လါယနူၤအါရံၤ ၁၇ သီႇ ၂၀၂၃ သီႇ ခ့ၣ်အဲးစံၣ်
လၢကီးတရံးကီၢ်ရ့ၣ် ကြုၢ်တုကီၢ်ဆၣ်အပူၤ ဖဲတၢ်နုာ်လီၤခး၀ဲ(ကီၣ်ဘ့)ပၢၤကီၢ်တၢ်လီၢ်အခါ ခီဖျိပၢၤကီၢ်လၢအိၣ်ခူသူၣ်သးဖဲ(မိၣ်တၢ်မုာ်တၢ်ခုၣ်ကရူၢ်)၀ဲၤဒၢးအံၤတဖၣ်ခးတပျုာ်တပျီာ်တၢ်အဃိ သ၀ီဖိသံဘၣ်ဒိဘၣ်ထံးအိၣ်၀ဲအဂ့ၢ်န့ၣ် လီၢ်က၀ီၤကမျၢၢ်လၢအိၣ်တၢ်ခိၣ်တၢ်ဃၢၤဖဲန့ၣ်တဖၣ်စံး၀ဲန့ၣ်လီၤႉ
ဖဲလါယနူၤအါရံၤ ၁၆ သီ မုၢ်ထူၣ် ၁၂ နၣ်ရံၣ်ဘျဲၣ်အဆၢကတီၢ်န့ၣ် တၢ်နုာ်လီၤခး၀ဲကီၣ်ဘ့–ကီၣ်ပီၣ်သ၀ီ ကီၣ်တၤ တၢ်လိာ်ကွဲတၢ်တၤကျိၣ်တၤစ့လီၢ်ဒီးကီၣ်ဘ့ပၢၤကီၢ်တၢ်လီၢ်အံၤဒီး ဖဲန့ၣ်ခီဖျိပၢၤကီၢ်လၢအိၣ်ခူသူၣ်သးဖဲ(ကီၣ်ဘ့)သ၀ီ မိၣ်တၢ်မုာ်တၢ်ခုၣ်ကရူၢ်၀ဲၤဒၢးအံၤတဖၣ် ခးတပျုာ်တပျီာ်တၢ်အဃိ ကမျၢၢ်ၦၤပိာ်မုၣ်သံ၀ဲ(၁)ဂၤဒီး ဘၣ်ဒိ၀ဲ(၃)ဂၤ အဂ့ၢ်န့ၣ် ကမျၢၢ်လၢအိၣ်ဘူးဒီးတၢ်ကဲထီၣ်သးတဂၤစံး၀ဲဒ်အံၤန့ၣ်လီၤႉ
“ပၢၤကီၢ်၀ဲၤလီၢ်၀ဲန့ၣ်ပၢၤကီၢ်သုးတအိၣ်လၢၤဘၣ်ကအိၣ်လၢအသီတဆံႇတဆံယဲၢ်သီလံႉပၢၤကီၢ်တနီၤန့ၣ်လဲၤအိၣ်ခူသူၣ်သးလၢ(မိၣ်တၢ်မုာ်တၢ်ခုၣ်)ကရူၢ် နဲၤအဲၣ်ခၠါ၀ဲၤဒၢး လၢအတဘူးတယံၤဒီးအ၀ဲၤလီၢ်ဘၣ်န့ၣ်မီၤနီၤႉ အ၀ဲသ့ၣ်ခးလီၤတၢ်လၢသ၀ီပူၤအဃိ(ကီၣ်ပီၣ်)သ၀ီဖိပိာ်မုၣ်သံကွံာ်၀ဲ (၁) ဂၤဒီးဘၣ်ဒိ၀ဲ (၃) ဂၤ” အဂ့ၢ်န့ၣ် သ၀ီဖိလၢအိၣ်ဘူးဒီးပၢၤကီၢ်အိၣ်ခူသူၣ်အလီၢ်အံၤတဂၤစံး၀ဲန့ၣ်လီၤႉ
