လါယနူၤအါရံၤ ၂၃ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ကီၢ်သူလ့ၤတၢ်ပၢ(သုးက့ ၃)ဟီၣ်က၀ီၤအပူၤ လါယနူၤအါရံၤ ၁ သီတုၤလၢ ၁၅ သီအနံၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇကညီဒီကလုာ်ဂၢၤသးကရၢ(KNDO)ဒီး ပယီၤသုးအဘၢၣ်စၢၤတၢ်ဒုးကဲထီၣ်အတီၢ်ပူၤန့ၣ် ပယီၤသုးသံ(၄၇)ဂၤအဂ့ၢ်န့ၣ် (ခ့ၣ်အဲၣ်ယူၣ်)လီၢ်ခၢၣ်သး ထုးထီၣ်ပာ်ဖျါ၀ဲဖဲလါယနူၤအါရံၤ ၂၀ သီအနံၤန့ၣ်လီၤႉ
တလါအံၤလါယနူၤအါရံၤ ၁၅ သီအတီၢ်ပူၤ KNLA(သုးက့ ၃) အသုးရ့ၣ်(၈)ႇ သုးရ့ၣ်(၉)‚ ကညီဒီကလုာ်ဂၢၤသးကရၢ(KNDO) သုးရ့ၣ်(၃)ႇ (KNLA)စုတီၤဖီလာ်(Federal Wings Drone) သုးပာ်ဖှိၣ်ဒီးပယီၤသုးအဘၢၣ်စၢၤတၢ်ဒုးကဲထီၣ်၀ဲ(၅၅)ဘျီဒီး ပယီၤသုးသံ(၄၇)ဂၤအကျါပၣ်ဃုာ်၀ဲ သုးရ့ၣ်ခိၣ်ခံ(၁)ဂၤႇဘၣ်ဒိ၀ဲ(၁၉)ဂၤအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါခီဖျိပယီၤသုးခးလီၤကျိဖးဒိၣ်ဆူချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ်ႇ မိကီၢ်ဆၣ်တၢ်ပၢဟီၣ်က၀ီၤပူၤကိးမုၢ်နံၤဒဲးအဃိ လီၢ်က၀ီၤပိာ်မုၣ်ဘၣ်ဒိ၀ဲ(၁)ဂၤဒီးလီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲ အဂၤ(၅၀၀၀)ဘျဲၣ်အဂ့ၢ်န့ၣ် ထုးထီၣ်ပာ်ဖျါ၀ဲန့ၣ်လီၤႉ
ဒ်န့ၣ်အသိးလါယနူၤအါရံၤ ၃ သီတုၤလၢ ၁၇ သီအနံၤန့ၣ် ပယီၤသုး(ခလရ–၁၂၄)‚(ခလရ–၆၀)‚(ခမရ–၃၅၁) ဒီး(ခမရ–၄၃၉)လၢအိၣ်ဆီလီၤသးဖဲချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ်ပူၤတဖၣ်အံၤ ပညိၣ်ခးလီၤကျိဖးဒိၣ်ဆူဒူသ၀ီအပူၤခဲလၢာ်အိၣ်၀ဲ(၃၁)ဖျၢၣ်အဃိကမျၢၢ်ဘၣ်ဒိ၀ဲ(၁)ဂၤႇဟံၣ်ဟးဂီၤ(၂)ဖျၢၣ်ဒီး သ့ၣ်မုၣ်ဟးဂီၤ၀ဲ(၁)ပူၣ်အဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ
ဖဲအပူၤကွံာ်လါယနူၤအါရံၤ ၁၈ သီအနံၤစ့ၢ်ကီး ပယီၤသုးလၢအိၣ်ဆီလီၤသးဖဲ(ချၢၣ်လွံၢ်ထူၣ်)ကီၢ်ရ့ၣ် လၢၢ်ဒိၣ်ကီၢ်ဆၣ်ပူၤတဖၣ်ခးလီၤကျိဖးဒိၣ်အဃိကျိဖးဒိၣ်လီၤတဲာ်ပိၢ်ဖးထီၣ်လၢ(မတီကိ)သ၀ီကပၤ(၂)ဖျၢၣ်ႇ ကၠဲခၠိၤအ့သ၀ီကပၤ(၂)ဖျၢၣ်ဒီးနယွဲပ့ၤသ၀ီပူၤ(၂)ဖျၢၣ်ခဲလၢာ်(၆)ဖျၢၣ်ဒံးန့ၣ်လီၤႉမ့မ့ၢ်ကျိဖးဒိၣ်လၢအလီၤတဲာ်ပိၢ်ဖးထီၣ်(နယွဲပ့ၤ)သ၀ီပူၤအံၤန့ၣ်မ့ၣ်အူအီၣ်ဟးဂီၤကွံာ်၀ဲ(နီၢ်ခ့ၤမၠၣ်)အဟံၣ်ဒီးအသ့ၣ်မုၣ်ပူၣ်အဂ့ၢ်န့ၣ် ခ့ၣ်အဲၣ်ယူၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
