Home တၢ်ကစီၣ် ကယဲၢ်တၢ်ကရၢကရိဒီးကရၢဖိလၢအိၣ်ကရၢမိၢ်ၦၢ်အတၢ်တီခိၣ်ရိၣ်မဲပူၤတဖၣ်ကဘၣ်အိၣ်ဒီးကရၢဖိအသးအလၢအၦဲၤ အဂ့ၢ် KNU ကရၢခိၣ် ဆီၣ်တခူထီၣ်၀ဲ

ကယဲၢ်တၢ်ကရၢကရိဒီးကရၢဖိလၢအိၣ်ကရၢမိၢ်ၦၢ်အတၢ်တီခိၣ်ရိၣ်မဲပူၤတဖၣ်ကဘၣ်အိၣ်ဒီးကရၢဖိအသးအလၢအၦဲၤ အဂ့ၢ် KNU ကရၢခိၣ် ဆီၣ်တခူထီၣ်၀ဲ

320
0

လါဖ့ၤဘြူၤအါရံၤ ၆ သီႇ ၂၀၂၃ နံၣ်ႇ ခ့ၣ်အဲးစံၣ်

ကယဲၢ်မ့ၢ်တၢ်ကရၢကရိဒီးကရၢဖိခဲလၢာ်လၢအိၣ်ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ကရၢမိၢ်ၦၢ် အတၢ်တီခိၣ်ရိၣ်မဲပူၤတဖၣ်ကဘၣ်အိၣ်ဒီးကရၢဖိအသးအလၢအၦဲၤအဂ့ၢ်န့ၣ် ခ့ၣ်အဲၣ်ယူၣ် ကရၢခိၣ် သုးခိၣ်ကျၢၢ်ဒိၣ်စိ စီၤမူၤတူစ့ဖိ ဆီၣ်တခူထီၣ်၀ဲဒၣ်န့ၣ်လီၤႉ

ဖဲလါဖ့ၤဘြူၤအါရံၤ ၅ သီအနံၤလၢအလီၤဘၣ်၀ဲ(၇၆)၀ီတ၀ီ ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢမုၢ်နံၤအံၤ အဂီၢ်န့ၣ် ကရၢခိၣ် သုးခိၣ်ကျၢၢ်ဒိၣ်စိ စီၤမူၤတူစ့ဖိ အလံာ်ဟ့ၣ်ယုၢ်အပူၤဆီၣ်တခူထီၣ်၀ဲဒၣ်န့ၣ်လီၤႉ

KNU ကရၢခိၣ် စံး၀ဲ “ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢအံၤအိၣ်ဆၢထၢၣ်၀ဲဂၢၢ်ဂၢၢ်ကျၢၤကျၢၤန့ၢ်တုၤ မုၢ်မဆါတနံၤန့ၣ်လီၤႉလၢတၢ်ဂဲၤလိာ်ခါဆူညါအပူၤတၢ်ဂ့ၢ်လၢအကါဒိၣ်၀ဲန့ၣ်ကယဲၢ်တၢ်ကရၢကရိဒီးကရၢဖိခဲလၢာ် လၢအိၣ်၀ဲလၢကရၢမိၢ်ၦၢ်အတၢ်တီခိၣ်ရိၣ်မဲပူၤတဖၣ်ကဘၣ်အိၣ်ဒီးကရၢဖိအသးအလၢအၦဲၤဒီးဖံးမၤတၢ်လၢကညီကလုာ်အတၢ်ပညိၣ်ကွၢ်စိဒီးကညီကလုာ်အတၢ်ကဲဘျုးကဲဖှိၣ်အဂီၢ်နီၢ်နီၢ်န့ၣ်လီၤႉဒ်န့ၣ်အသိးကညီကလုာ်အတၢ်ကဲဘျုးကဲဖှိၣ်အဂီၢ်ကဘၣ်ပာ်ဖှိၣ်မၤသကိးတၢ်လၢမူဒါဒီးတၢ်ဖံးတၢ်မၤလၢလီၤဘၣ်အီၤတဖၣ်လၢတၢ်နၢ်ပၢၢ်ဒီးလၢတၢ်မၤသကိးအပူၤလီၤ” အဂ့ၢ်န့ၣ် စံး၀ဲန့ၣ်လီၤႉ

စးထီၣ်လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢအံၤတၢ်ကရၢကရိသူၣ်ထီၣ်တ့ၢ်အီၤဒီး တၢ်ဟ့ၣ်လီၤတ့ၢ်လံအီၤမူဒါအသိးန့ၣ်ဂဲၤလိာ်တ့ၢ်တၢ်လၢကညီကလုာ်အဂီၢ်တပယူာ်ဃီအသိးပကဘၣ်ဂဲၤလိာ်ကဒီးပ၀ဲတုၤတၢ်မၤနၢၤအိၣ်ထီၣ်၀ဲတစုအဂ့ၢ်န့ၣ်(ခ့ၣ်အဲၣ်ယူၣ်)ကရၢခိၣ် ဆဲးဆီၣ်တခူထီၣ်၀ဲန့ၣ်လီၤႉ

ဒ်သိးပအိၣ်ဆၢထၢၣ်ပ၀ဲဂၢၢ်ဂၢၢ်ကျၢၤကျၢၤကန့ၢ်ကသ့၀ဲအဂီၢ်န့ၣ်ပကဘၣ်ဂဲၤလိာ်စ့ၢ်ကီးပ၀ဲလၢပကဒိးန့ၢ်ဘၣ်ကညီကလုာ်ဒီးကမျၢၢ်ထံဖိကီၢ်ဖိတဖၣ်အတၢ်ဆီၣ်ထွဲမၤစၢၤအဂ့ၢ်န့ၣ် သုးခိၣ်ကျၢၢ်ဒိၣ်စိ စီၤမူၤတူစ့ဖိ စံး၀ဲန့ၣ်လီၤႉ

