Home တၢ်ကစီၣ် သုးမီၤစိရိၤကဘီယူၤဟဲဆှၣ်တၢ်ကိးမုၢ်နံၤမုၢ်နၤအဃိကီးတရံးကလံၤထံးလီၢ်က၀ီၤကမျၢၢ်ဟးစံၣ်ပလဲာ်သးအိၣ်အဂၤ(၅၀၀၀)ဘျဲၣ်

သုးမီၤစိရိၤကဘီယူၤဟဲဆှၣ်တၢ်ကိးမုၢ်နံၤမုၢ်နၤအဃိကီးတရံးကလံၤထံးလီၢ်က၀ီၤကမျၢၢ်ဟးစံၣ်ပလဲာ်သးအိၣ်အဂၤ(၅၀၀၀)ဘျဲၣ်

272
0
Photo: CJ

လါဒံၣ်စ့ဘၢၣ် ၂ သီႇ ၂၀၂၂ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် ကီးတရံးကီၢ်ဆၣ်အပူၤ ခီဖျိသုးမီၤစိရိၤကဘီယူၤဟဲဆှၣ်တၢ်ကိးမုၢ်နံၤမုၢ်နၤဒဲးအဃိ ကီးတရံးကလံၤထံးသ၀ီဖိအဂၤ(၅၀၀၀)ဘျဲၣ်ဘၣ်ဟးစံၣ်ပလဲာ်သးအဂ့ၢ်န့ၣ် ၦၤလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ်အပူၤ တကီၢ်ခါခဲအံၤခီဖျိသုးမီၤစိရိၤကဘီယူၤဟဲဆှၣ်တၢ်ကိးမုၢ်နံၤမုၢ်နၤဒဲးအဃိလီၢ်က၀ီၤကမျၢၢ်တဖၣ်အိၣ်လၢဟံၣ်တဘူၣ်လၢၤဘၣ်ဒီးဘၣ်ဟးစံၣ်ပလဲာ်သးဒ်အံၤလီၤအဂ့ၢ်န့ၣ်ၦၤလၢမၤစၢၤၦၤဃ့ၢ်မှံဟးဖျိးတဂၤစံးဘၣ်ခ့ၣ်အဲးစံၣ်–ကညီတၢ်ကစီၣ် ဒ်အံၤန့ၣ်လီၤႉ

အ၀ဲစံး၀ဲလၢ“ၦၤလၢအတစံၣ်ဘၣ်တဖၣ်န့ၣ်လၢမုၢ်ဆါခါန့ၣ်လဲၤမၤတၢ်လၢကျီးပူၤမ့မ့ၢ်မုၢ်နၤခီန့ၣ်လဲၤမံ၀ဲလၢသီခါဖၠၣ်မီၤနီၤႉအါဒၣ်တက့ၢ်န့ၣ်ၦၤဟးစံၣ်ပလဲာ်သးလီၤႉလၢလီကဲၤသ၀ီႇဖါကၠၣ်ႇသမ့ၤဒိၣ်ႇ၀့ကဘဲၣ်သ၀ီတကပၤမ့ၢ်ဂ့ၤႇလၢသိစဲၤသိဆူၣ်ႇအၤကီၤႇသရံၣ်သခီသ၀ီတကပၤနါက့ၦၤဟးစံၣ်ပလဲာ်သးမီၤနီၤ”အဂ့ၢ်န့ၣ်စံး၀ဲန့ၣ်လီၤႉ

ဖဲအပူၤကွံာ်လါနိၣ်၀့ဘၢၣ်အတီၢ်ပူၤခီဖျိသုးမီၤစိရိၤကဘီယူၤဟဲခးလီၤတၢ်ႇခးလီၤစ့ၢ်ကီးကျိဖးဒိၣ်တကးဒံးဘၣ်အမဲာ်ညါပယီၤသုးကျိၤနုာ်လီၤမၤ၀ဲတၢ်ထီၣ်ဒုးလၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤပူၤအဃိ တၢ်ဒုးကဲထီၣ်၀ဲတပယူာ်ဃီဒီးဟီၣ်က၀ီၤ(KNLA)သုးပာ်ဖှိၣ်အသိးသုးမီၤစိရိၤဘီယူၤစ့ၢ်ကီးဟဲဆှၣ်တၢ်ႇဟဲတ့ၢ်လီၤကျိဖးဒိၣ်လၢမုၢ်နၤခီဟဲအါထီၣ်၀ဲအဂ့ၢ်န့ၣ်လီၢ်က၀ီၤကမျၢၢ်စံး၀ဲန့ၣ်လီၤႉ

“ခဲအံၤလၢမုၢ်ဆါခီန့ၣ်ပဘၣ်ပျံၤလၢတၢ်ဒုးကကဲထီၣ်ဒီးပယီၤသုးမီၤနီၤႉလၢမုၢ်နၤခီန့ၣ်ပဘၣ်လဲၤမံဖှိၣ်လၢသီခါဖၠၣ်ႇတၢ်ဘါယွၤသရိာ်ႇရီဘၢၣ်ကျီးႇတူၢ်ရ့ၣ်ကျီးပူၤမီၤနီၤႉပယီၤသုးအိၣ်ခိးသမံသမိးတၢ်လၢကျဲပူၤအဃိတၢ်အီၣ်တၢ်အီနါက့တအိၣ်လၢၤဘၣ်” အဂ့ၢ်န့ၣ်ကမျၢၢ်လၢအဘၣ်ဟးစံၣ်ပလဲာ်သးတဂၤစ့ၢ်ကီးစံး၀ဲန့ၣ်လီၤႉ

ဒ်န့ၣ်အသိးလၢကီးတရံး၀့ၢ်ကလံၤထံးဟီၣ်က၀ီၤဒီးမၠၣ်၀တံၣ်ကလံၤထံးဂီၤလ့ၤ–ကနဲလ့လီၢ်က၀ီၤႇကၠၤအ့စ့ၣ်ကၠံႇ ဃိၣ်သၢဖျၢၣ်လီၢ်က၀ီၤကပၤန့ၣ်ပယီၤသုးဒီး(KNLA)သုးပာ်ဖှိၣ်ႇကီၢ်သူလ့ၤသုးမုၢ်ဒိၣ်(KTLA)အဘၢၣ်စၢၤဒုးယၤတၢ်ဖ့ၣ်စၢကဲထီၣ်ဒံး၀ဲတပယူာ်ဃီန့ၣ်လီၤႉ

ကတီၢ်ခဲအံၤလၢကီးတရံးႇကၠၤအ့စ့ၣ်ကၠံႇဃိၣ်သၢဖျၢၣ်လီၢ်က၀ီၤဒီတကျိၤန့ၣ်ကျဲတၢ်ဆဲးကျိးဟးဂီၤ၀ဲဒီး ခီဖျိပယီၤသုးဒီး(BGF)အံၤကးတံၢ်ဃာ်၀ဲတၢ်စိာ်ထီၣ်စိာ်လီၤတၢ်အီၣ်တၢ်အီႇကသံၣ်ကသီႇတၢ်ဖိတၢ်လံၤတဖၣ်ဒီးအိၣ်ခိးသမံသမိးတၢ်ဟဲအါထီၣ်အဃိလီၢ်က၀ီၤၦၤဃ့ၢ်မှံဟးဖျိးတဖၣ်အံၤတၢ်ကီတၢ်ခဲအိၣ်ထီၣ်လၢတၢ်အီၣ်တၢ်အီအဂ့ၢ်န့ၣ််လီၢ်က၀ီၤကမျၢၢ်စံး၀ဲန့ၣ်လီၤႉ