လါဖ့ၤဘြူၤအါရံၤ ၉ သီ၊ ၂၀၂၃ နံၣ်၊ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤ ဖၣ်အၣ်ကီၢ်ဆၣ် (တကီၤဘိ)သ၀ီအပူၤ ခီဖျိတၢ်ဒုးကဲထီၣ်လၢဟီၣ်က၀ီၤတၢ်ပၢၢ်ဆၢသုးပာ်ဖှိၣ်ဒီးပယီၤသုးအဘၢၣ်စၢၤအဃိ တၢ်ကးတံၢ်ကွံာ်သ၀ီကျဲနုာ်လီၤဟးထီၣ်အဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲန့ၣ်လီၤႉ
ဖဲလါဖ့ၤဘြူၤအါရံၤ ၇ သီ ဟါခီအဆၢကတီၢ် ပယီၤသုးနုာ်လီၤလၢဖၣ်အၣ်ကီၢ်ဆၣ်(တကီၤဘိ)သ၀ီကပၤဒီး ခီဖျိဒုးယၤတၢ်ဖ့ၣ်စၢဟဲကဲထီၣ်၀ဲလၢပယီၤသုးဒီးဟီၣ်က၀ီၤသုးပာ်ဖှိၣ်အဘၢၣ်စၢၤအဃိ ကမျၢၢ်ဒီးသိလ့ၣ်လၢအိၣ်သ၀ီပူၤတဖၣ်တၢ်တပျဲလဲၤထီၣ်လၢ၀့ၢ်ပူၤလၢၤဘၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ဘၣ်ဃးတၢ်ကးတံၢ်ကွံာ်သ၀ီကျဲနုာ်လီၤဟးထီၣ်အံၤမ့ၢ်ကရူၢ်ကရၢဖဲလဲၣ်တဒူၣ်ကးတံၢ်၀ဲလဲၣ်န့ၣ်တၢ်တသ့ၣ်ညါအီၤလီၤတံၢ်လီၤဆဲးဒံးဘၣ်အဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ
“ခဲအံၤတၢ်အိၣ်သးဒုဒုးယၤတၢ်ဖ့ၣ်စၢအိၣ်ထီၣ်မီၤနီၤႉပတၦ့ၤဘၣ်တၢ်နီတမံၤဒံးဘၣ်ႉဘၣ်ပျံၤလၢတၢ်ဒုးကကဲထီၣ်လီၤႉတဂီၤအံၤဖဲ (၇) နၣ်ရံၣ်န့ၣ်သိလ့ၣ်ကဟးထီၣ်န့ၣ်တပျဲဟးထီၣ်၀ဲဘၣ်ႉမ့ၢ်(ခ့ၣ်အဲၣ်ယူၣ်) မၢဟဲက့ၤကဒါဧါႇမ့မ့ၢ်တခီပယီၤသုးမၢဟဲက့ၤကဒါဧါဒုပတသ့ၣ်ညါဘၣ်” အဂ့ၢ်န့ၣ် စံး၀ဲန့ၣ်လီၤႉ
ဘၣ်ဃးဒီးတၢ်ဂ့ၢ်ကဲထီၣ်အံၤခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ်ဆဲးကျိးခ့ၣ်အဲၣ်ယူၣ်–ကညီဒီကလုာ် စၢဖှိၣ်ကရၢ(သုးက့ ၁)ၦၤဘၣ်မူဘၣ်ဒါဘၣ်ဆၣ်ဆဲးကျိးတန့ၢ်ဒံးဘၣ်အသိးပယီၤသုးတကပၤစ့ၢ်ကီးထုးထီၣ်ပာ်ဖျါ၀ဲ တအိၣ်နီတမံၤဒံးဘၣ်န့ၣ်လီၤႉ
ခ့ၣ်အဲၣ်ယူၣ်(သုးက့ ၁)တၢ်ပၢဟီၣ်က၀ီၤလၢအမ့ၢ်တကီၤဘိကရူၢ် မံပိႇညီၤကိသ၀ီတဖၣ်အံၤအပူၤန့ၣ် တၢ်ခးလိာ်သးကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးသုးခိးကီၢ်ဆၢ(BGF)အဘၢၣ်စၢၤခဲအံၤခဲအံၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
“လၢအံၤတကပၤန့ၣ်တၢ်ဒုးကဲထီၣ်ဒီယုၢ်လီၤႉတၢ်ကစီၣ်လီၤတထီၣ်ဘၣ်န့ၣ်ႉဘၣ်မနုၤအဃိလဲၣ်န့ၣ်ၦၤမ့ဟဲသံကွၢ်တၢ်ကစီၣ်န့ၣ်တတဲပၠး၀ဲဘၣ်မီၤနီၤႉတဘျီတခီၣ်လၢဂီၤခီန့ၣ်ပနၢ်ဟူကဘီယူၤဟဲထီၣ်သီၣ်လီၤႉမ့ဘၣ်တဲန့ၣ်လၢပအိၣ်တကပၤအံၤမ့မ့ၢ် (PDF)န့ၣ်တကပၤမီၤနီၤႉလၢ(ညီၤကိ)သ၀ီန့ၣ်ပယီၤသုးဒီး (BGF)အိၣ်မီၤနီၤႉမ့ဘၣ်တဲန့ၣ်ပအိၣ်လၢအ၀ဲသ့ၣ်ဘၢၣ်စၢၤမီၤနီၤႉတၢ်ဒုးမ့ကဲထီၣ်န့ၣ်ပဟးစံၣ်အလီၢ်တအိၣ်ဘၣ်ႇကလဲၤစံၣ်အဂီၢ်န့ၣ်အိၣ်ထံကျိလီၤ” အဂ့ၢ်န့ၣ် စံး၀ဲန့ၣ်လီၤႉ
သုးဟံးန့ၢ်တၢ်စိတၢ်ကမီၤကဲထီၣ်၀ံၤအလီၢ်ခံလၢခ့ၣ်အဲၣ်ယူၣ်(သုးက့ ၁)ဟီၣ်က၀ီၤအပူၤ တၢ်ဒုးကဲထီၣ်၀ဲလၢဟီၣ်က၀ီၤသုးပာ်ဖှိၣ်ဒီးပယီၤသုးႇ(BGF)အဘၢၣ်စၢၤဒီးတကီၢ်ခါအံၤစ့ၢ်ကီးခံခီခံကပၤတၢ်ဖ့ၣ်စၢဟဲဒိၣ်ထီၣ်၀ဲအဃိတၢ်ဒုးတၢ်ယၤကဆူၣ်ထီၣ်သ့၀ဲအဂ့ၢ်န့ၣ် လီၢ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိစံး၀ဲအသိး သ့ၣ်ညါဘၣ်န့ၣ်လီၤႉ