လၢန့ၣ်အမဲာ်ညါၦၤပၢၢ်ဆၢတၢ်ဖိကိးဂၤဒဲးကဂဲၤလိာ်မၤလၢၦဲၤကညီဒီကလုာ်အထံရူၢ်ကီၢ်သဲးတၢ်ပညိၣ်ကွၢ်စိတုၤတၢ်မၤနၢၤအိၣ်ထီၣ်၀ဲတစုဒီးဂဲာ်လိာ်သကိးအီၤဒ်ပမူပဒါဒီးလၢပကျဲပသနၢၣ်ဒၣ်၀ဲအဂ့ၢ်န့ၣ် ခ့ၣ်အဲၣ်ယူၣ် ကရၢခိၣ် ဆဲးဆီၣ်တခူထီၣ်၀ဲန့ၣ်လီၤႉ

“မ်ပၦၤကလုာ်ဒီးကညီဒီကလုာ်ကရၢဖိကိးဂၤဒဲးႇအဲၣ်ကလုာ်ၦၤပၢၢ်ဆၢတၢ်ဖိကိးဂၤဒဲးႇကအိၣ်ဒီးတၢ်ပာ်သး လၢခ့ၣ်အဲၣ်ယူၣ်–ကညီဒီကလုာ်စၢၣဖှိၣ်ကရၢအံၤမ့ၢ်ကရၢလၢအကါဒိၣ်၀ဲလၢကညီဒီကလုာ်အဂီၢ်ဒီးကရၢအံၤ ကအိၣ်ဒီးအတၢ်ဂံၢ်တၢ်ဘါလၢလၢၦဲၤၦဲၤလၢအသနၢၣ်ကိးသနၢၣ်ဒဲးႇဒီးတဘျီဃီဂဲၤလိာ်မၤလၢၦဲၤကညီဒီကလုာ်အထံရူၢ်ကီၢ်သဲးအတၢ်ပညိၣ်ကွၢ်စိတုၤတၢ်မၤနၢၤအိၣ်ထီၣ်၀ဲတစုဒီးဂဲၤလိာ်သကိးအီၤဒ်ပမူပဒါဒီးလၢပကျဲပသနၢၣ်ဒၣ်၀ဲ” အဂ့ၢ်န့ၣ် ခ့ၣ်အဲၣ်ယူၣ် ကရၢခိၣ် ဆီၣ်တခူထီၣ်၀ဲန့ၣ်လီၤႉ

ပအိၣ်ဒီးတၢ်ပာ်ပနီၣ်ပာ်ကဲဒီးဟ့ၣ်လီၤတၢ်ယူးယီၣ်ဆူခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢခိၣ်နၢ်ႇသိၣ်ဒူတဖၣ်ဒီး ကညီကမျၢၢ်ထံဖိကီၢ်ဖိတဖၣ်လၢအတၢ်ဟ့ၣ်လီၤတ့ၢ်ကွံာ်သွံၣ်ထံသးသမူဒီးတၢ်ဂဲၤလိာ်မၤလၢၦဲၤ၀ဲကညီဒီကလုာ်အထံရူၢ်ကီၢ်သဲးတၢ်ပညိၣ်ကွၢ်စိဒီးကညီကလုာ်ဂ့ၢ်၀ီဒ်လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢအတၢ်တီခိၣ်ရိၣ်မဲ ဟံးစုနဲၣ်ကျဲအဖီလာ်လၢတၢ်သူၣ်တီသးရၤပူၤအဂ့ၢ်န့ၣ်ကရၢခိၣ် စီၤမူၤတူစ့ဖိ စံး၀ဲန့ၣ်လီၤႉ

ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢအံၤ ကညီဒီကလုာ်တၢ်ကရၢကရိ(၄)ဒူၣ်ဒ်အမ့ၢ် ကညီဒီကလုာ်ကရၢ(Karen National Association-KNA)ႇကညီဘူးဒးကရၢ(Buddhist Karen National Association-BKNA)ႇ ကညီလီၢ်ခၢၣ်သးကရၢ(Karen Central Organization-KCO)ဒီး ကညီသးစၢ်ကရၢ(Karen Youth Organization-KYO)တဖၣ်ပာ်ဖှိၣ်ထီၣ်သးဒီးဒုးအိၣ်ထီၣ်၀ဲဖဲ လါဖ့ၤဘြူၤအါရံၤ ၅ သီအနံၤန့ၣ်လီၤႉ

ဒ်သိးကညီဒီကလုာ်အတၢ်ဂဲၤလိာ်အဂံၢ်ကဆူၣ်ထီၣ်၀ဲအဂီၢ်န့ၣ် ဖဲ(၁၉၄၇)နံၣ် လါဖ့ၤဘြူၤအရံၤ ၃ သီ တုၤလၢ ၇ သီအနံၤန့ၣ် တၢ်မၤ၀ဲကညီကလုာ်တၢ်အိၣ်ဖှိၣ်အံၤဖဲ၀့ၢ်တကူၣ်ဒီး တၢ်အိၣ်ဖှိၣ်ဘျီ၀ဲန့ၣ်အပူၤ တၢ်ဒုးအိၣ်ထီၣ်၀ဲကရၢအံၤန့ၣ်လီၤႉ