သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢတၢ်ဘါယွၤသရိာ်အဃိ လီၢ်က၀ီၤကမျၢၢ်သံ(၅)ဂၤႇဘၣ်ဒိ(၇)ဂၤ

လါယနူၤအါရံၤ ၁၃ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၅)တၢ်ပၢဟီၣ်က၀ီၤ မုၢ်တြီၢ်ကီၢ်ရ့ၣ် လူၤသီကီၢ်ဆၣ်အပူၤန့ၣ် ဖဲမဟါလါယနူၤအါရံၤ ၁၂ သီ ဟါခီ ၂ နၣ်ရံၣ်အဆၢကတီၢ်န့ၣ် ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ ပ့က့ကရူၢ် လ့၀ါသ၀ီပူၤအဃိ ဘၣ်သံ၀ဲလီၢ်က၀ီၤသ၀ီဖိ(၅)ဂၤ အကျါပၣ်ဃုာ်၀ဲခရံာ်ဖိသရၣ်ဒိၣ်တဂၤဒီး ဘၣ်ဒိ၀ဲ(၇)ဂၤအဂ့ၢ်န့ၣ် ဟီၣ်က၀ီၤၦၤဟ့ၣ်တၢ်ကစီၣ်ဖိတဖၣ်စံး၀ဲန့ၣ်လီၤႉ

ဖဲမဟါမုၢ်ဃ့ၢ်လီၤ ၂ နၣ်ရံၣ်ဃၣ်ဃၣ်အဆၢကတီၢ်န့ၣ် သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ လ့၀ါသ၀ီဖီခိၣ်(၆)ဖျၢၣ်ဒီးလီၤတဲာ်ပိၢ်ဖးထီၣ်လၢတၢ်ဘါယွၤသရိာ်ဖီခိၣ်အဃိခဲးသလ့းသရၣ်ဒိၣ်ဒီးကမျၢၢ်ဘၣ်သံဘၣ်ဒိဘၣ်ထံး၀ဲဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅) ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ဖဲ ၁၂ သီ မုၢ်ဃ့ၢ်လီၤ ၂ နၣ်ရံၣ်အခါန့ၣ် သုးမီၤစိရိၤကဘီယူၤ(၂)ဘ့ၣ်ဟဲတ့ၢ်လီၤမ့ၣ်ပိၢ်(၆)ဖျၢၣ် လၢလူၤသီကီၢ်ဆၣ် ပ့က့ကရူၢ် လ့၀ါသ၀ီပူၤမီၤနီၤႉ ပသ့ၣ်ညါန့ၣ်သ၀ီဖိသံ(၅)ဂၤအကျါပၣ်ဃုာ်၀ဲ ခဲသလ့းသရၣ်ဒိၣ်(၁)ဂၤႇ ဘၣ်ဒိခီန့ၣ်(၇)ဂၤလီၤႉ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်အဃိလီၢ်က၀ီၤသ၀ီဖိတဖၣ်ဘၣ်ဃ့ၢ်ထီၣ်၀ဲစ့ၢ်ကီးအဂ့ၢ်န့ၣ် ဟီၣ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်စံး၀ဲန့ၣ်လီၤႉ

ဖဲအပူၤကွံာ်လါယနူၤအါရံၤ ၇ သီအခါစ့ၢ်ကီး ခီဖျိသုးမီၤစိိရိၤကဘီယူၤဟဲတ့ၢ်လီၤမ့ၣ်ပိၢ်လၢမုၢ်တြီၢ်ကီၢ်ရ့ၣ် ဒွဲၣ်လိကီၢ်ဆၣ် မၤသုၣ်ကရူၢ် လၢၢ်ထူၣ်ဖိဟီၣ်က၀ီၤပူၤအဃိဘၣ်သံ၀ဲလီၢ်က၀ီၤကမျၢၢ်(၆)ဂၤဒံးန့ၣ်လီၤႉ

ဒ်န့ၣ်အသိးဖဲတၢ်တနံၤဃီ၀ဲန့ၣ်စ့ၢ်ကီးသုးမီၤစိရိၤကဘီယူၤ(၇)ဘ့ၣ်ဟဲတ့ၢ်လီၤမ့ၣ်ပိၢ်အဖျၢၣ်(၂၀)ဆူ သုးက့ ၅ ဟီၣ်က၀ီၤပူၤဒီး ဖဲန့ၣ်လီၢ်က၀ီၤသ၀ီဖိသံဘၣ်ဒိဘၣ်ထံး၀ဲအိၣ်အသိး ဘၣ်ဟးဂီၤစ့ၢ်ကီး၀ဲတၢ်ဖံးအီၣ်မၤအီၣ်လီၢ်ကျဲ သ့ၣ်တဖၣ်အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ

လၢန့ၣ်အမဲာ်ညါဒ်ခ့ၣ်အဲၣ်ယူၣ်(သုးက့ ၅)နံၣ်ကတၢၢ်တၢ်မၤနီၣ်မၤဃါစရီပူၤအသိးန့ၣ် (၂၀၂၂)တနံၣ်အတီၢ်ပူၤဟီၣ်က၀ီၤဖဲန့ၣ်အပူၤတၢ်ဒုးကဲထီၣ်၀ဲ(၂၇၃၇)ဘျီဒီးသုးမီၤစိရိၤကဘီယူၤဟဲခးလီၤတၢ်အိၣ်၀ဲ(၃၅)ဘျီႇတ့ၢ်လီၤ၀ဲကျိဖးဒိၣ်ချံ(၁၈၂)ဖျၢၣ်ညါအဂ့ၢ်န့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

ဖဲအပူၤကွံာ်လါယနူၤအါရံၤ ၉ သီအခါစ့ၢ်ကီး သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ ခၠီဒီကလုာ်သုးမုၢ်ဒိၣ်(CNF)လီၢ်ခၢၣ်သး၀ဲၤလီၢ်အဃိ ဖဲန့ၣ်(CNF)သုးဖိသံ၀ဲ(၅)ဂၤဒံးန့ၣ်လီၤႉ