တၢ်နုာ်လီၤခးပၢၤကီၢ်၀ဲၤလီၢ်ဘျီ၀ဲအံၤအပူၤန့ၣ်ကမျၢၢ်သံဘၣ်ဒိဘၣ်ထံးအိၣ်၀ဲအသိး ပၢၤကီၢ်တကပၤစ့ၢ်ကီးသံဘၣ်ဒိဘၣ်ထံးကအိၣ်လၢ(၂)ဂၤညါအဂ့ၢ်န့ၣ် သ၀ီဖိလၢဘူးဒီး(KNU/KNLA-PC) ကညီတၢ်မုာ်တၢ်ခုၣ်ကီၣ်ကးကရူၢ်တဂၤစံး၀ဲန့ၣ်လီၤႉ
ခီဖျိတၢ်ခးလိာ်သးကဲထီၣ်အဃိလီၢ်က၀ီၤသ၀ီဖိတဖၣ်ဖဲအလဲၤစံၣ်အိၣ်လၢသ၀ီအဂၤအခါ ဖဲလါယနူၤအါရံၤ ၁၆ သီ ဟါခီအဆၢကတီၢ်န့ၣ် ပယီၤသုးနုာ်လီၤမၤအါထီၣ်သုးဂံၢ်ဘါလၢ(ကီၣ်ဘ့)သ၀ီပူၤအါအါဂီၢ်ဂီၢ်အဃိ ဘၣ်ယိၣ်လၢပယီၤသုးကနုာ်လီၤအိၣ်လၢဟံၣ်ပူၤဒီးကနုာ်လီၤဟံတၢ်ဖိတၢ်လံၤတဖၣ်အဂ့ၢ်န့ၣ် ကီၣ်ဘ့သ၀ီဖိတဖၣ်စံး၀ဲဒ်အံၤန့ၣ်လီၤႉ
“ခဲအံၤခီဖျိပယီၤသုးႇ (BGF)နုာ်လီၤမၤအါထီၣ်သုးဂံၢ်ဘါလၢသ၀ီပူၤအဃိပဘၣ်ယိၣ်လၢကနုာ်လီၤအိၣ်လၢပဟံၣ်ပူၤႇကနုာ်လီၤဟံပတၢ်ဖိတၢ်လံၤမီၤနီၤႉလၢပသ၀ီပူၤအံၤစးထီၣ်လၢ(နအဖ) အူသါစွ့ၤစိၤတုၤလၢခဲအံၤန့ၣ်တၢ်ဒုးကဲထီၣ်တအိၣ်ဘၣ်ကန့ၢ်လၢအနံၣ် (၃၀) ဃၣ်ဃၣ်လံႉ ခဲအံၤတၢ်ပၢၢ်ဆၢကရူၢ်နုာ်လီၤခးတုၤလၢအံၤလံအဃိ ပယီၤသုးႇ (BGF)‚ တလၢၤတၢ်မုာ်တၢ်ခုၣ်ကရူၢ်ႇတၢ်မုာ်တၢ်ခုၣ်ကီၣ်ကး (PC)တဖၣ်မ့ၢ်ကဆဲးမၤအသးဒ်လဲၣ်ဒုတသ့ၣ်ညါလၢၤဘၣ်” အဂ့ၢ်န့ၣ် ကီၣ်ဘ့သ၀ီဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ
ဒ်န့ၣ်အသိးဟီၣ်က၀ီၤဒူသ၀ီဖဲန့ၣ်အပူၤသုးခိးကီၢ်ဆၢ(BGF)ႇတၢ်မုာ်တၢ်ခုၣ်ကီၣ်ကး(PC)‚ပၢၤကီၢ်ႇပယီၤသုးတဖၣ်ဟ့ၣ်အခွဲးအိးထီၣ်၀ဲတၢ်ဂဲာ်လိာ်ကွဲတၢ်တၤကျိၣ်တၤစ့လီၢ်ႇအၤ၀ၤဒ့ႇတၢ်လိာ်ကွဲ(က့မ်)ဒီးတၢ်ဒုးတဖှံဆီအံၤကအိၣ်လၢအနံၣ်အလါလံအဂ့ၢ်န့ၣ်သ့ၣ်ညါဘၣ်န့ၣ်လီၤႉ
