Home တၢ်ကစီၣ် သၣ်တီၣ်ကလံၤစိးၦၤဃ့ၢ်မှံဟးဖျိး(၈၀၀)ဘျဲၣ်လိၣ်ဘၣ်ဆ့ကၤကလၢၤဒီးတၢ်အီၣ်တၢ်အီ

သၣ်တီၣ်ကလံၤစိးၦၤဃ့ၢ်မှံဟးဖျိး(၈၀၀)ဘျဲၣ်လိၣ်ဘၣ်ဆ့ကၤကလၢၤဒီးတၢ်အီၣ်တၢ်အီ

111
0
Photo: Tun Myanmar Donation

လါနိၣ်၀့ဘၢၣ် ၂၂ သီႇ ၂၀၂၂ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် သၣ်တီၣ်ကၠံကီၢ်ဆၣ် ကလံၤစိးဒူသ၀ီ ကမျၢၢ်ၦၤဃ့ၢ်မှံဟးဖျိးအဂၤ(၈၀၀)ဃၣ်ဃၣ်အံၤ ကတီၢ်ခဲအံၤတၢ်ကီတၢ်ခဲအိၣ်ထီၣ်လၢတၢ်လုၢ်အီၣ်နီၢ်ခိသးသမူဒီးခီဖျိတၢ်ချံၣ်ထီၣ်လံအဃိလိၣ်ဘၣ်၀ဲဆ့ကၤကလၢၤသ့ၣ်တဖၣ်အဂ့ၢ်န့ၣ် သ့ၣ်ညါဘၣ်လၢ(Tun Myanmar Donation)ကရူၢ်လၢအမၤစၢၤၦၤဃ့ၢ်မှံဟးဖျိးတဖၣ်အအိၣ် န့ၣ်လီၤႉ

ခီဖျိတၢ်ဒုးကဲထီၣ်လၢကယါ(ကရ့ၣ်နံၣ်)တကပၤအဃိ သၣ်တီၣ်ကၠံကီၢ်ဆၣ် ကလံၤထံး ယၤဒိၤသ၀ီႇ၀ၣ်သီခိၣ်ႇ သီၣ်ယ့ၤခၣ်ဒီးခ့ခၠံသ၀ီလီၢ်က၀ီၤကမျၢၢ်တဖၣ်ဘၣ်ဃ့ၢ်မှံဟးဖျိး၀ဲဒီး တနီၤန့ၣ်ဟဲတုၤအိၣ်၀ဲဖဲအံၤန့ၢ်တနံၣ်ဘျဲၣ် ဃၣ်ဃၣ်လံန့ၣ်လီၤႉၦၤဃ့ၢ်မှံဟးဖျိးတဖၣ်အကျါပၣ်အါ၀ဲဒၣ်လၢပိာ်မုၣ်ပိာ်မၢၤႇဖိဒံဖိသၣ်ဒီးသူၣ်က့သးၦၢ်တဖၣ်လီၤအဂ့ၢ်န့ၣ် ကရူၢ်အၦၤဘၣ်မူဘၣ်ဒါတဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

“တနီၤန့ၣ်အတဒိးန့ၢ်ဘၣ်ဟုသးကအိၣ်သၢလါလွံၢ်လါလံႉခဲအံၤန့ၣ်အ၀ဲသ့ၣ်ဟးတူၢ်ငါလၢသ၀ီပူၤဒီးလၢကအီၣ်ကအီအဂီၢ်န့ၣ်ဘၣ်ဘှါဆှဲ၀ဲဒ်န့ၣ်လီၤမီၤနီၤႉလိၣ်ဘၣ်၀ဲဒၣ်ဟုသးႇသိအီၣ်ႇအံသၣ်ဒီးအလိၣ်ဒိၣ်ကတၢၢ်ခီန့ၣ်ဆ့ကၤကလၢၤမီၤနီၤႉတၢ်ချံၣ်ဒိၣ်တလၢအဃိဆ့ကၤကလၢၤတကူတလၢဘၣ်ႉတၢ်ဘၣ်သမုၣ်ႇတၢ်ကူးအီၣ်အဃိကသံၣ်နါက့လိၣ်စ့ၢ်ကီးလီၤ” အဂ့ၢ်န့ၣ်စံး၀ဲန့ၣ်လီၤႉ

ကမျၢၢ်ၦၤဃ့ၢ်မှံဟးဖျိးတဖၣ်အံၤတအိၣ်၀ဲဒၣ်လၢလီၢ်အိၣ်ကဒုအလီၢ်ဘၣ်ဒီး မ့မ့ၢ်တခီအိၣ်ဒိးသန့ၤထီၣ်သးလၢ သ၀ီပူၤၦၤဟံၣ်ၦၤဃီအဂ့ၢ်န့ၣ်ခရံာ်ဖိၦၤဂ့ၢ်၀ီတၢ်ဖံးတၢ်မၤဒီးတၢ်ဂုာ်ထီၣ်ပသီထီၣ်၀ဲၤကျိၤလၢအမၤစၢၤၦၤဃ့ၢ်မှံဟးဖျိးအသရၣ်တဂၤစ့ၢ်ကီးစံး၀ဲဒ်အံၤန့ၣ်လီၤႉ

Photo: Tun Myanmar Donation

အ၀ဲစံး၀ဲလၢ“တၢ်လၢဟံၣ်ကစၢ်ဟ့ၣ်မၤစၢၤ၀ဲတဖၣ်န့ၣ်ယံၤထီၣ်ယံၤထီၣ်ဒုတဘၣ်ဂီၢ်ဘၣ်မီၤနီၤႉၦၤမ့ဟဲတုၤလၢပအိၣ်ဆိးလီၢ်က၀ီၤပူၤန့ၣ်ဒ်တၢ်အိၣ်ဒီးၦၤအသိးတသ့ဖဲမသ့ပမၤစၢၤလီၤႉခဲအံၤဒုလၢကအီၣ်ကအီအဂီၢ်န့ၣ်ပဘှါဆှဲသ့ဒံးမီၤနီၤႉပမၤစၢၤအါအါဂီၢ်ဂီၢ်ဒိၣ်ဒိၣ်မုၢ်မုၢ်ဒုတအိၣ်ဒံးဘၣ်ႉၦၤအဲၣ်ဒိးလဲၤမၤစၢၤမ့အိၣ်န့ၣ်ပမၤစၢၤအ၀ဲသ့ၣ်လၢကျဲတၢ်လဲၤတၢ်က့ၤတကပၤအဂီၢ်ဒုသ့လီၤမီၤနီၤ”အဂ့ၢ်န့ၣ်စံး၀ဲန့ၣ်လီၤႉ

လၢကညီကီၢ်စဲၣ် ကလံၤစိးတကပၤ စးထီၣ်ဖဲ(၂၀၂၂)လါမ့ၤထီၣ်တုၤလၢခဲအံၤန့ၣ် သၣ်တီၣ်ကၠံတၢ်ဒီသဒၢဟီၣ်က၀ီၤလီၤဆီ(NTDF)စုတီၤအဖီလာ်ကရူၢ်ဒီးပယီၤသုးတဖၣ်အဘၢၣ်စၢၤတၢ်ဒုးကဲထီၣ်၀ဲတလီၢ်လီၢ်အဃိလီၢ်က၀ီၤကမျၢၢ်လၢအိၣ်ဟီၣ်က၀ီၤဖဲန့ၣ်အပူၤတဖၣ်ဘၣ်ဃ့ၢ်မှံဟးဖျိး၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤၦၤဟ့ၣ်တၢ်ကစီၣ်ဖိအအိၣ်န့ၣ်လီၤႉ