Home တၢ်ကစီၣ် တၢ်က့ၤအိးထီၣ်ကဒါမၠၣ်၀တံၣ်–မဲၢ်ဆီးတၢ်ရ့လိ၁်မု၁်လိ၁်နီၣ်ဂံၢ်(၁)တိၤလံ

တၢ်က့ၤအိးထီၣ်ကဒါမၠၣ်၀တံၣ်–မဲၢ်ဆီးတၢ်ရ့လိ၁်မု၁်လိ၁်နီၣ်ဂံၢ်(၁)တိၤလံ

338
0
Photo: CJ

လါယနူၤအါရံၤ ၁၂ သီႇ ၂၀၂၃ သီႇ ခ့ၣ်အဲးစံၣ်

ကီၢ်ကၠီၣ်တဲၣ်–ကီၢ်ပယီၤကီၢ်ဆၢ မၠၣ်၀တံၣ်–မဲၢ်ဆီးတၢ်ရ့လိာ်မုာ်လိာ်နီၣ်ဂံၢ်(၁)တိၤလၢတၢ်ကးတံၢ်ဃာ်အီၤယံၤ (၃)နံၣ်ဘျဲၣ်အံၤ ဖဲတနံၤအံၤလါယနူၤအါရံၤ ၁၂ သီ ဂီၤခီအဆၢကတီၢ်န့ၣ် တၢ်စးထီၣ်က့ၤအိးထီၣ်ကဒါ၀ဲလံဒီး ကတီၢ်ခဲအံၤၦၤဟးထီၣ်က့ၤလီၤလၢမဲၢ်ဆီး၀့ၢ်ပူၤတအိၣ်ဒံး၀ဲဘၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ

ဖဲတနံၤအံၤဂီၤခီ ၈း၃၀ ဃၣ်ဃၣ်အဆၢကတီၢ်န့ၣ် တၢ်မၤ၀ဲတၢ်အိးထီၣ်မၠၣ်၀တံၣ်–မဲၢ်ဆီးတၢ်ရ့လိာ်မုာ်လိာ် နီၣ်ဂံၢ်(၁)တိၤမူးတၢ်ရဲၣ်တၢ်ကျဲၤဒီးမူးအိးထီၣ်ဘျီ၀ဲအံၤအပူၤန့ၣ်မဲၢ်ဆီးပၢပြးၦၤဘၣ်မူဘၣ်ဒါႇမၠၣ်၀တံၣ်သုးမီၤစိရိၤပၢပြးကရူၢ်ဒီးခံခီခံကပၤတၢ်မၤကစၢ်တနီၤဟဲထီၣ်အိးထီၣ်၀ဲန့ၣ်လီၤႉ

“တိၤစးထီၣ်အိးထီၣ်ဖဲမဂီၤလီၤအဃိၦၤတဟးထီၣ်က့ၤလီၤနီတဂၤဒံးဘၣ်ႉမ့ၢ်သိလ့ၣ်လဲႇတၢ်ပျဲဒီးတၢ်သိၣ်တၢ်သီတဖၣ်အိၣ်ဒ်လဲၣ်န့ၣ်ပတသ့ၣ်ညါနီတမံၤဒံးဘၣ်ႉတိၤကပၤကျဲနါက့ပံးႇလၢက၀ီၤဒ့ပူၤနါက့သုးသိလ့ၣ်ပၢၤကီၢ်သိလ့ၣ်ဟးဆှၣ်တၢ်အဃိၦၤအိးထီၣ်တိၤန့ၣ်ၦၤတလဲၤနီတဂၤဘၣ်ႉအိၣ်ထဲအ၀ဲသ့ၣ်ကရူၢ်လီၤ” အဂ့ၢ်န့ၣ် ကမျၢၢ်လၢအိၣ်ဘူးဒီးနီၣ်ဂံၢ် (၁) တိၤတဂၤစံး၀ဲန့ၣ်လီၤႉ

စးထီၣ်ဖဲအပူၤကွံာ်(၂၀၂၀)အခါ ခီဖျိခိ၀ံၣ်–၁၉ တၢ်ဆါဘၣ်ကူဘၣ်ဂာ်ရၤလီၤသးအဃိ တၢ်ကးတံၢ်ကွံာ်၀ဲမၠၣ်၀တံၣ်–မဲၢ်ဆီးတၢ်ရ့လိာ်မုာ်လိာ်နီၣ်ဂံၢ်(၁)တိၤအံၤန့ၢ်၀ဲ(၃)နံၣ်ဃၣ်ဃၣ်လံဒီး ဘၣ်ဆၣ်ဖဲတနံၣ်အံၤ(၂၀၂၃)လါယနူၤအါရံၤ ၁၂ သီအနံၤအံၤန့ၣ် ဘၣ်တၢ်က့ၤထီၣ်ကဒါတိၤအံၤလံဒီးတၢ်စးထီၣ်ပျဲဟးထီၣ်က့ၤလီၤကဒါ၀ဲလံန့ၣ်လီၤႉ

တၢ်က့ၤအိးထီၣ်ကဒါတိၤခဲအံၤတၢ်ပာ်ပနီၣ်သိလ့ၣ်အဘူးအလဲႇတၢ်ဟးထီၣ်က့ၤလီၤႇသိလ့ၣ်ဒီးပနံာ်တၢ်ဖိတၢ်လံၤအတၢ်အိၣ်သးအိၣ်ဒ်လဲၣ်န့ၣ်တၢ်တသ့ၣ်ညါ၀ဲဒံးဘၣ်အဃိဘၣ်အိၣ်ခိးကွၢ်လၢၦၤဟးထီၣ်က့ၤလီၤတၢ်အိၣ်သးအဖီခိၣ်ဒံးအဂ့ၢ်န့ၣ် မၠၣ်၀တံၣ်–မဲၢ်ဆီး ၦၤနီသိလ့ၣ်ဖိတဖၣ်စံး၀ဲန့ၣ်လီၤႉ

လၢန့ၣ်အမဲာ်ညါတိၤလီၤက့ၤအိးထီၣ်ကဒါမ့မ့ၢ်တၢ်ခိးထၢတၢ်အဘူးအလဲလီၢ်တအိးထီၣ်ဒံးဘၣ်အဃိ နီဒိးလဲသိလ့ၣ်တဘူၣ်ဒံးဘၣ်ဒီးနၢ်ဟူလၢမဲၢ်ဆီး၀့ၢ်န့ၣ်ၦၤလဲၤထီၣ်န့ၢ်ထဲလၢသိလ့ၣ်အိၣ်ဒီးလံာ်လဲၢ်တဖၣ်လီၤအသိး တသ့ၣ်ညါဘၣ်တၢ်ဘူးတၢ်လဲဒီးတၢ်သိၣ်တၢ်သီတၢ်အိၣ်သးတဖၣ်ဒံးဘၣ်အဃိၦၤပနံာ်ကၤတၢ်ဖိႇၦၤမၤတၢ်ဖိလၢအလဲၤတူၢ်ငါတနံၤဂီၢ်သ့ၣ်တဖၣ်လဲၤထီၣ်လၢန့ၣ်တကပၤတဘူၣ်ဒံး၀ဲဘၣ်အဂ့ၢ်န့ၣ် မၠၣ်၀တံၣ်–မဲၢ်ဆီး ၦၤနီသိလ့ၣ်ဖိတဂၤစံး၀ဲအသိး သ့ၣ်ညါဘၣ်န့ၣ်လီၤႉ