီၣ်ဟံးန့ၢ်ကဒါသ့ၣ်ဘီဘိသ၀ီခိၣ်ထိးသုးကလၢၤလၢအ၀ဲသ့ၣ်အိၣ်တ့ၢ်ဃာ်၀ဲအံၤအဃိတၢ်ဒုးကဲထီၣ်၀ဲဒီးကညီကရူၢ်မီၤနီၤႉလၢသ့ၣ်ဘီဘိသ၀ီသူမှဲကျိအဖီခိၣ်န့ၣ်ၦၤဃ့ၢ်မှံဟးဖျိးအိၣ်တဘူၣ်လၢၤဘၣ်ႉသ့ၣ်ဘီဘိ(တီနီၢ်)တီၤထီကၠိၦၤကၠိဖိတဖၣ်နါက့ဘၣ်အိၣ်ဖးလီၤအသးမီၤနီၤႉၦၤကိးဂၤဒဲးန့ၣ်ဘၣ်ယိၣ်၀ဲလၢကဘီယူၤကဟဲတ့ၢ်လီၤမ့ၣ်ပိၢ်လီၤ” အဂ့ၢ်န့ၣ်စံး၀ဲန့ၣ်လီၤႉ

ကတီၢ်ခဲအံံၤလၢဆိၣ်စံမၠဲၣ်သ၀ီတကပၤမ့ၢ်ဂ့ၤႇဂီၤလ့ၤကျဲ(မွ့ၤနကီၤ)ဖယါကိႇဘျၢၣ်ဒိၣ်လီၢ်က၀ီၤ(တီၤကိ)ႇ ဖလူ(ဖယါကိ)တကပၤန့ၣ် ပယီၤသုးခးလီၤရီးကဲးမျိာ်သၣ်ကိးမုၢ်နံၤမုၢ်နၤဒဲးအဂ့ၢ်န့ၣ် လီၢ်က၀ီၤၦၤဟ့ၣ်တၢ်ကစီၣ်ဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ

လၢန့ၣ်အမဲာ်ညါတချုးလါနိၣ်၀့ဘၢၣ်လၢာ်န့ၣ်ပယီၤသုးအတၢ်ရဲၣ်တၢ်ကျဲၤအိၣ်လၢကထီၣ်ဟံးန့ၢ်က့ၤ(သ့ၣ်ဘီဘိ)သုးကလၢၤအံၤတုၤအန့ၢ်ဒီးခီဖျိ(KNLA)သုးပာ်ဖှိၣ်က့ၤခီၣ်ဆၢဒုးကဒါ၀ဲအဃိပယီၤသုးသံဘၣ်ဒိဘၣ်ထံးအါမးအဂ့ၢ်န့ၣ် ဂံၢ်ခီၣ်ထံးဒုးယၤၦၤဟ့ၣ်တၢ်ကစီၣ်ဖိစံး၀ဲန့ၣ်လီၤႉ

“ပယီၤသုးသံဘၣ်ဒိဘၣ်ထံးအါမးမီၤနီၤႉအ၀ဲသ့ၣ်က့ၤဂုၤကဒါလီၢ်ခံႇမ့၀ံၤဟဲက့ၤထီၣ်ကဒါႉအ၀ဲသ့ၣ်ခးလီၤတၢ်ဒီးရီးကဲးမျိာ်သၣ်ဒီတတွဲႉပယီၤသုးလၢအဘၣ်ဒိတဖၣ်န့ၣ်ကက့ၤလီၤစိာ်၀ဲလၢမၠၣ်၀တံၣ်ခီဒၢးက့ၤတသ့ႉလၢဂီၤလ့ၤ(ဗျူဟာ)နါက့ကသံၣ်သရၣ်တအိၣ်ဘၣ်အဃိအ၀ဲသ့ၣ်ခီဃီၤ၀ဲဂီၤလ့ၤထံကျိဒီးလဲၤကူစါယါဘျါ၀ဲလၢယိၤကီၢ်တကပၤအိၣ်မီၤနီၤႉတချုးလါတဘ့ၣ်အံၤလၢာ်ဘၣ်န့ၣ်တိာ်ဃာ်၀ဲလၢကထီၣ်ဟံးန့ၢ်က့ၤသ့ၣ်ဘီဘိသုးကလၢၤအဃိတၢ်ဒုးကဲထီၣ်ကိးမုၢ်နံၤဒဲးလီၤ” အဂ့ၢ်န့ၣ် (KNLA)ဒုးယၤဟီၣ်က၀ီၤၦၤဟ့ၣ်တၢ်ကစီၣ်ဖိစံး၀ဲန့ၣ်လီၤႉ

ပယီၤသုးအံၤဒ်သိးကလုၢ်ဘၢဒိၣ်စိ၀ဲမၠၣ်၀တံၣ်–ဂီၤလ့ၤကျဲဒီတဘိအဂီၢ်န့ၣ် နုာ်လီၤမၤ၀ဲဒုးယၤတၢ်ဟူးတၢ်ဂဲၤထီၣ်ဘးထီၣ်လၢတနံၣ်ဃၣ်ဃၣ်လံဒီးအလါတဆံဘျဲၣ်အတီၢ်ပူၤအံၤ လုၢ်ဘၢဒိၣ်စိ၀ဲကျဲအံၤတန့ၢ်ဒံးဘၣ်ဒီးခံခီခံကပၤတၢ်ဒုးဆဲးကဲထီၣ်ဒံး၀ဲတပယူာ်ဃီန့ၣ်လီၤႉ

ခီဖျိတၢ်ခးလိာ်သးကဲထီၣ်ဒံးတပယူာ်ဃီအဃိလ့က့ၣ်ကိာ်လီၢ်က၀ီၤႇဆိၣ်စံမၠဲၣ်လီၢ်က၀ီၤႇသ့ၣ်ဘီဘိလီၢ်က၀ီၤဒီးဂီၤလ့ၤလီၢ်က၀ီၤအပူၤကမျၢၢ်အဂၤ(၁၀၀၀၀)ဃၣ်ဃၣ်ဘၣ်ဃ့ၢ်မှံဟးဖျိး၀ဲအဖၢမုၢ်ဒံးန့ၣ်လီၤႉ