လါယနူၤအါရံၤ ၁၆ သီႇ ၂၀၂၃ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် သၣ်တီၣ်၀့ၢ်ပူၤန့ၣ် စးထီၣ်ဖဲအပူၤကွံာ်တနံၣ်လါဒံၣ်စ့ဘၢၣ်အခါ ပယီၤသုးအိၣ်ခိးကွၢ်၀ဲသးစၢ်လၢအိၣ်လီၢ်က၀ီၤပူၤတဖၣ်ဒီးမ့ထံၣ်၀ဲလၢအလီၤဆီန့ၣ်သမံသမိးဖီၣ်၀ဲအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤၦၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤႉ
ဖဲအပူၤကွံာ်လါယနူၤအါရံၤ ၇ သီအနံၤ လၢတီအူ–သၣ်တီၣ် ၁၃ မံးလးန့ၣ် ပယီၤသုးလိာ်ဘၢလိာ်ကွီၢ်၀ဲ ၦၤသးစၢ်တဂၤတဲ၀ဲလၢအပာ်ခူသူၣ်ၦၤသးစၢ်တဖၣ်လၢအရီဘၢၣ်ကျီးပူၤဒီးဖဲန့ၣ်ပယီၤသုးနုာ်လီၤဖီၣ်အီၤလၢဟံၣ်ပူၤအဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲန့ၣ်လီၤႉ
အ၀ဲစံး၀ဲလၢ“ကဘၣ်ဖဲမုၢ်ထူၣ်အခါန့ၣ်ပယီၤသုးနုာ်လီၤဖီၣ်အီၤလၢအဟံၣ်ပူၤမီၤနီၤႉမ့၀ံၤပယီၤသုးဆၢဃာ်အီၤႇတီၢ်အီၤဒီးကျိမီၤနီၤႉၦၤထိအီၤၦၤခးပု၁်အီၤဖးနးညါႉမ့၀ံၤပယီၤသုးလဲၤသမံသမိးအရီဘၢၣ်ကျီးႉခဲအံၤၦၤပျၢ်လီၤက့ၤအီၤလံ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါဖဲအပူၤကွံာ်လါဒံၣ်စ့ဘၢၣ် ၁၇ သီအခါစ့ၢ်ကီး ပယီၤသုးလၢအဟးဆှၣ်တၢ်သ့ၣ်တဖၣ် ဖီၣ်သမံသမိးက့ၤကိး၀ဲသၣ်တီၣ်၀့ၢ်လီၢ်က၀ီၤသးစၢ်ဖိတဂၤဒံးဒီး ဖဲန့ၣ်လီၢ်က၀ီၤၦၤဘၣ်မူဘၣ်ဒါတဲကျဲၤ ထိၣ်ဃူထိၣ်ဖိးတၢ်ဒီးပယီၤသုးတဖၣ်လၢကပျၢ်လီၤကွံာ်ကမျၢၢ်အံၤအဃိ ဖဲဟါခီအဆၢကတီၢ်န့ၣ်တၢ် ပျၢ်လီၤက့ၤသးစၢ်အံၤဘၣ်ဆၣ်ခီဖျိပယီၤသုးသမံသမိးတီၢ်မၤဒၢၣ်အီၤအဃိဘၣ်ဒိ၀ဲနးနးကလဲာ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
“ၦၤသးစၢ်လၢတၢ်ဖီၣ်အီၤတဂၤအမိန့ၣ်လဲၤဃ့တၢ်မၤစၢၤအဃိၦၤဘၣ်မူဘၣ်ဒါတဖၣ်လဲၤ၀ဲလၢပယီၤသုးအအိၣ်န့ၣ်မီၤနီၤႉပယီၤသုးတဲ၀ဲလၢအသမံသမိးလီတဲစိန့ၣ်ထံၣ်၀ဲတၢ်လီၤဆီဒ်န့ၣ်မီၤနီၤႉခဲအံၤပယီၤသုးလၢအဟဲအိၣ်ဖဲအံၤတဖၣ်မၢးမးလီၤႉပယီၤသုးတဖၣ်အံၤတဲၦၤဘၣ်မူဘၣ်ဒါဒီးသရၣ်ဒိၣ်လၢအဟးထုးထီၣ်ၦၤသ့ၣ်တဖၣ်အံၤဒူဒူကိၤကိၤလီၤႉအတဲ၀ဲလၢအဃုသ့ၣ်ညါဃာ်၀့ၢ်အံၤအဂ့ၢ်အကျိၤခဲလၢာ်လံလီၤႉတဲ၀ဲလၢဖဲသါဟံမူဒါအကတီၢ်အံၤသါၦၤတဖၣ်အံၤတဘၣ်ဘၣ်နီတမံၤဘၣ်ဒ်န့ၣ်မီၤနီၤႉတၢ်ဂ့ၢ်မ့ကဲထီၣ်တမံၤမံၤန့ၣ်ကဟဲတ့ၢ်လီၤမ့ၣ်ပိၢ်လၢ၀့ၢ်ပူၤတဲပျံၤ၀ဲဒ်န့ၣ်”အဂ့ၢ်န့ၣ် လီၢ်က၀ီၤကမျၢၢ်တဂၤ စံး၀ဲန့ၣ်လီၤႉ
ဒ်န့ၣ်အသိးစှၤသီအတီၢ်ပူၤပယီၤသုးတၢ်အိၣ်ခိးလီၢ်တြဲၤဒီးသုးကလၢၤလၢအိၣ်တီအူ–သၣ်တီၣ်ကျဲႇ တီအူ–လ့ၣ်သိၤကျဲဒီတကျိၤအံၤန့ၣ် ပယီၤသုးအိၣ်ခိးသမံသမိးကီၢ်ပယီၤခိၣ်ဂီၤႇလီၤတဲစိဟဲအါထီၣ်၀ဲဒီး ဟံးန့ၢ်တၢ်ခွဲးတၢ်ယာ်ရ့၀ဲလီၢ်က၀ီၤကမျၢၢ်တဖၣ်ဆူၣ်ဆူၣ်ကိၤကိၤအၢအၢသီသီအဂ့ၢ်န့ၣ်လီၢ်က၀ီၤကမျၢၢ်စံး၀ဲန့ၣ်လီၤႉ
ဖဲအပူၤကွံာ်မဟိတနံၣ်လါနိၣ်၀့ဘၢၣ်အခါစ့ၢ်ကီး ပယီၤသုးကလၢၤလၢအိၣ်သၣ်တီၣ်ကၠံ၀့ၢ် သၤမိတီၤသ၀ီပူၤအံၤဒီး သၣ်တီၣ်ကလံၤစိး လီၢ်က၀ီၤတၢ်ဒီသဒၢသုးပာ်ဖှိၣ်လီၤဆီအဘၢၣ်စၢၤတၢ်ဒုးကဲထီၣ်၀ဲဒီး ခီဖျိပယီၤသုးက့ၤခးလီၤကဒါကျိဖးဒိၣ်တကးဒံးဘၣ်ကဘီယူၤစ့ၢ်ကီးဟဲတ့ၢ်လီၤမ့ၣ်ပိၢ်အဃိ လီၢ်က၀ီၤကမျၢၢ်သံဘၣ်ဒိဘၣ်ထံးကဲထီၣ်တ့ၢ်အသးဒံးန့ၣ်လီၤႉ
