Home တၢ်ကစီၣ် တၢ်ခးသံ(ယ့ကီၢ်ဆၣ်)ပၢၤကီၢ်ခိၣ်တၢ်ဂ့ၢ်အံၤအဃိကၠိဖိမိၢ်ပၢ်တဖၣ်လဲၤဆှၢအဒံၣ်အဖိလၢကၠိတဘူၣ်လၢၤဘၣ်

တၢ်ခးသံ(ယ့ကီၢ်ဆၣ်)ပၢၤကီၢ်ခိၣ်တၢ်ဂ့ၢ်အံၤအဃိကၠိဖိမိၢ်ပၢ်တဖၣ်လဲၤဆှၢအဒံၣ်အဖိလၢကၠိတဘူၣ်လၢၤဘၣ်

174
0
Photo: ရေးဘီလူးအဖွဲ့

လါနိၣ်၀့ဘၢၣ် ၂၄ သီႇ ၂၀၂၂ နံၣ်ႇ ခ့ၣ်အဲးစံၣ်

လၢတလၢၤကီၢ်စဲၣ် ယ့ကီၢ်ဆၣ်အပူၤ တၢ်ခးသံသုးမီၤစိရိၤအပၢၤကီၢ်ခိၣ်တၢ်ဂ့ၢ်အံၤအဃိ ဖဲတနံၤလါနိၣ်၀့ဘၢၣ် ၂၄ သီဂီၤခီန့ၣ်ကၠိဖိမိၢ်ပၢ်တဖၣ်လဲၤဆှၢအဒံၣ်အဖိလၢကၠိတဘူၣ်လၢၤဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲမဟါန့ၣ် ခီဖျိယ့ဘလူကရူၢ်အံၤအိၣ်ခိးခး၀ဲ(ယ့ကီၢ်ဆၣ်)ပၢၤကီၢ်ခိၣ်အသိလ့ၣ်အံၤလၢတၢ်ဘၢၣ်စၢၤအဃိ ပၢၤကီၢ်သံ(၃)ဂၤအကျါပၣ်ဃုာ်၀ဲယ့ကီၢ်ဆၣ်ပၢၤကီၢ်ခိၣ်အံၤန့ၣ်လီၤႉတၢ်ကဲထီၣ်သး၀ံၤအလီၢ်ခံန့ၣ်ပယီၤသုးပာ်လီၤ၀ဲတၢ်ဘံၣ်တၢ်ဘၢလၢ၀့ၢ်ပူၤ၀့ၢ်ချၢဃံးဃီၣ်ဒီၣ်ဒီးအိၣ်ခိးသမံသမိးကမျၢၢ်ထံဖိကီၢ်ဖိလၢအဟးထီၣ်က့ၤလီၤတဖၣ်အဃိဘၣ်ယိၣ်တၢ်လၢဖိဒံဖိသၣ်တဖၣ်အဂီၢ်ဒီးလဲၤဆှၢဖိသၣ်လၢကၠိတလၢၤ၀ဲဘၣ်အဂ့ၢ်န့ၣ် ကၠိဖိမိၢ်ပၢ်တဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ပနၢ်ဟူတၢ်ကစီၣ်တခါန့ၣ်၀ံၤဘျီန့ၣ်တယံၤဘၣ်လၢ၀့ၢ်ပူၤန့ၣ်ကၠိဖိမိၢ်ပၢ်လဲၤကိးက့ၤအဒံၣ်အဖိလၢကၠိမီၤနီၤႉဖဲတနံၤညါအံၤဂီၤခီနါက့ၦၤတဒုးထီၣ်ၦၤဒံၣ်ၦၤဖိလၢကၠိလၢၤဘၣ်ႉၦၤဘၣ်ယိၣ်လၢဖိဒံဖိသၣ်ကဘၣ်တၢ်တမံၤမံၤအဃိမတၤတဂၤမးတဟးထီၣ်လၢတၢ်ချၢလၢၤဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ဖဲမဟါလါနိၣ်၀့ဘၢၣ် ၂၃ သီ ဂီၤခီ ၈း၂၅ မံးနံးဃၣ်ဃၣ်အဆၢကတီၢ်န့ၣ် တၢ်ခိးခး(ယ့ကီၢ်ဆၣ်)ပၢၤကီၢ်ခိၣ် ဖဲကၠိလီသ၀ီသီ ဒုးယၤပၢဆှၢရဲၣ်ကျဲၤ၀ဲၤလီၢ်ခိၣ်သ့ၣ်(စကခ–၁၉) မုၢ်ထီၣ်ကလံၤထံးကီၢ်ခီသုး၀ဲၤလီၢ်ခိၣ်သ့ၣ် (ရတခ)စုတီၤဖီလာ်ဒုးယၤ၀ဲၤကျိၤအကပၤဒီးဖဲန့ၣ်ပၢၤကီၢ်သံ(၂)ဂၤအကျါပၣ်ဃုာ်၀ဲပၢၤကီၢ်ခိၣ်တဂၤဒီးမၤန့ၢ်၀ဲကျိ(၂)ခိၣ်အဂ့ၢ်န့ၣ်ယ့ဘလူကရူၢ်အခိၣ်စံး၀ဲန့ၣ်လီၤႉ

အ၀ဲစံး၀ဲလၢ“ၦၤသံခီန့ၣ်(၃)ဂၤအကျါန့ၣ်ပၣ်ဃုာ်၀ဲပၢၤကီၢ်ခိၣ်မီၤနီၤႉဖဲအကျါန့ၣ်ပၣ်၀ဲဒၣ်ဒီးသုးစကီၤပြံတဂၤႉပၢၤကီၢ်ခိၣ်နါက့ပၣ်စ့ၢ်ႉမ့၀ံၤပၣ်ဃုာ်စ့ၢ်ကီးအ၀ဲသ့ၣ်အၦၤပၢၤကီၢ်တဂၤႉအ၀ဲသ့ၣ်ဟဲဒီးသိလ့ၣ်ပအိၣ်ခိးခးအီၤမီၤနီၤႉပမၤန့ၢ်၀ဲဒၣ်(M-16)တခိၣ်ႇကျိဖုၣ်တခိၣ်ဒီးကျိချံႇကျိအဒၢတဖၣ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ဖဲအပူၤကွံာ်လါစဲးပထ့ဘၢၣ်အခါစ့ၢ်ကီး ယ့ဘလူကရူၢ်အိၣ်ခိးခး၀ဲ(ခီၤစၤ)ပၢၤကီၢ်ခိၣ်အသိလ့ၣ်ဖဲ (ယ့၀့ၢ်)ကဘၠၤကၠံသ၀ီပူၤအဃိ မၤန့ၢ်၀ဲဒၣ်ကျိဖိတခိၣ်ဒံးအဂ့ၢ်န့ၣ် ကရူၢ်အခိၣ်စံး၀ဲန့ၣ်လီၤႉ