လါယနူၤအါရံၤ ၂၈ သီႇ ၂၀၂၃ နံၣ်ႇ ခ့ၣ်အဲးစံၣ်
ဖဲတနံၤအံၤလါယနူၤအါရံၤ ၂၈ သီ ဂီၤခီဆၢကတီၢ် ခီဖျိမ့ၣ်ပိၢ်ပိၢ်ဖးထီၣ်လၢကၠၤအ့စ့ၣ်ကၠံ–ခၠီနခွၣ်ဘၢၣ်စၢၤ (ဒၤလံၤ)တိၤဖးဒိၣ်အံၤအဃိ တိၤလီၤၦီၢ်ဟးဂီၤကွံာ်၀ဲတကပၤဒီး ၦၤဟးထီၣ်က့ၤလီၤတအိၣ်၀ဲလၢၤဘၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ
ဖဲလါယနူၤအါရံၤ ၂၅ သီအနံၤန့ၣ် ခီဖျိမ့ၣ်ပိၢ်ပိၢ်ဖးထီၣ်လၢ(ဒၤလံၤ)တိၤဖးဒိၣ်လၢအိၣ်သၤပယၤသ၀ီဒီးစွ့ၤလ့ သ၀ီဘၢၣ်စၢၤပူၤအံၤတဘျီအဃိ တိၤဟးဂူာ်ဟးဂီၤအိၣ်၀ဲအဆံးတက့ၢ်ဒီး ဖဲတနံၤအံၤဂီၤခီအဆၢကတီၢ် မ့ၣ်ပိၢ်ပိၢ်ဖးထီၣ်ကဒီး(၃)ဖျၢၣ်အဃိ တိၤလၢအိၣ်(စွ့ၤလ့)သ၀ီတကပၤန့ၣ်လီၤၦီၢ်ဟးဂီၤကွံာ်၀ဲအဂ့ၢ်န့ၣ် ကမျၢၢ်လၢအဟးထီၣ်က့ၤလီၤဖဲန့ၣ်တဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
“တဂီၤညါအံၤပနၢ်ဟူမ့ၣ်ပိၢ်ပိၢ်ဖးထီၣ် (၃) ဖျၢၣ်မီၤနီၤႉတိၤလီၤတဲာ်လၢထံကျိပူၤတခီလီၤႉမ့ၢ်မတဂၤမၤ၀ဲလဲၣ်ႇမၤ၀ဲအတၢ်ပညိၣ်အိၣ်ဒ်လဲၣ်ဒုပတသ့ၣ်ညါဘၣ်ႉသိလ့ၣ်ယီၢ်(ဆဲးကဲး)ႇသိလ့ၣ်ဒုလဲၤခီတန့ၢ်လၢၤဘၣ်ႉၦၤလဲၤတၢ်က့ၤတၢ်ဖိတဖၣ်ခီန့ၣ်လဲၤတရံးက့ၤ၀ဲလၢ(ကၠၤအ့ထံကရ့ၣ်)သ၀ီတကပၤန့ၣ်မီၤနီၤ” အဂ့ၢ်န့ၣ် ကၠၤအ့စ့ၣ်ကၠံ၀့ၢ်ပူၤကမျၢၢ်တဂၤ စံးဘၣ် ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဘၣ်ဃးတၢ်ဒိးလီၤမ့ၣ်ပိၢ်ဒီးမၤပိၢ်ဖးထီၣ်မ့ၣ်ပိၢ်လၢ(ဒၤလံၤ)တိၤဖးဒိၣ်တၢ်ဂ့ၢ်အံၤမ့ၢ်မတၤကရူၢ်ကရၢမၤ၀ဲလဲၣ်ခီန့ၣ် ခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ်ပာ်ဂၢၢ်ပာ်ကျၢၤ၀ဲလီၤလီၤဆီဆီတန့ၢ်ဒံး၀ဲဘၣ်န့ၣ်လီၤႉ ပယီၤသုးအံၤလၢကဆှၢထီၣ်တၢ်အီၣ်တၢ်အီႇကျိချံၦာ်သၣ်တဖၣ်ဆူကၠၤအ့စ့ၣ်ကၠံကီၢ်ဆၣ်ပူၤတၢ်မဲာ်ညါသုးကလၢၤတဖၣ်အဂီၢ်သူ၀ဲဒၣ်(ဒၤလံၤ)တိၤအံၤလီၤအဂ့ၢ်န့ၣ် ၦၤဟူးဂဲၤမၤတၢ်ပၢၢ်ဆၢဖိတဖၣ်စံး၀ဲန့ၣ်လီၤႉ
